អូស្រ្តាលី បន្តជួយកម្ពុជា ដើម្បីក្លាយជាប្រទេសគ្មានមីននៅឆ្នាំ ២០២៥
ភ្នំពេញ៖ ប្រទេសអូស្ត្រាលីបានបរិច្ចាគថវិកាជាង ១០០ លានដុល្លារអូស្ត្រាលីដល់កិច្ចខិតខំប្រឹងប្រែងបោសសម្អាតមីននៅកម្ពុជាដោយបន្តប្តេជ្ញាចិត្តក្នុងការជួយកម្ពុជាដើម្បីក្លាយជាប្រទេសគ្មានមីននៅឆ្នាំ ២០២៥។ នេះបើតាមការលើកឡើងរបស់ស្ថានទូតអូស្រ្តាលីប្រចាំកម្ពុជា។
ស្ថានទូតអូស្ត្រាលីប្រចាំកម្ពុជាបានលើកឡើងតាមរយៈបណ្តាញសង្គមហ្វេសប៊ុកផ្លូវការរបស់ខ្លួននៅថ្ងៃទី១៧ ខែមេសាឆ្នាំ២០២៣ ថា សហគមន៍នៅទីជនបទក្នុងខេត្តបន្ទាយមានជ័យ និងបាត់ដំបង ឥឡូវនេះកំពុងដាំដុះដំណាំផ្សេងៗលើផ្ទៃដីដែលត្រូវបានបោសសម្អាតមីន ក្រោមគម្រោងបោសសម្អាតមីនដើម្បីលទ្ធផល ដែលគាំទ្រដោយប្រទេសអូស្ត្រាលី។
ប្រភពដដែលបានបន្តថា ចាប់តាំងពីដើមទសវត្សរ៍ទី ៩០ មក ប្រទេសកម្ពុជា បានបោសសម្អាតផ្ទៃដីដែលមានមីនប្រមាណ ២៥០០ គីឡូម៉ែត្រក្រឡា ដែលជាការវិវឌ្ឍដ៏អស្ចារ្យនៅក្នុងប្រទេសមួយ ក្នុងចំណោមប្រទេស ដែលមានផ្ទុកគ្រាប់មីនកំរិតធ្ងន់ជាងគេលើពិភពលោក។
ស្ថានទូតអូស្រ្តាលីអះអាងបន្ថែមដូច្នេះថា ប្រទេសអូស្ត្រាលី បានបរិច្ចាគថវិកាជាង ១០០ លានដុល្លារអូស្ត្រាលី ដល់កិច្ចខិតខំប្រឹងប្រែងទាំងនេះ ហើយអូស្រ្តាលីនឹងបន្តប្តេជ្ញាចិត្តក្នុងការជួយកម្ពុជា ដើម្បីក្លាយជាប្រទេសគ្មានមីននៅឆ្នាំ ២០២៥ ខាងមុខនេះ។
ចំពោះលទ្ធផលដែលសម្រេចបាននេះ ស្ថានទូតអូស្រ្តាលីបានឱ្យដឹងទៀតថា ថ្មីៗនេះ បុគ្គលិកស្ថានទូតអូស្ត្រាលី បានអមដំណើរគណៈប្រតិភូមួយក្រុមដើម្បីជួប និងស្វែងយល់ពីសហគមន៍នៅក្នុងខេត្តទាំងពីរនេះដែលរស់នៅលើផ្ទៃដី ដែលពីមុនត្រូវបានគ្របដណ្តប់ទៅដោយមីន អំពីផលជាក់ស្តែងនៃគម្រោងនេះ ទៅលើជីវិតរបស់ពួកគេ។
ស្ថានទូតអូស្ត្រាលីប្រចាំកម្ពុជា ក៏បានឱ្យដឹងទៀតថា អូស្ត្រាលី គឺជាដៃគូដ៏យូរអង្វែងមួយរបស់កម្ពុជា ក្នុងការលុបបំបាត់គ្រោះមហន្តរាយនេះ។ ជាក់ស្តែង បើគិតចាប់តាំងពីឆ្នាំ ១៩៩៤ មក អូស្ត្រាលី បានរួមចំណែកជាថវិកា ក្នុងគម្រោងបោសសម្អាតមីនដើម្បីលទ្ធផល ដែលនៅក្នុងនោះមានខេត្តចម្បងចំនួនបី ដែលរងផលប៉ះពាល់ខ្លាំងជាងគេគឺ ខេត្តបន្ទាយមានជ័យ ប៉ៃលិន និងខេត្តបាត់ដំបង។
