សកម្មជនគាំទ្រលទ្ធិប្រជាធិបតេយ្យល្បីឈ្មោះ លោកចូស្វា វ៉ុង រងការកាត់ទោសឱ្យជាប់គុកបីខែ ចំពោះការទម្លាយព័ត៌មានផ្ទាល់ខ្លួនរបស់ប៉ូលិសមួយរូប
ហុងកុង៖សកម្មជនប្រជាធិបតេយ្យដ៏ល្បីឈ្មោះនៅក្រុងហុងកុង លោក ចូស្វា វ៉ុង (Joshua Wong) រងការកាត់ទោសនៅថ្ងៃទី១៧ ខែមេសា ឱ្យជាប់ពន្ធធាគាររយៈពេលបី ខែ ចំពោះការចោទប្រកាន់ពីបទ «រំលោភព័ត៌មាន» ដោយការទម្លាយព័ត៌មានផ្ទាល់ខ្លួនរបស់មន្រ្តីប៉ូលិសម្នាក់។ នេះបើតាមយោងតាមការបង្ហោះនៅលើគណនីហ្វេសប៊ុករបស់ លោក វ៉ុង។
លោក វ៉ុង វ័យ ២៦ឆ្នាំ ដែលលេចឡើងជាសកម្មជនល្បីឈ្មោះចាប់តាំងពីឆ្នាំ ២០១៤ បានដឹកនាំការតវ៉ាគាំទ្រលទ្ធិប្រជាធិបតេយ្យទ្រង់ទ្រាយធំរបស់សិស្សនិស្សិតនៅទីក្រុងហុងកុងក្នុងឆ្នាំ ២០១៩។ ក្នុងសេចក្តីសម្រេចកាលពីថ្ងៃចន្ទ លោកត្រូវបានកាត់ទោសពីបទរំលោភលើបម្រាមរបស់តុលាការ ក្នុងការបង្ហាញព័ត៌មានផ្ទាល់ខ្លួនរបស់មន្ត្រីប៉ូលិសម្នាក់ ដែលបានបើកការបាញ់ប្រហារក្នុងការតវ៉ានៅឆ្នាំនោះ។
ប្រភពដែលចូលរួមក្នុងតុលាការ បាននិយាយថា លោក វ៉ុង បានចូលរួមក្នុងសវនាការ ប៉ុន្តែមិនបាននិយាយអ្វីនោះទេ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
បើតាមរ៉យទ័រដដែល តុលាការមិនបានប្រកាសសាលក្រមជាលាយលក្ខណ៍អក្សរភ្លាមៗទេ ដោយគ្រាន់តែចេញសាលក្រមផ្ទាល់មាត់ប៉ុណ្ណោះ។ គួរបញ្ជាក់ជាថ្មី លោក វ៉ុង បានទាក់ទាញការគាំទ្រជាអន្តរជាតិចំពោះចលនាគាំទ្រលទ្ធិប្រជាធិបតេយ្យនៅហុងកុង ដោយលោកបានជួប
ជាមួយអ្នកនយោបាយមកពីសហរដ្ឋអាមេរិក អឺរ៉ុប និងប្រទេសផ្សេងៗទៀត និងក៏បានទាក់ទាញកំហឹងផងដែរពីទីក្រុងប៉េកាំង ដែលហៅលោកថាជាតួអង្គបម្រើការឱ្យបរទេស។
លោក វ៉ុង គឺជាឥស្សរជនគាំទ្រលទ្ធិប្រជាធិបតេយ្យម្នាក់ក្នុងចំណោម ៤៧ នាក់ ដែលរងការចោទប្រកាន់ពីបទសមគំនិតក្នុងការធ្វើវិទ្ធង្សនា ក្រោមច្បាប់សន្តិសុខជាតិហុងកុង ដែលដាក់ចេញដោយក្រុងប៉េកាំងក្នុងឆ្នាំ ២០២០។ រដ្ឋាភិបាលលោកខាងលិចបានរិះគន់ច្បាប់នេះ ថាជាឧបករណ៍មួយដើម្បីបង្រ្កាបក្រុមប្រឆាំង ប៉ុន្តែអាជ្ញាធរចិន និងហុងកុងបាននិយាយថា វាជាច្បាប់ដែលនាំមកនូវស្ថេរភាពដល់ក្រុង ក្រោយភាពចលាចលអស់រយៈពេលជាច្រើនខែក្នុងឆ្នាំ ២០១៩៕
ប្រែសម្រួល៖ហួន ឌីណា
