អាមេរិក នឹងចែករំលែងផែនការនុយក្លេអ៊ែរជាមួយកូរ៉េខាងត្បូង ដើម្បីទប់ស្កាត់ការគំរាមកំហែងរបស់កូរ៉េខាងជើង
អាមេរិក៖ សហរដ្ឋអាមេរិកកាលពីថ្ងៃពុធទី២៦ខែមេសានេះ បានសន្យាថានឹងចែករំលែកផែនការនុយក្លេអ៊ែរពេលមានជម្លោះណាមួយជាមួយកូរ៉េខាងត្បូង ចំពេលមានការព្រួយបារម្ភកាន់តែខ្លាំងឡើងពីការគំរាមកំហែងរបស់កូរ៉េខាងជើង។
ការសន្យានេះមានក្នុង «សេចក្ដីប្រកាសក្រុងវ៉ាស៊ីនតោន» ដែលធ្វើឡើងបន្ទាប់ប្រធានាធិបតីសហរដ្ឋអាមេរិក លោក ចូ បៃដិន និងប្រធានាធិបតីកូរ៉េខាងត្បូងលោក យូន ស៊កយល បានជួបពិភាក្សាគ្នានៅសេតវិមានកាលពីថ្ងៃពុធ ដោយលើកឡើងនូវបញ្ហាផ្សេងៗរាប់តាំងពីវិបត្តិឧបទ្វីបកូរ៉េ ជម្លោះនៅតៃវ៉ាន់ បន្ទះឈីប និងទំនាក់ទំនងពាណិជ្ជកម្ម និងសង្រ្គាមនៅអ៊ុយក្រែនជាដើម។
ទីភ្នាក់ងារសារព័ត៌មានរ៉យទ័រ បានស្រង់សម្ដីក្រុមមន្ត្រីអាមេរិកដែលនិយាយថា ក្រោមសេចក្តីប្រកាសថ្មីនេះ សហរដ្ឋអាមេរិកនឹងផ្តល់ឱ្យទីក្រុងសេអ៊ូលនូវព័ត៌មានលម្អិតចំពោះផែនការបន្ទាន់របស់សហរដ្ឋអាមេរិក ក្នុងការទប់ស្កាត់ និងឆ្លើយតបចំពោះឧប្បត្តិហេតុនុយក្លេអ៊ែរណាមួយនៅក្នុងតំបន់ តាមរយៈក្រុមប្រឹក្សានុយក្លេអ៊ែរសហរដ្ឋអាមេរិក-កូរ៉េខាងត្បូង។
ក្រុមមន្ត្រីនិយាយទៀតថា ក្រុងវ៉ាស៊ីនតោនក៏នឹងដាក់ពង្រាយនាវាមុជទឹកផ្ទុកមីស៊ីលផ្លោង ទៅកាន់កូរ៉េខាងត្បូង ដើម្បីជាការបង្ហាញកម្លាំងរបស់ខ្លួនផងដែរ ដែលនឹងក្លាយជាធាតុផ្សំដ៏សំខាន់នៃយុទ្ធសាស្ត្រទូលំទូលាយរបស់អាមេរិក។
យ៉ាងណាមិញក្រោយជំនួបជាមួយលោក យូន គឺលោក បៃដិន បានបញ្ជាក់យ៉ាងច្បាស់ថា អាមេរិកនឹងមិនដាក់ពង្រាយអាវុធនុយក្លេអ៊ែរនៅកូរ៉េខាងត្បូងនោះទេ ប៉ុន្តែថា លោកនឹងរក្សា «សិទ្ធិអំណាចផ្តាច់មុខ» ក្នុងការប្រើប្រាស់អាវុធនុយក្លេអ៊ែរ។
ក្នុងសន្និសីទសារព័ត៌មានរួមគ្នាក្រោយកិច្ចពិភាក្សា លោក យូន បាននិយាយថា លោក និងលោក បៃដិន បានព្រមព្រៀងគ្នាលើជំហានពង្រឹងការការពាររបស់កូរ៉េខាងត្បូង ដើម្បីឆ្លើយតបទៅនឹងការគំរាមកំហែងដែលបង្កឡើងដោយកូរ៉េខាងជើង។
លោក យូន ថ្លែងយ៉ាងដូច្នេះថា៖ «ប្រទេសយើងទាំង២ បានយល់ព្រមក្នុងការពិគ្រោះយោបល់ថ្នាក់ប្រធានាធិបតីទ្វេភាគីភ្លាមៗ នៅពេលមានព្រឹត្តិការណ៍នៃការវាយប្រហារនុយក្លេអ៊ែររបស់កូរ៉េខាងជើង ហើយបានសន្យាថានឹងឆ្លើយតបយ៉ាងរហ័ស លើសលប់ និងប្រកបដោយការសម្រេចចិត្តជាក់លាក់ ដោយប្រើប្រាស់កម្លាំងរបស់សម្ព័ន្ធមិត្ត រួមទាំងអាវុធនុយក្លេអ៊ែររបស់សហរដ្ឋអាមេរិក»។
ចំណែកឯលោក បៃដិន ឯណោះវិញ បានរំឭកឡើងវិញនូវការទាមទារឱ្យប្រទេសកូរ៉េខាងជើងធ្វើការពិភាក្សាអំពីកម្មវិធីនុយក្លេអ៊ែរ និងមីស៊ីលរបស់ខ្លួន ដែលនាពេលកន្លងមក ត្រូវបានមេដឹកនាំកូរ៉េខាងជើងលោក គីម ជុងអ៊ុន មិនអើពើ។
ជុំវិញការប្រកាសស្ដីពីការចែករំលែងផែនការនុយក្លេអ៊ែរចុងក្រោយនេះ កូរ៉េខាងជើង ដែលបង្កើនការបាញ់សាកល្បងអាវុធរបស់ខ្លួន មិនបានចេញប្រតិកម្មយ៉ាងណាភ្លាមៗនោះទេ។ ប៉ុន្តែកន្លងមក កូរ៉េខាងជើងបានព្រមានសងសឹង និងធ្វើការគំរាមកំហែងផ្សេងៗ ចំពោះការដាក់ពង្រាយផ្នែកយោធាសំខាន់ រួមមានទាំងយន្តហោះទម្លាក់គ្រាប់បែកយុទ្ធសាស្រ្ត នៅក្នុងតំបន់របស់អាមេរិក ក៏ដូចជាសមយុទ្ធយោធារួមរបស់អាមេរិក និងកូរ៉េខាងត្បូង៕
ប្រែសម្រួលដោយ៖ ហួន ឌីណា
ប្រភព៖ South Korea, US to share nuclear planning to deter North Korean threat
