(ភ្នំពេញ)៖ ក្រសួងអប់រំ យុវជន និងកីឡា បានចេញសេចក្តីណែនាំបន្ថែម ដើម្បីលើកកម្ពស់ប្រសិទ្ធភាព និងភាពរលូននៃព្រឹត្តិការណ៍ ការប្រកួតស្នាដៃគំនូរកុមារគាំទ្រយុទ្ធនាការ Beyond The Games ក្រោមមូលបទ «បេះដូងលោតក្នុងចង្វាក់តែមួយ» ដែលមានការចូលរួមពីសិស្សានុសិស្ស ដែលកំពុងសិក្សានៅគ្រឹះស្ថានសិក្សាសាធារណៈ និងឯកជនទាំងអស់ ចាប់ពីថ្នាក់ទី១ ដល់ទី៦ នៅទូទាំងប្រទេសកម្ពុជា។

នៅក្នុងសេចក្ដីណែនាំបន្ថែម របស់ក្រសួងអប់រំ ដែលបានចេញសេចក្តីណែនាំនៅថ្ងៃទី៣១ ខែមករា ឆ្នាំ២០២៣នេះ មានខ្លឹមសារដូចនេះថា៖

• តួនាទីគណៈគ្រប់គ្រងនៃគ្រឹះស្ថានបឋមសិក្សា
  ១៖ ផ្សព្វផ្សាយ និងជំរុញឱ្យសិស្សានុសិស្សដែលមានទេពកោសល្យផ្នែកសិល្បៈគំនូរ បានចូលរួមគូរគំនូរតាមប្រធានបទណាមួយក្នុងចំណោមប្រធានបទទាំង៣ មានដូចជា . សេចក្ដីស្រឡាញ់រួមគ្នាសម្រាប់ប្រទេសជាតិនិងមាតុភូមិ។ . ស្មារតីកីឡា នាំមកនូវសុខភាព មិត្តភាព និងសាមគ្គីភាព។ ៣. កីឡាដែលប្អូនចូលចិត្ត និងការប្រកួតកីឡាស៊ីហ្គេមនិងប៉ារ៉ាហ្គេម ។
  ២៖ រៀបចំទីតាំងថ្នាក់រៀន ឬបន្ទប់បណ្ណាល័យសមស្របដែលសិស្សានុសិស្សអាចអង្គុយគូរគំនូរ និងផ្តល់លទ្ធភាព និងមធ្យោបាយ (ក្រដាសគូររូប ខ្មៅដៃពណ៍ទឹកថ្នាំពណ៍ បន្ទាត់ ជ័រលុប ) តាមលទ្ធភាពជាក់ស្តែង ជូនដល់សិស្សានុសិស្សដែលត្រូវការចាំបាច់
  ៣៖ សហការប្រមូលកិច្ចការគំនូរ និងជ្រើសរើសគំនូរដែលសមស្របតាមអត្ថន័យ និងខ្លឹមសារនៃប្រធានបទទាំង៣ របស់ព្រឹត្តិការណ៍ការប្រកួតស្នាដៃគំនូរកុមារ ចំនួន៣ ឬ៥ផ្ទាំង ក្នុងប្រធានបទនីមួយៗ ឬតាមការចាំបាច់ ដើម្បីប្រគល់ជូនការិយាល័យអប់រំ យុវជន និងកីឡា នៃរដ្ឋបាលក្រុង-ស្រុក-ខណ្ឌ តាមកាលបរិច្ឆេទកំណត់
  ៤៖ ពិនិត្យលទ្ធភាពជាក់ស្តែង ក្នុងការផ្តល់លិខិតសរសើរ ឬរង្វាន់លើកទឹកចិត្ត ជូនដល់សិស្សានុសិស្សដែលបានចូលរួមក្នុងព្រឹត្តិការណ៍ការប្រកួតស្នាដៃគំនូរកុមារ។
• តួនាទីលោកគ្រូ អ្នកគ្រូ តាមថ្នាក់រៀន
  ១៖ ពន្យល់ពីអត្ថន័យនៃប្រធានបទនីមួយៗ បណ្តុះផ្នត់គំនិត និងបញ្ជ្រាបការយល់ដឹងដល់សិស្សានុសិស្ស ឱ្យបានទូលំទូលាយបន្ថែមទៀត ពាក់ព័ន្ធភាពជាម្ចាស់ផ្ទះរបស់ព្រះរាជាណាចក្រកម្ពុជាសម្រាប់ព្រឹត្តិការណ៍ប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ដែលជាព្រឹត្តិការណ៍ប្រវត្តិសាស្ត្រនៃព្រះរាជាណាចក្រកម្ពុជា ក្នុងរយៈពេលជាង៦០ឆ្នាំកន្លងមកនេះ។
  ២៖ ណែនាំបន្ថែមដល់សិស្សានុសិស្ស នូវចំណុចសំខាន់នៃពាក្យថា «លើសពីការប្រកួតកីឡា» គឺលើសពីការដណ្តើមយកចាញ់-ឈ្នះ ក្នុងទីលានប្រកួតកីឡា ប៉ុន្តែសិស្សានុសិស្សនិងប្រជាពលរដ្ឋគ្រប់រូប អាចចូលរួមក្នុងស្មារតី «បេះដូងលោតក្នុងចង្វាក់តែមួយ» ដើម្បីបង្ហាញសេចក្តីស្រឡាញ់ចំពោះជាតិនិងមាតុភូមិ
  ៣៖ រៀបចំពេលវេលាដើម្បីឱ្យសិស្សអាចគូររូបនេះនៅក្នុងថ្នាក់រៀន ហើយបំផុសសិស្សានុសិស្សឱ្យបន្តគូររូបនេះនៅផ្ទះរៀងៗខ្លួន ដោយមានការជួយកែលម្អ និងផ្តល់គំនិតបន្ថែមពីមាតាបិតានិងអាណាព្យាបាល
  ៤៖ លើកទឹកចិត្តឱ្យមាតាបិតានិងអាណាព្យាបាល ជួយផ្សព្វផ្សាយសកម្មភាពគូររូប របស់កុមារ នៅលើបណ្តាញទំនាក់ទំនងសង្គម តាមគ្រប់លទ្ធភាព៕​ ដោយ-រ៉ាវុធ