ព្រះសីហនុ៖ អភិបាល​ខេត្តព្រះសីហនុឯកឧត្តម គួច ចំរើន បានជំរុញនិងលើកទឹកចិត្តឱ្យវត្តអារាម និងវិហារសាសនាផ្សេ​ង​ៗ ធ្វើជាមជ្ឈមណ្ឌលអប់រំប្រជាពលរដ្ឋឱ្យមានស្មារតី និងទឹកចិត្តប្រកបដោយធម៌ ដើម្បីបញ្ចៀសអំពើហិ​ង្សានានា សំដៅជំរុញអភិវឌ្ឍសង្គមជាតិលើគ្រប់វិស័យ។

​ឯកឧត្តមមានប្រសាសន៍ដូចនេះកាលពី​ថ្ងៃទី​២ ខែឧសភា ឆ្នាំ​២០២៣ក្នុង​ពិធី​សម្ពោធឆ្លងសមិទ្ធផលនានាក្នុងវត្តមុនីសាលព្រឹក្ស ស្ថិតនៅ​ឃុំអណ្តូងថ្ម ស្រុកព្រៃនប់​ ។

ឯកឧត្តមបាន​បន្តថា កម្ពុជាបានផ្តល់តម្លៃខ្ពស់លើការអភិវឌ្ឍវិស័យសាសនា ក្នុងនោះមានការគោរពសេរីភាពខា​ងជំនឿសាសនា ការលើកស្ទួយព្រះពុទ្ធសាសនា ដែលជាសាសនារបស់រដ្ឋ និងគាំទ្រការគោរពប្រតិបត្តិសាសនាដទៃទៀត ដើម្បីសាមគ្គីភាព និងសុខដុមរមនានៃសង្គមជាតិ។ ជាមួយគ្នានេះ លោក ក៏បានជំរុញឱ្យវត្តអារាម និងវិហារសាសនាផ្សេងៗ ជាមជ្ឈមណ្ឌលអប់រំពលរដ្ឋឱ្យមានទឹកចិត្តប្រកបដោយធម៌។

តាមរយៈរដ្ឋបាលខេត្តព្រះសីហនុ ឯកឧត្តម គួច ចំរើន បានបញ្ជាក់​ថា ៖ «ក្នុងនាមរដ្ឋបាលខេត្ត សូមលើកទឹកចិត្តឱ្យវត្តអារាម និងវិហារសាសនាផ្សេងៗទៀត ជាមជ្ឈមណ្ឌលអប់រំប្រជាពលរដ្ឋឱ្យមានស្មារតី និងទឹកចិត្តប្រកបដោយធម៌ មិនប្រកាន់អំពើហិង្សា មិនរើសអើងពណ៌សម្បុរ មានស្មារតីសាមគ្គីរាប់អានគ្នាយ៉ាងទូលំទូលាយក្នុងសង្គម មានសកម្មភាពយ៉ាងសកម្មចូលរួមអភិរក្ស និងអភិវឌ្ឍសង្គមជាតិលើគ្រប់វិស័យ»។​

ឆ្លៀតឱកាសនោះដែរលោកក៏បានធ្វើការអំពាវនាវឱ្យ​ប្រជាពលរដ្ឋចូលរួមគោរពច្បាប់ចរាចរណ៍ផ្លូវគោកឱ្យបា​នគ្រប់គ្នា ដើម្បីទបស្កាត់ និងបញ្ចៀសបញ្ហាគ្រោះថ្នាក់ចរាចរណ៍ នៅក្នុងខេត្តព្រះសីហនុផងដែរ។​

 លោក អ៊ី ធារិន អភិបាលស្រុកព្រៃនប់បានប្រាប់ឱ្យដឹងនៅថ្ងៃទី​៣ខែឧសភាថា សមិទ្ធផលនានាក្នុងវត្តមុនីសាលព្រឹក ដែលមានអាយុកាល ១០០ឆ្នាំកន្លងមកហើយនេះ។ក្នុងនោះ រួមមាន៖ សាលាអនុគណស្រុក សាលាធម្មសភា ព្រះពន្លាជ័យ ជណ្តើកែវ ប្រាសាទតម្តល់ព្រះពុទ្ធរូប រូបបដិមាផ្សេងៗ រូបសំណាកហ្លួងព្រះសេ្តចកន ចង្គ្រានបាយ ខ្លោងទ្វារ ផ្លូវបេតុង វេច្ចកុដិ កែលម្អទីសេនាសនៈនានា និងទីធ្លាក្នុងវត្តចំណាយថវិកាសរុប ២៤៥.៣១៦ដុល្លារអាមេរិក។ សមិទ្ធផលទាំងអស់នេះ នឹងក្លាយទីកន្លែងសម្រាប់តម្តល់ទុកជាសម្បត្តិគ​រុភណ្ឌ ក្នុងការប្រើប្រាស់ជាប្រយោជន៍រួមរបស់ព្រះសង្ឃ និងពុទ្ធបរិស័ទក្នុងការអបរំ និងគោរពប្រតិបត្តិតាមជំនឿបែបព្រះពុទ្ធសាសនាថែមទៀត។ ​

គួរបញ្ជាក់ដែរថា បើតាមរបាយការណ៍របស់រដ្ឋបាលខេត្តព្រះសីហនុ ធ្លាប់បានឱ្យដឹងថា ខេត្តព្រះសីហនុ គឺជាខេត្តដែលមានវិស័យសេដ្ឋកិច្ចសំខាន់ៗរួមមាន៖ វិស័យឧស្សាហកម្ម ពាណិជ្ជកម្ម ទេសចរណ៍ និងកសិកម្ម ដែលជាវិស័យអាទិភាពសម្រាប់ការអភិវឌ្ឍខឿនសេដ្ឋកិច្ចជាតិរបស់រាជរដ្ឋាភិបាល។

សក្តានុពលខេត្តនេះរួមមាន កំពង់ផែសមុទ្រទឹកជ្រៅ តំបន់សេដ្ឋកិច្ចពិសេស មានចំនួន១១ ទីតាំង (៣កំពុងដំណើរការ និង៨ត្រៀមដំណើការ) អាកាសយានដ្ឋានអន្តរជាតិខេត្តព្រះសីហនុ និងឆ្នេរសមុទ្រដ៏ស្រស់ស្អាតដែលត្រូវបាន ប្រសិទ្ធនាមជា “តារារៈនាទិសនិរតី” ។ ​

មិនតែប៉ុណ្ណោះ ជា​ខេត្ត​ជាប់​សមុទ្រ ​មាន​ឆ្នេរ និង​កោះ និង​រមណីយដ្ឋាន​​ធម្មជាតិ​ទាក់ទាញ​ ខេត្ត​ព្រះសីហនុ ក៏មាន​វត្ត​អារាម​ជាទីសក្ការៈ​​សម្រាប់ពលរដ្ឋ​​គោរព​បូជា និង​កន្លែងប្រារព្ធពិធីបែបសាសនា​ផ្សេងៗផងដែរ។ បើគិតមកដល់ពេលនេះ ​ព្រះសីហនុ​មាន​វត្ត​សរុប ៣៨ កន្លែង និងមានមជ្ឍមណ្ឌលវិបស្សនា​និង​អាស្រ​មជា​ច្រើនកន្លែង​ទៀត៕

ដោយ៖សែម ពិសី