រដ្ឋាភិបាលកុងហ្គោបានបញ្ជូនមឈូស ទៅឲ្យអ្នកភូមិ ដើម្បីបញ្ចុះអ្នករងគ្រោះដោយទឹកជំនន់។ ភូមិ នីយ៉ាមូគូប៊ី (Nyamukubi) ខេត្ត គីវូ ខាងត្បូង (South Kivu)  គឺជាភូមិដែលរងផលប៉ះពាល់ដោយទឹកជំនន់នៅភាគខាងកើត នៃសាធារណរដ្ឋប្រជាធិបតេយ្យកុងហ្គោ ហើយជនរងគ្រោះទទួលបានជំនួយពីរដ្ឋាភិបាល រួមទាំងមឈូស និងអាហារ។

រដ្ឋមន្ត្រីក្រសួងសង្គមកិច្ច សកម្មភាពមនុស្សធម៌ និងសាមគ្គីភាពជាតិ លោក ម៉ូឌេសតេ មូទីញ៉ា (Modeste Mutinga) បានផ្តល់ជំនួយប៉ុន្មានថ្ងៃ មកនេះ បន្ទាប់ពីគ្រោះមហន្តរាយបានសម្លាប់មនុស្សយ៉ាងហោចណាស់ ៤០០នាក់។

ការស្វែងរកការបាត់ខ្លួនរាប់មិនអស់នៅតែបន្តកើតមាននៅក្នុង សាធារណរដ្ឋប្រជាធិបតេយ្យកុងហ្គោ។ គ្រួសារ និងអ្នកជួយសង្គ្រោះនៅភាគខាងកើតនៃសាធារណរដ្ឋប្រជាធិបតេយ្យកុងហ្គោកំពុងស្វែងរកមនុស្សបានបាត់ខ្លួនរយៈពេល ៤ ថ្ងៃបន្ទាប់ពីទឹកជំនន់ និងការរអិលបាក់ដីដែលបង្កឡើងដោយភ្លៀងធ្លាក់ខ្លាំងបានសម្លាប់មនុស្សយ៉ាងហោចណាស់ ៤០០នាក់ ។

អ្នកនាំពាក្យរដ្ឋាភិបាលកុងហ្គោ លោក ប៉ាទ្រីក មូយ៉ាយ៉ា (Patrick Muyaya) បានបញ្ជាក់ពីចំនួនអ្នកស្លាប់ដែលផ្តល់ដោយអ្នកគ្រប់គ្រងដែនដី កាឡេហេ (Kalehe) ក្នុងខេត្ត គីវូ ខាងត្បូង (South Kivu)  ជាកន្លែងដែលភូមិត្រូវបានបំផ្លាញ ហើយសាកសពត្រូវបានរកឃើញ នៅក្នុងបឹង គីវូ (Kivu) ។

យោងតាមការិយាល័យកិច្ចការមនុស្សធម៌របស់អង្គការសហប្រជាជាតិ (OCHA) ប្រជាជនប្រមាណ ៣០០០ គ្រួសារ នៅតែគ្មានជម្រក៕ ប្រភពពី AFP ប្រែសម្រួល ៖ សារ៉ាត