(ប្រទេសហ្វីលីពីន)៖ តាមរយៈការអញ្ជើញរបស់ លោក Michael Galicia Aguinaldo ប្រធាននៃគណៈកម្មាធិការប្រកួតប្រជែងហ្វីលីពីន (PCC) នាថ្ងៃទី២៣ ខែមីនា ឆ្នាំ២០២៣ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា «គ.ប.ក.» បានដឹកនាំសមាជិកនៃ គ.ប.ក. និងមន្ត្រីជាន់ខ្ពស់នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ទៅទស្សនកិច្ចសិក្សារយៈពេល២ថ្ងៃ នៅការិយាល័យ PCC នៅទីក្រុងខេហ្សុន ប្រទេសហ្វីលីពីន ចាប់ពីថ្ងៃទី ២៣ ដល់ ២៤ ខែមីនា ឆ្នាំ២០២៣។

តាមរយៈការគាំទ្រពីគម្រោង COMPETE ដំណាក់កាលទី២ របស់ទីភា្នក់ងារ GIZ ដំណើរទស្សនកិច្ចសិក្សានេះមានគោលបំណងជួយដល់ គណៈកម្មាធិការប្រកួតប្រជែងកម្ពុជា «គ.ប.ក.» ដើម្បីទទួលបានការយល់ដឹងកាន់តែប្រសើរអំពីការរៀបចំស្ថាប័ន និងឧត្តមានុវត្តន៍កន្លងមករបស់ គណៈកម្មាធិការប្រកួតប្រជែងហ្វីលីពីន (PCC) ជាពិសេសលើការអនុវត្តច្បាប់ស្ដីពីការប្រកួតប្រជែង និងការបង្កើនកិច្ចសហប្រតិបត្តិការទ្វេភាគីរវាង គណៈកម្មាធិការប្រកួតប្រជែងកម្ពុជា «គ.ប.ក.» និងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» ជាមួយ គណៈកម្មាធិការប្រកួតប្រជែងហ្វីលីពីន (PCC) ផងដែរ។

ក្នុងឱកាសនោះ ឯកឧត្តមរដ្ឋមន្រ្តី បានថ្លែងនូវអំណរគុណយ៉ាងជ្រាលជ្រៅចំពោះទីភ្នាក់ងារសហប្រតិបត្តិការអាល្លឺម៉ង់ (GIZ) និងគណៈកម្មាធិការប្រកួតប្រជែងហ្វីលីពីន (PCC) ចំពោះកិច្ចសហការដ៏ល្អរបស់ស្ថាប័នទាំងពីរ ដែលនេះជាការរួមចំណែកយ៉ាងសំខាន់ក្នុងការអភិវឌ្ឍវិស័យប្រកួតប្រជែងនៅកម្ពុជា ជាពិសេសចំពោះការឆ្លើយតបទៅនឹងគន្លាតនៃការកសាងសមត្ថភាព ដើម្បីធានាឱ្យស្ថាប័នប្រកួតប្រជែងអាស៊ានអាចអភិវឌ្ឍជំនាញ និងសមត្ថភាពដែលចាំបាច់ សំដៅធ្វើឱ្យការអនុវត្តច្បាប់កាន់តែមានប្រសិទ្ធភាពខ្ពស់ ស្របតាមគោលដៅយុទ្ធសាស្ត្រទី២ នៃផែនការសកម្មភាពប្រកួតប្រជែងអាស៊ាន (ACAP 2025)។

ឯកឧត្តមរដ្ឋមន្ត្រី បន្តថា ក្នុងរយៈពេលនៃទស្សនកិច្ចសិក្សាចំនួន ២ថ្ងៃនេះ គណៈប្រតិភូកម្ពុជា មានឱកាសបានសិក្សាស្វែងយល់លើប្រធានបទ និងបញ្ហាសំខាន់ៗមួយចំនួន ដែលបានបកស្រាយដោយសមាជិកនៃគណៈកម្មាធិការ និងប្រធាននាយកដ្ឋានពាក់ព័ន្ធរបស់ PCC ក្នុងនោះរួមមាន៖
(១). ទិដ្ឋភាពទូទៅនៃរបបប្រកួតប្រជែងនៃសាធារណរដ្ឋហ្វីលីពីន
(២). រចនាសម្ព័ន្ធ និងតួនាទីរបស់ PCC
(៣). បទពិសោធន៍ក្នុងការរៀបចំស្ថាប័ន និងការរៀបចំផែនការយុទ្ធសាស្រ្តអនុវត្តច្បាប់របស់ PCC
(៤). ផែនទីសម្រាប់ការបង្កើតគោលនយោបាយស្ដីពីការប្រកួតប្រជែង
(៥). ការតស៊ូមតិ និងការចូលរួមពីភាគីពាក់ព័ន្ធ និង
(៦). នីតិវិធីរបស់ PCC ស្តីពីការអនុវត្តច្បាប់ស្តីពីការប្រកួតប្រជែង ការវិនិច្ឆ័យ និងការរួមបញ្ចូលគ្នានៃធុរកិច្ច។

ជាមួយគ្នានេះដែរ ប្រធានស្ថាប័នទាំងពីរនៃទីភ្នាក់ងារសហប្រតិបត្តិការអាល្លឺម៉ង់ (GIZ) និងគណៈកម្មាធិការប្រកួតប្រជែងហ្វីលីពីន (PCC) បានធ្វើការពិភាក្សាប្រកបដោយការយកចិត្តទុកដាក់ខ្ពស់លើវិធីសាស្រ្ដ និងមធ្យោបាយនានា ដើម្បីពង្រឹង និងពង្រីកបន្ថែមទៀតនូវកិច្ចសហប្រតិបត្តិការរវាងស្ថាប័នទាំងពីរ សំដៅបង្កើនផលប្រយោជន៍រួមគ្នា ក៏ដូចជាការទទួលបាននូវការរួបរួមគ្នាក្នុងតំបន់ផងដែរ៕ ដោយ ង៉ាន់ ទិត្យ