ម៉ូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន និងសមភាគី អេមីរ៉ាតអារ៉ាប់រួម (UAE) ព្រះអង្គម្ចាស់ ម៉ូហាំម៉ាត់ ប៊ីន ហ្សាយីដ អាល់ ណាយ៉ាន បានធ្វើកិច្ចពិភាក្សាអំពីការពង្រឹងកិច្ចសហ ប្រតិបត្តិការរវាងប្រទេសទាំងពីរ នៅក្នុងការសន្ទនាគ្នាតាម ទូរស័ព្ទក្នុងថ្ងៃពុធទី០៧ ខែធ្នូ ឆ្នាំ២០២២។

វិមានក្រឹមឡាំងបានបញ្ជាក់នៅក្នុងសេចក្តីថ្លែងការណ៍មួយថា មេដឹកនាំទាំងពីរបានយកចិត្តទុកដាក់ជាពិសេស ចំពោះការលើក កម្ពស់កិច្ចសហប្រតិបត្តិការពាណិជ្ជកម្ម និងសេដ្ឋកិច្ច រួមទាំងក្នុង វិស័យ ដឹកជញ្ជូន ភស្តុភារ និងថាមពល។

បើតាមសេចក្តីថ្លែងការណ៍ខាងលើនេះ លោក ពូទីន និងព្រះអង្គ ម្ចាស់ អាល់ ណាយ៉ាន បានកត់សម្គាល់ការងាររួមគ្នាប្រកប ដោយប្រសិទ្ធភាពនៅក្នុងយន្តការ OPEC+ ដើម្បីធានាស្ថិរភាព នៃទីផ្សារប្រេងពិភពលោក។

បន្ថែមលើនេះ ប្រធានាធិបតីទាំងពីរក៏បានផ្លាស់ប្តូរទស្សនៈ គ្នាជុំវិញការប៉ុនប៉ងរបស់ប្រទេសលោកខាងលិចមួយចំនួន ក្នុងការដាក់កំហិតប្រឆាំងនឹងតម្លៃទីផ្សារប្រេងឆៅរបស់រុស្ស៊ី ដែលផ្ទុយនឹងគោលការណ៍ពាណិជ្ជកម្មពិភពលោក៕
ប្រភព៖ ស៊ីនហួរ ដោយ៖ ទីណា និងបុត្រា