ខេត្តកំពង់ធំ ៖ សាខាកាកបាទក្រហមកម្ពុជា ខេត្តកំពង់ធំ បានរៀបចំពិធីប្រគល់-ទទួលផ្ទះថ្មីចំនួន ៣ខ្នង ជូនប្រជាពលរដ្ឋរងគ្រោះដោយខ្យល់កន្ត្រាក់ និងងាយរងគ្រោះបំផុតចំនួន ៣គ្រួសារ រស់នៅស្រុកកំពង់ស្វាយ ខេត្តកំពង់ធំ ដែលពិធីនេះប្រព្រឹត្តទៅក្រោមអធិបតីភាព លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា នាថ្ងៃទី ៧ ខែធ្នូ ឆ្នាំ២០២២ ។

លោកជំទាវ អគ្គលេខាធិការរងទី១ បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងការគិតគូរពីជីវភាពរស់នៅរបស់បងប្អូនប្រជាពលរដ្ឋ ជាពិសេសថ្លែងអំណរគុណយ៉ាងជ្រាលជ្រៅចំពោះសាខាកាកបាទក្រហមកម្ពុជា ខេត្តកំពង់ធំ ដែលបានយកចិត្តទុកដាក់ជួយសាងសង់ផ្ទះជូនប្រជាពលរដ្ឋងាយរងគ្រោះបំផុតជាបន្តបន្ទាប់ និងជួយសម្រាលការលំបាកដល់ប្រជាពលរដ្ឋដូចភ្លៀងរលឹម។

សូមបញ្ជាក់ថា ផ្ទះនីមួយៗ មានទំហំ ៤ម៉ែត្រ គុណនឹង ៦ម៉ែត្រ, ក្រាលការ៉ូ, ជញ្ជាំងក្តារ និងស័ង្កសី, ដំបូលប្រក់ស័ង្កសី ដែលចំណាយថវិកាតម្លៃ ១១.៥៥០.០០០រៀល ត្រូវបានផ្តល់ជូនគ្រួសារទី១ ផ្ទះលេខរៀងទី៩៧ ឈ្មោះ យ៉ែម ថន អាយុ ៥៧ឆ្នាំ ស្ត្រីមេម៉ាយចិញ្ចឹមចៅកំព្រា ២នាក់ក្នុងបន្ទុក។ គ្រួសារទី២រងគ្រោះដោយខ្យល់កន្ត្រាក់ ផ្ទះលេខរៀងទី១០០ ជូនលោកយាយ តឹង ងុន អាយុ ៧០ឆ្នាំ មានកូន ៤នាក់ (កូនស្រីម្នាក់មានសតិមិនគ្រប់)។ គ្រួសារទី៣ រងគ្រោះដោយខ្យល់កន្ត្រាក់ ផ្ទះលេខរៀងទី១០២ ជូនលោកយាយ អ៊ុង ចាម អាយុ ៧២ឆ្នាំ រស់នៅពីរនាក់បងប្អូន។

ជាមួយគ្នានេះ អំណោយផ្តល់ជូនម្ចាស់ផ្ទះនីមួយៗរួមមាន ៖ អង្ករ, មី, ត្រីខ, ទឹកត្រី, ទឹកស៊ីអ៊ីវ, ទឹកផ្លែឈើ, សម្ភារចានឆ្នាំង, សារុង ក្រមា មុង ភួយ, កន្ទេល , ធុងចម្រោះទឹក និងថវិកាមួយចំនួន៕ ដោយ / គ្រី សម្បត្តិ