តូក្យូ៖ “គ្រាប់បែកផ្សែង” ត្រូវបានបំផ្ទុះឡើង អំឡុងពេលដែលនាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) ធ្វើយុទ្ធនាការ នាភាគខាងលិចប្រទេស កាលពីចុងសប្តាហ៍។

យ៉ាងណាក៏ដោយ នាយករដ្ឋមន្ត្រីជប៉ុន លោក Fumio Kishida បានបន្តយុទ្ធនាការ កាលពីថ្ងៃសៅរ៍ បន្ទាប់ពីត្រូវបានជម្លៀសដោយគ្មានគ្រោះថ្នាក់ពីកន្លែងកើតហេតុនៃការបំផ្ទុះ “គ្រាប់បែកផ្សែង” ។

ឧប្បត្តិហេតុនៅ Wakayama ភាគខាងលិចប្រទេសជប៉ុនបានកើតឡើងតិចជាងមួយឆ្នាំ បន្ទាប់ពីការធ្វើឃាតអតីតនាយករដ្ឋមន្ត្រី Shinzo Abe ដែលបានធ្វើឱ្យប្រទេសនេះមានភាពតក់ស្លុតនិងបង្ខំឱ្យមានការរង្គោះរង្គើផ្នែកសន្តិសុខសម្រាប់មន្រ្តីសាធារណៈ។

លោក Kishida ស្ថិតនៅក្នុងទីក្រុងដើម្បីថ្លែងសុន្ទរកថាគាំទ្របេក្ខភាពបក្សកាន់អំណាចនៅឯកំពង់ផែក្នុងស្រុកមួយ នៅពេលដែលមានការរំខានមួយបានកើតឡើងតាមរយៈហ្វូងមនុស្សដែលបានប្រមូលផ្តុំគ្នាដើម្បីស្តាប់លោកនិយាយ។

ខ្សែវីដេអូពីទូរទស្សន៍ជាតិ NHK បានបង្ហាញថា នាយករដ្ឋមន្ត្រីងាកទៅមើលពីក្រោយ ខណៈដែលមនុស្សម្នាក់ត្រូវបានសន្តិសុខឃាត់ខ្លួន ហើយមនុស្សបានរើចេញ ខ្លះស្រែកយំ។
មួយវិនាទីក្រោយមក សំឡេងផ្ទុះមួយត្រូវបានឮ ហើយផ្សែងពណ៌សពេញខ្យល់។

ខ្សែវីដេអូ និងរូបថតពីកន្លែងកើតហេតុ បានបង្ហាញនូវវត្ថុធ្វើពីប្រាក់ ដែលមានរាងដូចបំពង់នៅលើដី ប៉ុន្តែភ្លាមៗនោះ គេមិនទាន់ដឹងច្បាស់ថា តើវាបណ្តាលឱ្យមានការផ្ទុះ និងផ្សែងនោះទេ។
មន្ត្រីរដ្ឋាភិបាលបាននិយាយថា បុរសម្នាក់ត្រូវបានចាប់ខ្លួន ដោយសង្ស័យពីបទរារាំងយុទ្ធនាការ៕

ប្រភពពី AFP