សូមរម្លឹកផងដែរថា គម្រោងបោសសម្អាតមីនដើម្បីលទ្ធផល បានចាប់ផ្តើមដំណើរការចាប់ពីឆ្នាំ២០០៦ បានចូលរួមរំដោះផ្ទៃដីមានមីនសរុបចំនួន ៣២២.៨៧ គីឡូម៉ែត្រក្រឡា ដែលផ្តល់ផលប្រយោជន៍ដល់ប្រជាជនជនបទជាង មួយលាននាក់ ក្នុងនោះ ៥០ភាគរយ ជាស្ត្រី និងកុមារី។
រហូតដល់ពេលនេះ គម្រោងបោសសម្អាតមីនដើម្បីលទ្ធផល បានឈានដល់ដំណាក់កាលទី៤ ចាប់ពីឆ្នាំ២០២១-២០២៥ ដែលមានការគាំទ្រផ្នែកហិរញ្ញវត្ថុពីរាជរដ្ឋាភិបាលកម្ពុជា ប្រទេសអូស្ត្រាលី សាធារណរដ្ឋកូរ៉េ នូវែលសេឡង់ និងអង្គការ កម្មវិធីអភិវឌ្ឍន៍សហប្រជាជាតិ(UNDP)។ គម្រោងនេះ ត្រូវបានអនុវត្តដោយអាជ្ញាធរមីន និងគ្រប់គ្រងដោយកម្មវិធីអភិវឌ្ឍន៍សហប្រជាជាតិ។ ទន្ទឹមនឹងនេះ រាជរដ្ឋាភិបាលកម្ពុជា ក៏បានចូលរួមនូវវិភាគទានចំនួន ១០ភាគរយ ដល់គម្រោងបោសសម្អាតមីន ដើម្បីលទ្ធផលប្រចាំឆ្នាំផងដែរ។
កាលពីពេលកន្លងទៅសម្ដេចតេជោ ហ៊ុន សែន នាយករដ្ឋមន្រ្តីកម្ពុជាធ្លាប់បានបញ្ជាក់ដែរថា រាជរដ្ឋាភិបាលកម្ពុជា បានសម្រេចបង្កើតគោលដៅកម្ពុជាគ្មានមីនឆ្នាំ២០២៥ ដើម្បីឈានទៅសម្រេចគោលដៅបោសសម្អាតគ្រាប់មីនមិនទាន់ផ្ទុះ ឱ្យអស់នៅត្រឹមឆ្នាំ២០២៥ ក្នុងគោលដៅផ្តល់សុខសុវត្ថិភាព និងលើកកម្ពស់ភាពសុខដុមរមនារបស់ប្រជាពលរដ្ឋគ្រប់លំដាប់ថ្នាក់គ្រប់កាលៈទេសៈ និងគ្រប់ទីកន្លែង។
សម្តេចតេជោ ហ៊ុន សែន ក៏បានបង្ហាញក្តីរំពឹងទុកថាឆ្នាំ២០២៥ នឹងក្លាយជាឆ្នាំគ្មានមនុស្សស្លាប់ របួស និងជាឆ្នាំប្រកបដោយស្នាមញញឹមរបស់ពលរដ្ឋកម្ពុជាផងដែរ។
សូមបញ្ជាក់ដែរថា ក្នុងឆ្នាំ២០២៣នេះ កម្ពុជាគ្រោងនឹងប្រកាសខេត្តចំនួនប្រាំបីជាខេត្តអស់មីន ក្នុងនោះ រួមមាន៖ ខេត្តតាកែវ, ខេត្តកំពត, ខេត្តកំពង់ស្ពឺ, ខេត្តកំពង់ធំ, ខេត្តសៀមរាប, ខេត្តក្រចេះ, ខេត្តមណ្ឌលគិរី និងខេត្តរតនគិរី៕
ដោយ៖សែម ពិសី
