ថៃ៖ អាជ្ញាធរថៃប្រកាសថា កំហាប់ខ្យល់អាក្រក់កើនឡើងនៅទីក្រុង បាងកក ដែលជាសញ្ញាឱ្យប្រជាពលរដ្ឋគួរប្រុងប្រយ័ត្នចំពោះបញ្ហា សុខភាព។នេះបើតាមការបញ្ជាក់របស់រដ្ឋបាលក្រុងបាងកកកាល ពីថ្ងៃទី០១ខែកុម្ភៈឆ្នាំ២០២៣។

ប្រភពពីប្រទេសថៃឱ្យដឹងថា សន្ទស្សន៍គុណភាពខ្យល់(AQI) នៅទី ក្រុងបាងកកឡើងដល់១៦៦ ដែលជាតួរលេខមួយបង្ហាញថា បរិយាកាស នៅទីនោះមានកំហាប់ខ្យល់ពុល PM2.5 កម្រិតខ្ពស់។
តាមការស្រាវជ្រាវផ្នែកបរិស្ថានបង្ហាញថា បើសិនជាសន្ទស្សន៍ គុណភាពខ្យល់ (AQI)លើស១០០បានន័យថា បរិយាកាស នៅ តំបន់នៅស្ថិតនៅក្នុងកម្រិតមិនល្អ បើសន្ទស្សន៍គុណភាពខ្យល់ (AQI)លើសពី២០០បានន័យថា បរិយាកាសនៅតំបន់ នោះមាន កម្រិតអាក្រក់ ខណៈដែលសន្ទស្សន៍គុណភាពខ្យល់ (AQI)ឡើង ដល់៣០០នោះបានន័យថាជាសញ្ញាអាសន្នសម្រាប់សុខមាលភាពមនុស្សសត្វឬកម្រិតគ្រោះថ្នាក់។

ចំពោះកំហាប់PM2.5 ជាទម្រង់នៃការបំពុលខ្យល់ដែល អាក្រក់ បំផុត ដែលមានន័យថា គឺជាការរកឃើញនូវភាគល្អិតតូចនៅក្នុង បរិយាកាសដែលមានអង្កត់ផ្ចិតត្រឹម២,៥មីក្រូម៉ែត្រឬមានន័យថាបរិយាកាសនៅតំបន់នោះ សម្បូរទៅដោយភាគល្អិតដែលតូចៗ ទំហំ ប៉ុន៣០ភាគរយនៃសរសៃសក់របស់មនុស្សយើង។ ភាគល្អិតទាំងអស់នេះងាយជ្រាបចូលទៅក្នុងសួតឬចូលទៅក្នុងចរន្ដឈាម។
អ្នកវិទ្យាសាស្ត្រព្រមានថា បើសិនជាមនុស្សស្រូបយកកំហាប់ PM2.5កាន់តែយូរនឹងអាចបណ្ដាលឱ្យកើតជំងឺសរសៃឈាមបេះដូង ជំងឺផ្លូវដង្ហើម និងមហារីកជាដើម។

អភិបាលក្រុងបាងកក លោក Chadchart Sittipunt បាន ព្រមាន សាធារណជនអំពីខ្យល់អាកាសមិនល្អ ដោយជំរុញឱ្យ ប្រជាជនតាមដានសុខភាពប្រសិនបើពួកគេលំបាកដកដង្ហើម ក្រហាយភ្នែក ឬក្អកជាដើម។លោកក៏ព្រមានឱ្យមនុស្សកាត់បន្ថយសកម្មភាពក្រៅផ្ទះ ឬ ពាក់ម៉ាស់ពេលចេញទៅក្រៅផ្ទះ។

ការិយាល័យទំនាក់ទំនងសាធារណៈនៃរដ្ឋបាលក្រុងបាងកក (BMA)បញ្ជាក់ថា ៖«អភិបាលក្រុង លើកទឹកចិត្តសាធារណជន ឱ្យធ្វើការពីផ្ទះ និងប្រើប្រាស់ការដឹក ជញ្ជូនសាធារណៈ។ទីក្រុងបាងកក និងខេត្តនៅជិតៗនេះ អាចថានឹងជួបប្រទះនូវខ្យល់ អាកាសមិនល្អចាប់ពីថ្ងៃពុធដល់ថ្ងៃសៅរ៍»។
អាជ្ញាធរថៃព្រមានទៀតថា ក្រុមដែលងាយរងគ្រោះដោយសារខ្យល់ ពុលនេះមានកុមារតូចៗ ស្ត្រីមានផ្ទៃពោះនិងមនុស្សចាស់។អាជ្ញាធរស្នើឱ្យក្រុមមនុស្សទាំងអស់នេះពាក់ម៉ាស់ដែលមានសមត្ថភាពចម្រោះជាតិពុល PM2.5៕
ដោយ៖វណ្ណ ស័ក្ដិ