ភ្នំពេញ៖ ក្រុមការងារអនុសាខាកាកបាទក្រហមកម្ពុជា ខណ្ឌ៧មករា ដឹកនាំដោយ លោក ឌី រ័ត្នខេមរុណ អភិបាលរង ខណ្ឌ៧មករា និង ជាប្រធានគណៈកម្មាធិការអនុសាខាកាកបាទក្រហម ខណ្ឌ៧មករា បានចុះសាកសួរសុខទុក្ខ និង នាំយកអំណោយមនុស្សធម៌ រួមទាំងរទេះពិការ ជូនដល់គ្រួសារមានជំងឺស្វិតដៃជើងចំនួន ២គ្រួសារ ក្នុងសង្កាត់អូរឬស្សី២ ខណ្ឌ៧មករា រាជធានីភំ្នពេញ នាថ្ងៃទី ១៣ ខែមករា ឆ្នាំ២០២៣ ។

លោក ឌី រ័ត្នខេមរុណ បានពាំនាំនូវការផ្តាំផ្ញេីសាកសួរសុខទុក្ខពី លោក ថេង សុថុល ប្រធានកិត្តិយស អនុសាខាកាកបាទក្រហមខណ្ឌ៧មករា រួមទាំងថ្នាក់ដឹកនាំខណ្ឌទាំងមូល និងជាពិសេសពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ប្រជាពលរដ្ឋទាំង ២គ្រួសារ ព្រមទាំងលេីកទឹកចិត្តឱ្យបន្តយកចិត្តទុកដាក់ថែរក្សាសុខភាព អនាម័យ ក្នុងការហូបចុក ត្រូវហូបទឹកឆ្អិន អាហារអោយមានអនាម័យ ជៀសវាងការឆ្លងជំងឺអាសន្នរោគផ្សេងៗ និង ខិតខំប្រឹងប្រែងបន្តរស់នៅ ដោយកំុគិតពីការតូចចិត្តក្នុងពិការភាពបច្ចុប្បន្នតែត្រូវគិតថាទោះពិការក៏នៅមានអាជ្ញាធរមូលដ្ឋាននៅចាំដោះស្រាយជីវភាពរបស់បងប្អូននៅមូលដ្ឋានជាប់ជាប្រចាំនិងត្រូវគិតថាយើងពិការតែកាយ បេះដូង និង ចិត្ត មិនពិការនោះទេ ។ ទន្ទឹមនឹងនេះដែរ លោក ឌី រ័ត្នខេមរុណ បានអំពាវនាវដល់ប្រជាពលរដ្ឋទាំងអស់ បន្តយកចិត្តទុកដាក់ និងអនុវត្តនូវវិធានការ ៣ការពារ ៣កុំ និងទៅចាក់វ៉ាក់សាំងដូសជម្រុញអោយបានគ្រប់ៗគ្នា។

អំណោយមនុស្សធម៌ដែលនាំយកមកប្រគល់ជូនទាំង ២គ្រួសារ ក្នុងមួយគ្រួសារទទួលបាន អង្ករ មី ទឹកសុទ្ធ ទឹកសុីអុីវ ទឹកត្រី ថវិកាមួយចំនួន រួមទាំង រទេះពិការ ១គ្រឿងផងដែរ ៕ ដោយ / គ្រី សម្បត្តិ