ហាណូយ៖ រដ្ឋាភិបាលវៀតណាមគ្រោងនឹងបញ្ជូនមន្ត្រីអាយុក្រោម ៤៥ ឆ្នាំពី ១៨០ ទៅ ២០០ នាក់ទៅបរទេស សម្រាប់ទទួលការបណ្តុះបណ្តាលនៅឆ្នាំ២០២៥។

កម្មវិធីនេះសម្រាប់មនុស្សក្នុងមុខតំណែង ដូចជា អនុប្រធានក្រុមប្រឹក្សាប្រជាជន និងគណៈកម្មាធិការប្រជាជន។ ជារៀងរាល់ឆ្នាំ នឹងមានវគ្គបណ្តុះបណ្តាលចំនួន ៤ ដងក្នុងរយៈពេល ២ សប្តាហ៍ ជាមួយនឹងមន្ត្រីចន្លោះ ពី ១៥ ទី១៧ នាក់ ដែលចេញទៅក្រៅប្រទេសម្តងៗទៅកាន់ប្រទេសជប៉ុន បារាំង និងប្រទេសអភិវឌ្ឍន៍ផ្សេងទៀត។

វគ្គបណ្តុះបណ្តាលនេះ ត្រូវបានគេរំពឹងថា នឹងជួយមន្ត្រីធ្វើឱ្យប្រសើរឡើងនូវការបង្កើតគោលនយោបាយ ភាពជាអ្នកដឹកនាំ និងសមត្ថភាពការងាររបស់ពួកគេ ក្រៅពីការទទួលបានបទពិសោធន៍ផ្ទាល់ពីវិធីសាស្រ្តការងារនៅក្នុងប្រទេសអភិវឌ្ឍន៍។

រដ្ឋាភិបាលបានធ្វើផែនការនេះ បន្ទាប់ពីការិយាល័យនយោបាយរបស់បក្សកុម្មុយនិស្ត កាលពីខែកក្កដា បានកំណត់គោលដៅឱ្យវៀតណាមបញ្ជូនមន្ត្រីប្រហែល ៤០០ នាក់ទៅបរទេសដើម្បីបណ្តុះបណ្តាលជារៀងរាល់ឆ្នាំ នៅឆ្នាំ២០២៥ និងប្រហែល ៥០០ នាក់ក្នុងមួយឆ្នាំ នៅចន្លោះរវាងឆ្នាំ ២០២៦ និង ២០៣០៕ ប្រភពពី VNexpress, ដោយ៖ សារ៉ាត