អាមេរិកសម្ដែងការគាំទ្រចំពោះក្រុមបាតុករប្រឆាំងនឹងការបិទខ្ទប់ដោយសន្តិវិធីនៅចិន
អាមេរិក៖សេតវិមានបាននិយាយកាលពីថ្ងៃចន្ទទី ២៨ ខែវិច្ឆិកា ថា សហរដ្ឋអាមេរិកគាំទ្រសិទ្ធិរបស់ប្រជាជនក្នុងការតវ៉ាដោយសន្តិវិធីនៅប្រទេសចិន ប៉ុន្តែមិនបានរិះគន់ទីក្រុងប៉េកាំងនោះទេ ខណៈដែលប្រជាជនចិនបានប្រមូលផ្ដុំគ្នាធ្វើបាតុកម្មប្រឆាំងនឹងវិធានការរឹតត្បឹតក្រោមគោលនយោបាយសូន្យកូវីដ ហើយបង្កឱ្យមានការប៉ះទង្គិចគ្នាជាមួយក្រុមអាជ្ញាធរ នៅតាមបណ្ដាក្រុងធំៗចំនួន ១៥ ទូទាំងប្រទេសចិន។
សេចក្ដីថ្លែងការណ៍របស់សេតវិមានចេញផ្សាយទន្ទឹមនឹងការរឹតបន្តឹងសន្តិសុខរបស់ប៉ូលិសចិននៅកន្លែងតវ៉ារួមទាំងក្នុងទីក្រុងសៀងហៃ និងប៉េកាំង បន្ទាប់ពីក្រុមមនុស្សនៅទីនោះ និងក្នុងទីក្រុងផ្សេងទៀត រួមទាំងនៅតាមបរិវេណសាកលវិទ្យាល័យរាប់សិប បានបង្ហាញការមិនពេញចិត្តកាន់តែខ្លាំងក្នុងបាតុកម្ម ទាំងស្រែកឱ្យលោក ស៊ី ជិនពីង ដែលទើបចាប់ផ្ដើមបន្តអាណត្តិទី៣ ចុះចេញពីដំណែង។
ក្រុមប្រឹក្សាសន្តិសុខជាតិរបស់សេតវិមានបាននិយាយយ៉ាងដូច្នេះថា ៖ «យើងបាននិយាយជាយូរមកហើយថា មនុស្សគ្រប់រូបមានសិទ្ធិក្នុងការតវ៉ាដោយសន្តិវិធីទាំងនៅសហរដ្ឋអាមេរិក និងនៅជុំវិញពិភពលោក។ នេះរួមបញ្ចូលទាំងនៅសាធារណរដ្ឋប្រជាមានិតចិន»។
ក្រុមប្រឹក្សាបន្តថា សហរដ្ឋអាមេរិកផ្តោតលើដំណើរការដើម្បីប្រយុទ្ធប្រឆាំងនឹងកូវីដ ដោយរួមទាំងការបង្កើនអត្រានៃការចាក់វ៉ាក់សាំង ហើយលើកឡើងថា ៖ «យើងគិតថា វានឹងពិបាកខ្លាំងណាស់សម្រាប់សាធារណរដ្ឋប្រជាមានិតចិន ដើម្បីអាចទប់ស្កាត់មេរោគនេះបានតាមរយៈគោលនយោបាយសូន្យកូវីដរបស់ខ្លួន»។
កាលពីពាក់កណ្ដាលខែនេះ ប្រធានាធិបតីអាមេរិក លោក ចូ បៃដិន បានជួបពិភាក្សាផ្ទាល់ជាមួយលោក ស៊ី នៅកោះបាលី ហើយការឆ្លើយតបទាំងប្រយ័ត្នពាក្យសម្ដីរបស់សេតវិមាននាពេលនេះ ហាក់ដូចជាបង្ហាញពីបំណងចង់ដើរលើផ្លូវប្រុងប្រយ័ត្ន និងជៀសវាងការធ្វើឱ្យស្ថានការណ៍រវាងប្រទេសទាំង២កាន់តែក្តៅគគុក។
នៅពេលសួរអំពីប្រតិកម្មរបស់លោក បៃដិន ចំពោះការទាមទារឱ្យលោក ស៊ី ចុះចេញពីដំណែងពីសំណាក់ប្រជាជនចិន លោក អ្នកនាំពាក្យសន្តិសុខជាតិរបស់សេតវិមានលោក ចន ឃឺរប៊ី បានប្រាប់សន្និសីទសារព័ត៌មានថា ៖ «ប្រធានាធិបតីនឹងមិននិយាយដើម្បីបាតុករនៅជុំវិញពិភពលោកនោះទេ។ ពួកគេកំពុងនិយាយទាមទារដើម្បីខ្លួនឯង»។
