បាដាស៊េរី បេហ្គាវ៉ាន់៖ ប្រ៊ុយណេបានកត់ត្រាពីកំណើននៃការមកដល់ និងការចាកចេញរបស់ជើងហោះហើរតាមផ្លូវអាកាស ចាប់ពីខែមករា ដល់ខែតុលា ឆ្នាំ២០២២នេះ ជាមួយនឹងសកម្មភាពហោះហើរចំនួន ៤,៧៣២លើក បើធៀបនឹងចំនួន ២,១៣៥លើកក្នុងរយៈពេលដូចគ្នាកាលពីឆ្នាំ២០២១។

រដ្ឋមន្ត្រីក្រសួងដឹកជញ្ជូន និងគមនាគមន៍ លោក Dato Seri Setia Shamhary បាននិយាយនៅក្នុងសាររបស់គាត់ នៅក្នុងទិវាអាកាសចរណ៍ស៊ីវិលអន្តរជាតិ ដែលប្រព្រឹត្តទៅនៅថ្ងៃពុធសប្តាហ៍នេះថា ចលនាអ្នកដំណើរក៏បានកត់ត្រានូវកំណើនយ៉ាងខ្លាំង ជាមួយនឹងចំនួនអ្នកដំណើរសរុប ៣៧៥,៤១៧នាក់ក្នុងរយៈពេល១០ខែ ឆ្នាំ២០២២ បើធៀបនឹងចំនួន ៣៦,១០៧នាក់ក្នុងរយៈពេលដូចគ្នាកាលពីឆ្នាំមុន។

លោករដ្ឋមន្ត្រីបន្ថែមថា ការដឹកជញ្ជូនទំនិញមានចំនួន៩,២៣៥តោនក្នុងរយៈពេល១០ខែឆ្នាំនេះ ដែលកើនឡើង១៦.៣ភាគរយ បើធៀបនឹងឆ្នាំមុន សម្រាប់រយៈពេលដូចគ្នានេះ។

សូមជម្រាបផងដែរថា ទិវាអាកាសចរណ៍ស៊ីវិលអន្តរជាតិត្រូវបានប្រារព្ធឡើងជារៀងរាល់ថ្ងៃទី៧ ខែធ្នូ ចាប់តាំងពីឆ្នាំ១៩៩៤ នៅទូទាំងពិភពលោក ដើម្បីរំលឹកដល់ការបង្កើតអង្គការអាកាសចរណ៍ស៊ីវិលអន្តរជាតិ ដែលជាស្ថាប័នអង្គការសហប្រជាជាតិ ទទួលបន្ទុករក្សាស្តង់ដារពិភពលោក សម្រាប់សុវត្ថិភាពអាកាសចរណ៍៕

ប្រភព៖ ស៊ីនហួរ ដោយ៖ ទីណា និងបុត្រា