ភ្នំពេញ៖ មន្រ្តីជាន់ខ្ពស់នៃស្ថានទូតជប៉ុនប្រចាំកម្ពុជាបានលើកឡើងថា ការធ្វើឱ្យប្រសើរឡើងនូវសុខភាពមាតា សុខភាពទារកទើបនឹងកើត និងកុមារ គឺជាការចាំបាច់ណាស់ក្នុងការសម្រេចបានគោលដៅអភិវឌ្ឍន៍ប្រកបដោយ ចីរភាពទី៣ គឺ សុខភាព និងសុខុមាលភាពមាំមួន។

លោក មិកាមិ ម៉ាសាហ៊ីរ៉ូ(Mikami Masahiro) ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា បានថ្លែងឡើងដូចនេះ ក្នុងពិធីផ្តល់បរិក្ខារសង្គ្រោះជីវិតដើម្បីគាំទ្រប្រព័ន្ធថែទាំសុខភាពកម្ពុជាដល់មជ្ឈមណ្ឌលជាតិគាំពារមាតានិងទារក (NMCHC) ដែលធ្វើឡើងនៅថ្ងៃទី៧ ខែធ្នូ ក្នុងស្ថានទូតជប៉ុន។
យោងតាមសេចក្តីប្រកាសព័ត៌មានរបស់ក្រសួងសុខាភិបាល មូលនិធិសហប្រជាជាតិសម្រាប់ប្រជាជន (UNFPA) និងស្ថានទូតជប៉ុនបានឱ្យដឹងថា រាជរដ្ឋាភិបាលជប៉ុន តាមរយៈ UNFPA បានប្រគល់សម្ភារសេវាឆ្មបចំនួន ២៩០កញ្ចប់ គ្រែសម្រាលចំនួន ១៥០គ្រែ ឧបករណ៍បូមទារកចេញមកក្រៅពេលសម្រាលចំនួន ៥០ឈុត និងឧបករណ៍បច្ចេកវិទ្យាទំនាក់ទំនងព័ត៌មាន សម្រាប់ការសិក្សាតាមរយៈអេឡិចត្រូនិក ជូនដល់មជ្ឈមណ្ឌលជាតិគាំពារមាតានិងទារក។

លោក Mikami Masahiro មានប្រសាសន៍ថា ៖ «រាជរដ្ឋាភិបាលជប៉ុន បានរួមចំណែកក្នុងការធ្វើឱ្យប្រសើរឡើងនូវ សុខភាពមាតា សុខភាពទារកទើបកើត និងកុមារ អស់រយៈពេលជាយូរមកហើយ។ ទោះបីជាអត្រាមរណភាពទារកទើប កើតក្នុងប្រទេសកម្ពុជាកំពុងតែប្រសើរឡើងក៏ដោយ ខ្ញុំយល់ថាស្ត្រីមានផ្ទៃពោះនិងទារកទើបកើត នៅតែមានការ លំបាកក្នុងការទទួលបានការថែទាំសុខភាពគ្រប់គ្រាន់ ជាពិសេសសនៅតាមតំបន់ដាច់ស្រយាល»។

លោកឯកអគ្គរាជទូតយល់ឃើញថា ការបន្តធ្វើឱ្យកាន់តែប្រសើរឡើងនៃផ្នែកនេះ គឺចាំបាច់ណាស់ក្នុងការសម្រេចបានគោលដៅអភិវឌ្ឍន៍ប្រកបដោយ ចីរភាពទី៣ (សុខភាពនិងសុខុមាលភាពសម្រាប់ទាំងអស់គ្នា) ហើយលោកពិតជាសោមនស្សក្រៃលែងដែលបានរួមចំណែកក្នុងវិស័យនេះ ដោយផ្តល់បរិក្ខារទាំងនេះតាម រយៈគម្រោងរបស់ UNFPA នាពេលនេះ។

ជាមួយគ្នានោះ ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល បានថ្លែងអំណរគុណដល់រដ្ឋាភិបាល និងប្រជាជនជប៉ុន ដែលតែងតែសម្របសម្រួលជំនួយឥតសំណងទាំងបច្ចេកទេស និងថវិកាជាច្រើនជូនរាជរដ្ឋាភិបាលកម្ពុជា ក្នុងការពង្រឹងវិស័យសុខាភិបាលកម្ពុជា ក៏ដូចជាវិស័យសំខាន់ៗមួយចំនួនទៀត។

ឯកឧត្តមបានថ្លែងថា ៖ «រដ្ឋាភិបាលជប៉ុន និងអង្គការ UNFPA ដែលតែងតែផ្ដល់ការគាំ ទ្រដល់វិស័យសុខាភិបាលកម្ពុជា ហើយអង្គការ UNFPA បានចូលរួមចំណែកយ៉ាងធំធេងក្នុងការធ្វើឱ្យបានសម្រេចគោលដៅអភិវឌ្ឍន៍សហសវត្សរ៍ផងដែរ»។