ការលើកឡើងបែបនេះ ផ្ទុយទៅនឹងអ្វី ដែលលោក ឃឺរប៊ី ធ្លាប់បានលើកឡើងនៅដើមខែនេះថា លោក បៃដិន កំពុងបង្ហាញពីសាមគ្គីភាពជាមួយក្រុមបាតុករក្នុងប្រទេសអ៊ីរ៉ង់ ដោយនិយាយថា ៖ «យើងនឹងដោះលែងអ៊ីរ៉ង់ឱ្យមានសេរី» ស្របពេលដែលអ៊ីរ៉ង់បានចោទអាមេរិក និងលោកខាងលិចថា ញ៉ាំញង់ឱ្យប្រទេសរបស់ខ្លួនចុះខ្សោយ។
លោក ឃឺរប៊ី បានអះអាងថា លោក បៃដិន កំពុងតាមដានអ្វីដែលកំពុងកើតឡើងនៅក្នុងប្រទេសចិន និងរក្សាការយកចិត្តទុកដាក់ចំពោះសកម្មភាពតវ៉ា។ លោកបាននិយាយថា រដ្ឋបាលអាមេរិកកំពុងឃ្លាំមើលយ៉ាងដិតដល់ចំពោះបាតុកម្មនេះ ហើយថា ចិនមិនបានស្នើសុំវ៉ាក់សាំងពីសហរដ្ឋអាមេរិកនោះទេ។
សូមបញ្ជាក់ថា រាប់តាំងពីជំងឺកូវីដផ្ទុះបែកមក ទីក្រុងប៉េកាំង និងវ៉ាស៊ីនតោន បានគ្រប់គ្រងស្ថានការណ៍តាមរបៀបរៀងៗខ្លួន។ ខណៈចំនួនអ្នកឆ្លង និងស្លាប់ នៅអាមេរិក និងប្រទេសផ្សេងទៀត ហក់ឡើងកប់ពពក គោលនយោបាយសូន្យកូវីដរបស់ចិន បានធ្វើការឆ្លងរាលដាលក្នុងប្រទេសរបស់ខ្លួនមានលក្ខណៈស្ងប់ស្ងាត់។
ក្រោយរយៈពេលបីឆ្នាំ ចិននៅតែបន្តប្រកាន់ខ្ជាប់នូវគោលនយោបាយនេះ ខណៈចំនួនករណីឆ្លងថ្មីនៅទូទាំងប្រទេសកើនឡើងដល់រាប់ម៉ឺននាក់ជាប្រចាំថ្ងៃ។ មូលហេតុនេះហើយ ទើបបង្កឱ្យមានការបិទខ្ទប់យ៉ាងតឹងរ៉ឹង និងការធ្វើតេស្តរកកូវីដលើមនុស្សរាប់លាននាក់ ដែលបង្កឱ្យការរំខានដល់សេដ្ឋកិច្ចទ្រង់ទ្រាយធំ។
ការតវ៉ាទ្រង់ទ្រាយធំដ៏កម្រក្នុងប្រទេសកុម្មុយនីស្តនេះ បានផ្ទុះឡើងចាប់តាំងពីថ្ងៃសុក្រសប្ដាហ៍មុន បន្ទាប់ពីភ្លើងឆេះអាផាតមិនមួយនៅតំបន់ស៊ីនជាំង ដែលសម្លាប់មនុស្សយ៉ាងហោចណាស់ ១០ នាក់។ ក្រុមអ្នកប្រឆាំងបានបញ្ចេញកំហឹងថា ដោយសារតែគោលនយោបាយសូន្យកូវីដ ទើបធ្វើឱ្យដំណើរការជួយសង្រ្គោះរបស់អ្នកពន្លត់អគ្គិភ័យមានភាពយឺតយ៉ាវ ហើយបង្កការលំបាកដល់ការរត់ភៀសចេញពីភ្លើងរបស់ជនរងគ្រោះ។ ការចោទប្រកាន់នេះ ត្រូវបានអាជ្ញាធរបដិសេធយ៉ាងដាច់អហង្ការ។
ចំពោះការសម្ដែងការគាំទ្រចំពោះក្រុមបាតុករយ៉ាងប្រយ័ត្នប្រយែងរបស់អាមេរិកនាពេលនេះ គេមិនទាន់ឃើញមានប្រតិកម្មនាមួយពីប្រទេសចិននៅឡើយទេ។ យ៉ាងណាមិញ ជំហររបស់អាមេរិកលើកនេះ ធ្វើឡើងខណៈដែលអាមេរិក និងចិន ប្រឈមមុខនឹងបញ្ហាភូមិសាស្រ្តនយោបាយដ៏តានតឹងរួចមកហើយ បន្ថែមពីលើបញ្ហាពាណិជ្ជកម្ម និងសិទ្ធិមនុស្សដែលមានស្រាប់។
កន្លងមក អាមេរិកបានរិះគន់ធ្ងន់ៗចំពោះរបាយការណ៍សិទ្ធិមនុស្សរបស់ចិនរួមទាំងនៅតំបន់ទីបេ និងស៊ីនជាំង ក៏ប៉ុន្តែចិនវាយបកវិញថា បញ្ហាទាំងអស់នេះគឺជាកិច្ចការផ្ទៃក្នុងខ្លួន ហើយអាមេរិក ឬប្រទេសលោកខាងលិចគ្មានសិទ្ធិត្រូវលូកដៃចូលនោះទេ៕ ដោយ៖ហួនឌីណា
ប្រភព៖ US backs right to peaceful protests in China
