កូរ៉េខាងជើង៖ សមយុទ្ធអាមេរិក-កូរ៉េខាងត្បូង ជំរុញភាពតានតឹងឱ្យជិតធ្លាក់ទៅក្នុងសង្គ្រាមនុយក្លេអ៊ែរ
ព្យុងយ៉ាង៖ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍នៅថ្ងៃព្រហស្បតិ៍ទី ០៦ ខែមេសា ថា កូរ៉េខាងជើងបានចោទប្រកាន់សហរដ្ឋអាមេរិក និងកូរ៉េខាងត្បូង ថាជាដើមហេតុធ្វើឱ្យភាពតានតឹងក្នុងតំបន់ហៀបធ្លាក់ទៅក្នុងសង្រ្គាមនុយក្លេអ៊ែរ តាមរយៈការធ្វើសមយុទ្ធយោធារួម។
បើតាមការចុះផ្សាយបន្តរបស់ទីភ្នាក់ងារសារព័ត៌មានរ៉យទ័រ KCNA បានផ្សាយបទអត្ថាធិប្បាយរបស់អ្នកវិភាគសន្តិសុខអន្តរជាតិរបស់កូរ៉ខាងជើង លោក Choe Ju Hyon ដែលបានរិះគន់សមយុទ្ធអាមេរិក និងកូរ៉េខាងត្បូង ថាជា «ការជំរុញឱ្យភាពតានតឹងនៅឧបទ្វីបកូរ៉េ ឈានដល់ចំណុចផ្ទុះ»។
ក្នុងបទអត្ថាធិប្បាយនោះ លោក Choe បានសរសេរថា៖ «ភាពច្របូកច្របល់ក្នុងការប្រឈមមុខដាក់គ្នាខាងយោធាដោយមិនប្រុងប្រយ័ត្នរបស់សហរដ្ឋអាមេរិក និងសម្ព័ន្ធមិត្ត ប្រឆាំងនឹងកូរ៉េខាងជើង កំពុងជំរុញឱ្យស្ថានការណ៍នៅឧបទ្វីបកូរ៉េ ក្លាយទៅជាមហន្តរាយដែលមិនអាចបត់ក្រោយ…ដល់ហៀបនឹងធ្លាក់ចូលសង្រ្គាមនុយក្លេអ៊ែរ»។លោកបន្តថា៖ «ឥឡូវនេះ សហគមន៍អន្តរជាតិសង្ឃឹមជាឯកច្ឆ័ន្ទថា ពពកខ្មៅងងឹតនៃសង្គ្រាមនុយក្លេអ៊ែរដែលនៅពីលើឧបទ្វីបកូរ៉េ នឹងត្រូវរសាត់ចេញឱ្យបានឆាប់តាមតែអាចធ្វើទៅបាន»។
គួរបញ្ជាក់ថា ការចុះផ្សាយអត្ថបទដែលសម្ដែងពីក្ដីព្រួយបារម្ភនៃហានិភ័យសង្រ្គាមនុយក្លេអ៊ែរចុងក្រោយនេះ ធ្វើឡើងខណៈដែលកងកម្លាំងសហរដ្ឋអាមេរិក និងកូរ៉េខាងត្បូង បាននិងកំពុងធ្វើសមយុទ្ធយោធារួមគ្នាជាបន្តបន្ទាប់ ដើម្បីឆ្លើយតបទៅនឹងការគំរាមកំហែងរបស់កូរ៉េខាងជើង ដែលបានបន្តបាញ់សាកល្បងមីស៊ីលផ្លោងមិនចេះឈប់ដូចគ្នា។ សមយុទ្ធរបស់អាមេរិក និងកូរ៉េខាងត្បូង ដែលមានលក្ខណៈទ្រង់ទ្រាយធំនាកន្លងមកនេះ មានរួមបញ្ជូលទាំងតាមដែនអាកាស និងសមុទ្រ ដោយប្រើនាវាផ្ទុកយន្តហោះចម្បាំង និងយន្តហោះទម្លាក់គ្រាប់បែកយុទ្ធសាស្រ្ត B-1B និង B-52 របស់អាមេរិកជាដើម។
ត្រង់ចំណុចនេះ លោក Choe បានសរសេរក្នុងបទអត្ថាធិប្បាយដដែលថា ការប្រើនាវាផ្ទុកយន្តហោះចម្បាំងមានគោលបំណងធ្វើឱ្យមានការប្រឈមមុខដាក់គ្នា ហើយទីក្រុងព្យុងយ៉ាងនឹងឆ្លើយតបទៅនឹងសមយុទ្ធ ដោយអនុវត្តប្រតិបត្តិការរារាំងសង្គ្រាមរបស់ខ្លួន។
គួរបញ្ជាក់ថា កូរ៉េខាងជើងបានចាត់ទុកសកម្មភាពយោធារបស់អាមេរិក និងសម្ព័ន្ធមិត្តក្នុងតំបន់ ថាជាការហាត់សមដើម្បីធ្វើសង្រ្គាមឈ្លានពាន។ ប្រទេសនេះ បានបង្កើនសកម្មភាពយោធារបស់ខ្លួនក្នុងរយៈប៉ុន្មានសប្តាហ៍ថ្មីៗនេះ ដោយបានដាក់បង្ហាញក្បាលគ្រាប់នុយក្លេអ៊ែរថ្មី និងសាកល្បង «ដ្រូនវាយប្រហារក្រោមទឹកដែលអាចបំពាក់នុយក្លេអ៊ែរ»៕
ប្រែសម្រួល៖ ហួន ឌីណា ប្រភព៖ North Korea says U.S.-South Korea drills push tension to ‘brink of nuclear war’