តំណាងប្រចាំប្រទេសរបស់ UNFPA នៅកម្ពុជា លោកស្រី សាន់ដ្រា ប៊ីនខ្លាវ ក៏បានលើកឡើងផងដែរថា បរិក្ខារសង្គ្រោះ ជីវិតនេះ រួមចំណែកដល់ការសម្រេចមហិច្ឆតារបស់ក្រសួងសុខាភិបាលក្នុងការធានាថាស្រ្តីគ្រប់រូបទទួលបាននូវការគាំទ្រ និងការថែទាំដែលពួកគេត្រូវការចាំបាច់ក្នុងពេលសម្រាលកូនដោយសុវត្ថិភាព។

លោកស្រីថា ដំណាលគ្នានឹងការបណ្តុះបណ្តាលសម្រាប់គុណភាពថែទាំ បរិក្ខារនេះ គឺជាគន្លឹះឆ្ពោះទៅការកសាងប្រព័ន្ធថែទាំសុខភាពដែលមាន ភាពធន់ និងឆ្លើយតប ដែលមនុស្សគ្រប់រូបអាចទទួលបាននូវការថែទាំប្រកបដោយគុណភាព និងមិនទុកនរណា ម្នាក់ចោលឡើយ ជាពិសេសក្នុងពេលសម្រាលកូន។

លោកសាន់ដ្រា ប៊ីនខ្លាវ បានគូសបញ្ជាក់ថា ៖ «យើងសូមកោតសរសើរចំពោះដៃគូរបស់យើង រដ្ឋាភិបាល ជប៉ុន និងរាជរដ្ឋាភិបាលកម្ពុជាក្នុងការធ្វើការរួមគ្នាដើម្បីសម្រេចបានគោលដៅរួមទាំងអស់នេះ»។

បើតាមក្រសួងសុខាភិបាល សម្ភារបរិក្ខារវេជ្ជសាស្ត្រជាសារវ័ន្តសម្រាប់ការថែទាំ សម្រាលបន្ទាន់ នឹងត្រូវបានប្រគល់បន្តទៅដល់មូលដ្ឋាន សុខាភិបាលសាធារណៈ ដើម្បីចូលរួមចំណែកបន្ថែមដល់ឆ្មបនិងអ្នកផ្តល់សេវាសុខាភិបាលប្រើប្រាស់សង្គ្រោះ ជីវិតស្ត្រីនិងទារកបានទាន់ពេល។

ឃីតសម្រាប់ឆ្មប មានឧបករណ៍ចាំបាច់ក្នុងជួយដល់ការសម្រាលទារក បរិក្ខារ សង្គ្រោះជីវិតមួយ គឺឧបករណ៍បូមពេលសម្រាល ដែលប្រើសម្រាប់សម្រួលដល់ការសម្រាលដែលមានរយៈពេលយូរ។ រថយន្តសង្គ្រោះគឺមានសារសំខាន់ក្នុងការបញ្ជូនស្ត្រីឬទារក ដែលស្ថិតក្នុងស្ថានភាពគំរាមកំហែងដល់អាយុជីវិត។ ឧបករណ៍ដែលមានប្រសិទ្ធិភាពក្នុងការរក្សាលំនឹងរបស់ស្ត្រីដែលធ្លាក់ឈាមធ្ងន់ធ្ងរ ខណៈដែលត្រូវបញ្ជូន ទៅមន្ទីរពេទ្យកម្រិតខ្ពស់ គឺខោបន្ថយស្នូក។

ទាក់ទងនឹងកិច្ចការងារឆ្មប រដ្ឋលេខាធិការក្រសួងសុខាភិបាល ឯកឧត្តម ធា គ្រុយ បានប្រាប់ឱ្យដឹងកាលពីថ្ងៃទី៥ ខែធ្នូកន្លងទៅនេះថា ឆ្មបត្រូវបំពេញតួនាទីជាអ្នកថែទាំ ទាំងម្ដាយ ទាំងទារក ដើម្បីធានាបានថា ពួកគេមានសុវត្ថិភាព និងមានសុខភាពល្អ។

លោកថា ៖ «កិច្ចការឆ្មបមិនមែនកិច្ចការធម្មតាទេ ឆ្មបត្រូវតែមាំទាំយល់ដឹងជំនាញនេះឱ្យច្បាស់មែនទែន ត្រូវប្រយ័ត្នប្រយែងក្រែងមានបញ្ហា កុំធ្វើលើសពីជំនាញ ហើយឆ្មបមិនមែនជាអ្នករកស៊ីទេតែជាអ្នកផ្ដល់សេវាចាំបាច់ដល់ស្ត្រីមាតានិងទារក សូមមេត្តាកុំច្រឡំថា វាជាមុខរបរជំនួញ»៕
ដោយ៖នាង សុគន្ធា