សេចក្តីព្រាងផែនការជាតិទសវត្សរ៍សុវត្ថិភាពចរាចរណ៍ផ្លូវគោកឆ្នាំ២០២១-២០៣០ ត្រូវបានលើកយកមកពិភាក្សាដើម្បីយកទៅអនុវត្តឱ្យកាន់តែមានប្រសិទ្ធភាព
ភ្នំពេញ៖សេចក្តីព្រាងផែនការជាតិទសវត្សរ៍សុវត្ថិភាពចរាចរណ៍ផ្លូវគោក ឆ្នាំ២០២១-២០៣០ ត្រូវបានក្រសួងមហាផ្ទៃ ក្រសួងសាធារណការ និងដឹកជញ្ជូន រួមនឹងស្ថាប័នពាក់ព័ន្ធជាច្រើនបានធ្វើការពិនិត្យ និងពិគ្រោះយោបល់គ្នា ក្នុងការរៀបចំផែនការជាតិនេះ។
យោងតាមក្រសួងមហាផ្ទៃបានឱ្យដឹងថា កិច្ចប្រជុំឆ្លងសេចក្តីព្រាងផែនការជាតិ ទសវត្សរ៍សុវត្ថិភាពចរាចរណ៍ផ្លូវគោក រយៈពេល ១០ ឆ្នាំ នេះបានធ្វើឡើងនាថ្ងៃទី២៨ ខែវិច្ឆិកា ឆ្នាំ២០២២ នាទីស្តីការក្រសួងមហាផ្ទៃ ក្រោមអធិតីភាព សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃនិងមានការចូលរួមពីទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ស៊ុន ចាន់ថុល ផងដែរ។
លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការ នៃអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) បានធ្វើបទបង្ហាញលើចំណុចសំខាន់ៗ នៃផែនការជាតិ ទសវត្សរ៍សុវត្ថិភាពចរាចរណ៍ផ្លូវគោក ឆ្នាំ២០២១-២០៣០នេះដល់អង្គប្រជុំផងដែរ។លោកស្រីបានលើកឡើងនាពេលនោះថា ផែនការជាតិ ទសវត្សរ៍សកម្មភាពសុវត្ថិភាពចរាចរណ៍ផ្លូវគោកនេះ គឺជាផែនការសកម្មភាពរយៈពេល ១០ឆ្នាំ ចាប់ពីឆ្នាំ២០២១ ដល់២០៣០ គឺជាផែនការជាតិ ទសវត្សរ៍សកម្មភាពសុវត្ថិភាពចរាចរណ៍ផ្លូវគោកលើកទី២ បន្តពីលើកទី១ ឆ្នាំ២០១១ ដល់២០២១ ដែលបានអនុវត្តរួច។
លោកជំទាវ មឹន មាណវី មានប្រសាសន៍ថា ៖ «ផែនការជាតិទសវត្សរ៍នេះក៏ជាឧបករណ៍ ដើម្បីរួមចំណែកសម្រេចឱ្យបានជោគជ័យ ក្នុងការអនុវត្តគោលនយោបាយចតុកោណរបស់រាជរដ្ឋាភិបាលកម្ពុជា និងស្របតាមគោលនយោបាយជាតិសុវត្ថិភាពចរាចរណ៍ផ្លូវគោក ដែលបានទទួលការឯកភាពពីគណៈរដ្ឋមន្ត្រីក្នុងសម័យប្រជុំពេញអង្គ នាថ្ងៃទី២១ ខែកុម្ភៈ ឆ្នាំ២០១៤កន្លងមក»។
ទន្ទឹមនឹងនោះលោកជំទាវក៏បានបញ្ជាក់ផងដែរថា ផែនការនេះក៏បានសម្របសម្រួលទៅតាមផែនការសកម្មភាពសកល របស់អង្គការសហប្រជាជាតិ ដែលផ្អែកតាមច្បាប់ស្តីពីចរាចរណ៏ផ្លូវគោក និងស្របទៅនឹងការវិវឌ្ឍន៍ជឿនលឿនរបស់ជាតិលើគ្រប់វិស័យ និងពិសេសវិស័យដែលពាក់ព័ន្ធនឹងសកម្មភាពចរាចរណ៍ផ្លូវគោក។
