ភ្នំពេញ៖ក្រសួងប្រៃសណីយ៍ និងទូរគមនាគមន៍ (ក.ប.ទ.)បាននិងកំពុងរៀបចំកម្មវិធីបណ្តុះបណ្តាលពង្រឹងស​មត្ថភាពដល់ម​ន្រ្តីពាក់ព័ន្ធនៅតាមបណ្តាខេត្ត ក្នុងគោលដៅអភិវឌ្ឍន៍លើជំនាញវិជ្ជាជីវៈ និងបច្ចេក​ទេសឌីជីថ​ល ក៏ដូចជាចែករំលែកចំណេះដឹងនិងបទពិសោធថ្មីៗពាក់ពន្ធ័នឹងការវិវត្តន៍នៃបច្ចេកវិទ្យា។

កម្មវិធីបណ្តុះបណ្ដាលស្ដីពីការពង្រឹងសមត្ថភាពអនុវត្តការងារ(ជំហានទី២) សម្រាប់មន្ទីរប្រៃសណីយ៍និងទូរគមនាគមន៍( ប.ទ.) ទាំង ២៤ខេត្ត​ បាននិងកំពុងរៀបចំ ចាប់ពីថ្ងៃទី២៥ ខែមេសា រហូតដល់ថ្ងៃទី២៥ ខែឧសភា ឆ្នាំ២០២៣ ដែលធ្វើនៅ៤ទីតាំងផ្សេងៗគ្នា។

យោងតាម​ក្រសួង​បាន​ឱ្យដឹងថា ការបណ្តុះបណ្តាលនេះ បានចាប់​ផ្តើមនៅ​​​ខេត្តសៀមរាប ចាប់ពីថ្ងៃទី២៥ ដល់ថ្ងៃទី២៧ ខែមេសា ខេត្តប៉ៃលិន ចាប់ពីថ្ងៃទី៩ ដល់ថ្ងៃទី១១ ខែឧសភា ខេត្តកំពង់ធំ ចាប់ពីថ្ងៃទី១៦ ដ​ល់ថ្ងៃទី១៨ ខែឧសភា និងខេត្តព្រះសីហនុ ចាប់ពីថ្ងៃទី២៣ ដល់ថ្ងៃទី២៥ ខែឧសភា។

ក្នុងកម្មវិធីបណ្តុះបណ្តាលដែលធ្វើឡើងនៅខេត្តប៉ៃ​លិនចាប់ពីថ្ងៃទី៩ ដល់ថ្ងៃទី១១ ខែឧសភា មានកា​រចូលរួមពីឯកឧត្តម ខាយ ឃុនហេង និងលោកជំទាវ រស់ សូរក្ខា រដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ ព្រមទាំងមានការអញ្ជើញចូលរួមពី គ្រូឧទ្ទេសជាថ្នាក់ដឹកនាំ និងមន្ត្រីជំនាញ និងសិក្ខាកាមចំនួន ៨៤ រូប ដែលជាមន្ដ្រីរាជការមកពីមន្ទីរប្រៃសណីយ៍និងទូរគមនាគមន៍ ១៤ ខេត្ត។

ក្នុងឱកាសនោះ ឯកឧត្តម ខាយ ឃុនហេង បានថ្លែងអំណរគុណដល់វាគ្មិនថ្នាក់ជាតិដែលបានចំ​ណាយ​ពេលដ៏មានតម្លៃក្នុងការមកចែករំលែកនូវចំណេះដឹងនិងបទពិសោធន៍ថ្មីៗពាក់ពន្ធ័នឹងការវិវត្តន៍នៃបច្ចេកវិទ្យា។ លោកក៏បានលើកទឹកចិត្តសូមសិក្ខាកាមទាំងអស់យកចិត្តទុកដាក់ទទួលយកចំណេះដឹងដែលទទួ​​លបានការចែករំលែកពីថ្នាក់ជាតិនាពេលនេះ ដើម្បីពង្រឹងនិងពង្រីកសមត្ថភាពបន្ថែមទៀត សម្រាប់បំ​ពេញតួនាទីភារកិច្ចក្នុងការអនុវត្តការងារប្រចាំថ្ងៃនៅតាមអង្គភាពរៀងៗខ្លួនឱ្យទទួលបាននូវលទ្ធផលល្អប្រសើរថែមទៀត។

បើតាមក្រសួងប្រៃសណីយ៍ និងទូរគមនាគមន៍ កម្មវិធីបណ្ដុះបណ្តាលនេះត្រូវបានរៀបចំឡើងក្នុងគោលបំ​ណង បង្កើនចំណេះដឹងថ្មីៗពីបច្ចេកវិទ្យាឌីជីថល និងពង្រឹងសមត្ថភាពជំនាញ និងបទពិសោធពាក់ព័ន្ធវិស័​យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន សម្រាប់អនុវត្តការងារប្រចាំថ្ងៃដល់ម​ន្ត្រីរាជការមន្ទីរ ប.ទ. ដើម្បីបម្រើសេវាសាធារណៈជូនប្រជាពលរដ្ឋឱ្យកាន់តែល្អប្រសើរ ឆាប់រហ័សប្រក​បដោ​យប្រសិទ្ធភាពខ្ពស់​៕

ដោយ៖សុខ រក្សា