(ភ្នំពេញ)៖ រថយន្តទេសចរណ៏ ៥៤គ្រឿង រថយន្តដឹកអ្នកដំណើរ ២៦គ្រឿង និងទោចក្រយានយន្ត ៨៥គ្រឿង សរុបចំនួន ១៦៥គ្រឿង ដែលបើកឆ្លងកាត់តាមកំណាត់ផ្លូវជាតិលេខ៥ ក្នុងភូមិផ្សារតូច សង្កាត់ទួលសង្កែ១ ខណ្ឌឫស្សីកែវ ថ្ងៃទី២១ ខែសីហា ឆ្នាំ២០១៩ យប់មិញនេះ ត្រូវបានអាជ្ញាធរមានសមត្ថកិច្ចចម្រុះ ដាក់ប៉ុស្ដិ៍ឃាត់ត្រួតពិនិត្យជាបន្តបន្ទាប់ ដើម្បីបង្ក្រាបរាល់បទល្មើសផ្សេងៗ ក្នុងយុទ្ធនាការត្រួតពិនិត្យអាវុធជាតិផ្ទុះ តាមផែនការរបស់សាលារាជធានីភ្នំពេញ ក្នុងការរក្សាសន្តិសុខ សវត្ថិភាពជូនប្រជាពលរដ្ឋ។

បើតាមការបញ្ជាក់ឲ្យដឹងពីលោក ជា ពិសី ប្រធានគណៈបញ្ជាការឯកភាពខណ្ឌឫស្សីកែវ និងជាសមាជិកក្រុមលេខាសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ចំពោះផែនការរួម ក្នុងយុទ្ធនាការត្រួតពិនិត្យអាវុធជាតិផ្ទុះ ដើម្បីបង្ក្រាបរាល់បទល្មើសផ្សេងៗ ដែលជាផែនការរបស់គណៈបញ្ជាការឯកភាពរាជធានីភ្នំពេញ ក្នុងការធានារក្សាសន្តិសុខ សវត្ថិភាព ជូនប្រជាពលរដ្ឋ អាចដំណើរការទៅបានដោយរលូន ដោយសារមានកិច្ចសហការល្អពី កម្លាំងនគរបាលខណ្ឌ ប៉ុស្ដិ៍ អាវុធហត្ថ អាជ្ញាធរសង្កាត់ ភូមិ និងមន្ត្រីពាក់ព័ន្ធ សរុបចំនួន ៦៣នាក់ ដឹកនាំផ្ទាល់ដោយលោក ប្រាជ្ញ សីហា អភិបាលរងខណ្ឌ។

លោក ជា ពិសី បានគូសបញ្ជាក់ថា ផែនការរួម ចំពោះការដាក់ប៉ុស្ដិ៍លើមធ្យោបាយធ្វើដំណើរ មានរថយន្ដ និងម៉ូតូ គឺត្រូវអនុវត្តឡើងជាប្រចាំ ក្នុងយុទ្ធនាការត្រួតពិនិត្យអាវុធជាតិផ្ទុះ ក្នុងគោលបំណងបង្ក្រាបរាល់បទល្មើសទាំងឡាយ ដែលអាចកើតមានឡើង ជាយថាហេតុ ឈានទៅរកការកាត់បន្ថយបទល្មើសផ្សេងៗ ដើម្បីរក្សាសន្តិសុខ សុវត្ថិភាពជូនប្រជាពលរដ្ឋ។

លោកអភិបាលខណ្ឌបន្តថា ក្រៅពីបន្តដាក់ប៉ុស្ដិ៍ត្រួតពិនិត្យអាវុធជាតិផ្ទុះ លើរថយន្តទេសចរណ៏ ៥៤គ្រឿង រថយន្តដឹកអ្នកដំណើរ ២៦គ្រឿង និងទោចក្រយានយន្ត ៨៥គ្រឿង សរុបចំនួន ១៦៥គ្រឿង និងរកឃើញអាវុធខ្លី១ដើម ដែលមានលិខិតស្នាមត្រឹមត្រូវ, កម្លាំងចម្រុះរបស់គណៈបញ្ជាការឯកភាពខណ្ឌ ក៍បានពង្រាយកម្លាំងបន្ថែម ជាច្រើនទៀត ក្នុងការចុះយាមល្បាតនៅតាមច្រកផ្លូវតូច-ធំ នៃមូលដ្ឋានសង្កាត់ទាំង៧ផងដែរ ប៉ុន្ដែគ្មានគួរឲ្យកត់សម្គាល់នោះទេ ពោលគឺប្រកបដោយសន្តិសុខ សុវត្ថិភាពល្អ សម្រាប់ការរស់នៅរបស់ប្រជាពលរដ្ឋ៕ ដោយ ហាស់ កំសាន្ដ