វិស័យពាក់ព័ន្ធទាំងនោះ មានដូចជា អត្រាកំណើនប្រជាជន កំណើនសេដ្ឋកិច្ច កំណើនយានយន្ត ការអភិវឌ្ឍវិស័យផ្លូវថ្នល់ ស្ថានភាពគ្រោះថ្នាក់ចរាចរណ៍ផ្លូវគោក បទពិសោធន៍ល្អៗនៃវិធានការរឹតបន្ដឹងអនុវត្តច្បាប់ និងបញ្ហាប្រឈមនានា។
លោកជំទាវ មឹន មាណវី បានបន្ថែមថា ៖ «ជារួមផែនការជាតិ ទសវត្សរ៍សកម្មភាពសុវត្ថិភាពចរាចរណ៍ផ្លូវគោកលើកទី២ គឺជាផែនទីបង្ហាញផ្លូវដ៏សំខាន់ លើកិច្ចការទប់ស្កាត់ និងកាត់បន្ថយអ្នកស្លាប់ និងរបួសដោយគ្រោះថ្នាក់ចរាចរណ៍ តាមគោលដៅដែលបានកំណត់»។
នៅក្នុងអង្គប្រជុំនេះសម្ដេចក្រឡហោម ស ខេង បានថ្លែងអំណគុណចំពោះក្រុមការងារគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) ទាំងអស់ ដែលបានផ្ដល់យោបល់ល្អៗជាច្រើន ដើម្បីកែលម្អផែនការជាតិ ទសវត្សរ៍សុវត្ថិភាពចរាចរណ៍ផ្លូវគោក រយៈពេល ១០ឆ្នាំ ចាប់ពីឆ្នាំ២០២១-២០៣០។
ជាមួយគ្នានោះសម្ដេចក្រឡាហោមក៏បានណែនាំដល់ អគ្គលេខាធិការដ្ឋាន គ.ស.ច.គ ត្រូវបន្ដនិតិវិធី ពិនិត្យឯកសារនេះបន្ថែមទៀតដើម្បីយកទៅអនុវត្តកាន់តែមានប្រសិទ្ធភាពផងដែរ។
យោងតាមសេចក្តីប្រកាសព័ត៌មានរបស់អង្គការមូលនិធិបង្ការរបួស អាស៊ី កាលពីថ្ងៃទី២៤ ខែវិច្ឆិកា បានលើកឡើងថា គោលដៅចម្បងមួយនៃការសម្រេចឱ្យបាននូវការអភិវឌ្ឍប្រកបដោយចីរភាព (SDGs) គឺការកាត់បន្ថយចំនួនអ្នករងរបួស និងស្លាប់នៅតាមដងផ្លូវឱ្យបាន៥០% ត្រឹមឆ្នាំ២០៣០ ដែលត្រូវបានកំណត់ដោយអង្គការសុខភាពពិភពលោក។
ប្រភពដដែលនេះ បានលើកឡើងផងដែរថា នៅក្នុងខែកញ្ញា ឆ្នាំ២០២៣ខាងមុខ ប្រមុខរដ្ឋ និងថ្នាក់ដឹកនាំរាជរដ្ឋាភិបាលមកពីបណ្តាប្រទេសជុំវិញពិភពលោកនឹងមកជួបជុំគ្នា ដើម្បីចូលរួមនៅក្នុងកិច្ចប្រជុំកំពូលសម្រាប់ការអភិវឌ្ឍប្រកបដោយចីរភាព (SDGs) ដែលជាផ្នែកមួយនៃសប្តាហ៍មហាសន្និបាតអង្គការសហប្រជាជាតិ។
នេះគឺជាពេលវេលាដ៏មានសារៈសំខាន់ដើម្បីធ្វើការពិនិត្យទៅលើវឌ្ឍនភាពនាពេលបច្ចុប្បន្នក្នុងការអនុវត្តរបៀបវារៈសម្រាប់ឆ្នាំ២០៣០ ហើយនឹងរបៀបដែលនឹងត្រូវធ្វើដើម្បីឈានឱ្យគៀកក្នុងការសម្រេចបាននូវគោលដៅអភិវឌ្ឍប្រកបដោយចីរភាពទាំង១៧៕
ដោយ៖នាង សុគន្ធា
