កណ្តាល៖ អភិបាលខេត្តកណ្តាលឯកឧត្តម គង់ សោភ័ណ្ឌ បានស្នើដល់អាជ្ញាធរគ្រប់លំដាប់ថ្នាក់ ខិតខំរក្សាសន្តិសុខសណ្តាប់ធ្នាប់ល្អជូនប្រជាពលរដ្ឋក្នុងក្រុង/ស្រុក ដែលទើបបង្កើតថ្មីដើម្បីលើកកម្ពស់ជីវភាពរបស់ប្រជាពើរដ្ឋ និងជំរុញការអភិវឌ្ឍន៍លើគ្រប់វិស័យជាបន្តបន្ទាប់ទៀត។

ការស្នើនេះបានធ្វើឡើងនៅក្នុងពិធីប្រកាសចូលកាន់មុខតំណែង គណ:អភិបាល នៃស្រុកកោះធំ និងគ​ណ​:អភិបាលក្រុងសំពៅពូន ដែលជាក្រុងទើបបង្កើតថ្មី កាលពី​រសៀលថ្ងៃទី២ ខែឧសភា ឆ្នាំ២០២៣។​

បើ​តាម​រដ្ឋបាលខេត្តកណ្តាល​ឱ្យដឹងនៅថ្ងៃទី៣ ខែឧសភានាឱកាសនោះ ​​ឯកឧត្តម គង់ សោភ័ណ្ឌ បានជំរុញ និងលើកទឹកចិត្តដល់អភិបាលក្រុង-ស្រុកដែលទើបតែទ​ទួលបានការតែងតាំងថ្មី ត្រូវមានភាពស្មោះត្រង់ជាមួយមន្ត្រីក្រោមឱវាទ និងថ្នាក់លើ ជាពិសេសជាមួយរាជរដ្ឋាភិបាលកម្ពុជា។

​ឯកឧត្តមបានបន្តថា ៖ «សូមឱ្យអភិបាលក្រុង-ស្រុកថ្មីត្រូវស្វែងយល់អំពីច្បាប់នានា ត្រូវរៀនសូត្រពីការងារជា​ក់ស្ដែង រៀនសូត្រពីចាស់ទុំដើម្បីធ្វើឱ្យការងារទទួលបានជោគជ័យកាន់តែប្រសើឡើង»។​

ពិធីប្រកាសចូលកាន់មុខតំណែង​នេះ ​ត្រូវបានប្រគល់ជូន លោក អេង សុវិចិត្រ ដែល​ត្រូវបានតែងតាំងជាអ​ភិបាល​ក្រុងសំពៅពូន និងលោក ឆែ វណ្ណឌី ត្រូវបានតែងតាំងជា​អភិបាលស្រុកកោះធំ។

តាមរយៈពិធីនេះលោក លោកស្រី សមាជិក សមាជិកាក្រុមប្រឹក្សាក្រុងសំពៅពូន និងស្រុកកោះធំ ដែលត្រូ​វបានប្រកាសឱ្យចូលកាន់មុខតំណែងនាឱកាសនោះ ក៏បានបង្ហាញការប្តេជ្ញាចិត្តថា នឹងខិតខំបន្តដឹកនាំ និ​ងគ្រប់គ្រងរដ្ឋបាល ក្រុងសំពៅពូន និងរដ្ឋបាលស្រុកកោះធំឱ្យបន្តអភិវឌ្ឍន៍រីកចម្រើនលើគ្រប់វិស័យបន្ថែ​មទៀតផងដែរ។

សូមរម្លឹកដែរថា រដ្ឋាភិបាល​កម្ពុជា ​កាល​ថ្ងៃ​ទី២៣​ ខែធ្នូ ឆ្នាំ ២០២២ កន្លងទៅ បាន​សម្រេច​បង្កើត​ក្រុង​ថ្មី​ចំ​នួន​ ៣ ​បន្ថែម​ទៀត​ និង​ពង្រីក​ស្រុក​ថ្មី២ បន្ថែមផងដែរ​​។ ក្រុង​សំពៅពូន​ និង​ក្រុង​អរិយក្សត្រ ​ស្ថិត​ក្នុង​ខេត្ត​កណ្ដាល ​ រីឯ​ក្រុង​ឧដុង្គម៉ែជ័យ​ស្ថិត​ក្នុង​ស្រុក​ឧដុង្គ​ខេត្ត​កំពង់ស្ពឺ។​ ស្រុក​ឧដុង្គ​ក៏​ត្រូវ​បាន​ពង្រីក​ស្រុក​មួយ​បន្ថែម​ទៀត​ដែរ​គឺ​ស្រុក​សាមគ្គីមុនីជ័យ​  ខណៈ​ស្រុក​ថ្មី​មួយ​ទៀត​ត្រូវ​បាន​បង្កើត​នៅ​ខេត្ត​ក្រចេះ​ឈ្មោះ​ថា ​ស្រុក​អូរគ្រៀងសែនជ័យ។​

ដោយឡែក បើតាមរដ្ឋបាលខេត្ត​កណ្តាល ក៏បានបញ្ជាក់ដែរថា ដោយសារស្ថានភាពស្រុកកោះធំ មានភូមិសាស្ត្រផ្ទៃដីធំទូលាយ និងមានប្រជាពលរដ្ឋរស់នៅច្រើន ទើបរាជរដ្ឋាភិបាលបានសម្រេចបំបែក និងបង្កើត ក្រុ​ងសំពៅពូន នៃខេត្តនេះ​ដោយកាត់យកឃុំចំនួន០៥ ពីស្រុកកោះធំ គឺឃុំឈើខ្មៅ, ឃុំព្រែកជ្រៃ, ឃុំព្រែកស្ដី, ឃុំជ្រោយតាកែវ និងឃុំសំពៅពូន។

​​កន្លងមក ពាក់ព័ន្ធនឹងការបង្កើតក្រុងថ្មីនេះ អ្នកជំនាញផ្នែកអចលនទ្រព្យ និងប្រជាពលរដ្ឋដែលស្ថិតនៅតំបន់ក្រុងថ្មី ក៏ធ្លាប់បានបង្ហាញការគាំទ្រ ចំពោះផែនការពង្រីកទីក្រុងថ្មីជាបន្តបន្ទាប់របស់រដ្ឋាភិបាលថា នឹងផ្តល់ប្រយោជន៍ច្រើនដល់ពលរដ្ឋ និងជំរុញកំណើនសេដ្ឋកិច្ចនាតំបន់ក្រុងថ្មីថែមទៀត។ ទន្ទឹមគ្នានេះ ទាំងអ្នកជំនាញ និងប្រជាពលរដ្ឋនៅតំបន់នោះ ក៏ធ្លាប់បានជំរុញឱ្យរដ្ឋាភិបាលគួរផ្តោតការអភិវឌ្ឍន៍លើការពង្រីកហេដ្ឋារចនាសម្ព័ន្ធនៅតំបន់ក្រុងថ្មីនោះបន្ថែមទៀត ដើម្បីឱ្យចរន្តអភិវឌ្ឍន៍តំបន់នោះកាន់តែរីកចំរើនឆាប់រហ័ស៕

ដោយ៖សែម ពិសី