សិប្បកម្មមួយកែច្នៃដំណាំចម្រុះក្បែរផ្ទះទៅជាម្សៅសុខភាព កំពុងមានតម្រូវការខ្ពស់
បាត់ដំបង៖ដំណាំចម្រុះទូទៅ ដូចជា ចេក រំដេង ខ្ញី ឬពន្លៃ តែងត្រូវបានប្រជាជនខ្មែរនិយមដាំដុះក្បែរផ្ទះ ឬនៅចម្ការរបស់ខ្លួន ទៅតាមទំហំដី និងតម្រូវនៃការប្រើប្រាស់។ ការដាំដុះដំណាំចម្រុះ គឺជាទម្លាប់ តែវាក៏អាចកាត់បន្ថយការចំណាយ និងកាត់បន្ថយការប្រើប្រាស់បន្លែដែលនាំចូលពីបរទេស ហើយគេក៏អាចយកមកប្រើប្រាស់ដើម្បីជួយសុខភាពផងដែរ។
ជាក់ស្តែង សិប្បកម្មមួយនៅភូមិអង់ សង្កាត់អូរចារ ក្រុងបាត់ដំបង ខេត្តបាត់ដំបង បានកែច្នៃដំណាំចម្រុះ ទៅជាម្សៅ ជំនួយដល់សុខភាព កំពុងមានតម្រូវការខ្ពស់ និងជួយលើកកម្ពស់ជីវភាពប្រជាកសិករក្នុងសហគមណ៍របស់ខ្លួនបានទៀតផង។
លោកស្រី សេង សំណាង នាយកប្រតិបត្តិសិប្បកម្មអឹមអិលអេក បានឱ្យដឹងថាអាជីវកម្មរបស់លោកស្រីត្រូវបានបង្កើតឡើងនាដើមខែកុម្ភៈឆ្នាំ២០២១ ជាពេលដែលលោកស្រីមានបញ្ហាសុខភាព ក្រពះ និងពោះវៀនដែលប្រើប្រាស់ថ្នាំពេទ្យមិនទទួលបានលទ្ធផល។
លោកស្រីបន្តឱ្យដឹងថា ៖ «ក្រោយមកខ្ញុំបានញុំាជាមួយនឹងម្សៅចេក ហើយទទួលបានប្រសិទ្ធភាពខ្ពស់ ជួយបំបាត់ការចុកសៀតណែនក្នុងពោះ។ បញ្ហាក្រពះក៏បានធូរស្រាល ទើបយើងធ្វើការផលិត តែផលិតជា
លក្ខណៈគ្រួសារ ដើម្បីលក់តាម អនឡាញ(Online) ធម្មតាៗ»។
តែដោយសារតែសង្កេតឃើញស្ថានភាពក្នុងស្រុកថាមនុស្សភាគច្រើនប្រឈមនឹងបញ្ហាក្រពះ ពោះវៀនច្រើន លោកស្រី សេង សំណាង ថា លោកស្រីព្យាយាមផលិតដើម្បីជួយពួកគាត់ឱ្យទទួលបាននូវសុខភាពល្អ ដោយប្រើប្រាស់អាហារបែបសុខភាពដែលផលិតចេញពីធម្មជាតិ ជំនួសថ្នាំពេទ្យ។
ជាមួយគ្នានេះ បើតាមលោកស្រីអាជីវកម្មមានទស្សនៈវិស័យ លើកកម្ពស់ស្រ្តី ឬយុវវ័យ ឱ្យមានគំនិតចេះកែច្នៃ និងរួមចំណែកដល់សុខមាលភាពសង្គមតាមរយៈ ការផ្តល់អាហារូបត្ថម្ភ តាមបែបធម្មជាតិ ជូនដល់អតិថិជនប្រកបដោយគុណភាព និងអនាម័យខ្ពស់ ក៏ដូចជាជួយជំរុញឱ្យប្រជាជនខ្មែរគាំទ្រ ផលិតផលក្នុងស្រុក ឱ្យកាន់តែទូលំទូលាយ។
ម្ចាស់សិប្បកម្មរូបនេះបញ្ជាក់ថា ៖ «សិប្បកម្មយើងខ្ញុំទទួលការផ្គត់ផ្គង់វត្ថុធាតុដើមពីក្រុមកសិករក្នុងស្រុក ពោលគឺតាមបណ្តាឃុំមួយចំនួនក្នុងស្រុកសង្កែ និងស្រុកសំឡូតផ្ទាល់តែម្ដង ហើយការកែច្នៃផលិតផលក្នុងស្រុកនេះ អាចរាប់បានថាជាផ្នែកមួយជួយលើកកម្ពស់បងប្អូនកសិករក្នុងតំបន់ ក៏ដូចជាផ្ដល់ការងារដល់ស្ត្រីក្នុងសហគមន៍ ខណៈក្នុងសិប្បកម្មយើងមានសមាជិក ៨០ភាគរយជាស្ត្រី»។
ដោយឡែក សម្រាប់ទីផ្សារផលិតផលសិប្បកម្មរបស់ខ្លួន ម្ចាស់អាជីវកម្មស្ត្រីរូបនេះបានឱ្យដឹងថាកំពុងមានការចាប់អារម្មណ៍ ឬសន្ទុះគាំទ្រច្រើនជាងមុន ដោយសារខ្លួនព្យាយាមពង្រីកការផ្សព្វផ្សាយឱ្យបានទូលាយជាងមុន។
មកទល់បច្ចុប្បន្ន លោកស្រី សំណាង បានឱ្យដឹងថា សិប្បកម្មរបស់ខ្លួនបានបន្តកែច្នែផលិតផលជាបន្តបន្ទាប់រហូតមានផលិតផលជាច្រើនមុខដូចជា ម្សៅចេកសុខភាព ម្សៅរមៀតសុខភាព ម្សៅខ្ញីសុខភាព ម្សៅពន្លៃ ម្សៅរំដេង ម្សៅខ្ជាយ តែខ្ញីទឹកឃ្មុំ ហើយក៏មានផលិតផលថ្មីៗដូចជា ប្រេងល្ងខ្មៅ ម្សៅចេកសម្រាប់ទារក និងក្រមួនលាបរឹតជាដើម។
ដ្បិតថាជាផលិតផលដែលកែច្នៃពីធម្មជាតិ តែការផលិតក៏មានដំណាក់កាលច្រើន និងប្រកបដោយភាពសម្អិតសម្អាតផងដែរ។ ក្នុងចំណោមផលិតផលខាងលើ លោកស្រី សំណាង បានរៀបរាប់ត្រួសៗឱ្យដឹងពីដំណាក់កាលនៃការផលិតម្សៅចេកមួយ មានដំណាក់កាលដល់ទៅប្រាំបួន ពោលគឺចាប់តាំងពីការបកសម្បក លាងសម្អាត កិន និងរ៉ែងម្សៅចេក ដើម្បីឱ្យសាច់នៃម្សៅម៉ត់មានភាពស្មើរសាច់បានល្អជាដើម រហូតដល់ការវេចខ្ចប់។
ទាក់ទិនទៅនឹងតម្លៃ និងបរិមាណនៃការលក់ចេញរបស់ខ្លួន លោកស្រី សេង សំណាង បានរៀបរាប់ដោយឥតលាក់លៀមថា សិប្បកម្មរបស់ខ្លួនអាចលក់បានចំនួនរយកំប៉ុងក្នុងមួយខែ។
លោកស្រី បញ្ជាក់ថា៖ «សម្រាប់តម្លៃ ដូចជាម្សៅចេក គឺមានតម្លៃពីរ ខុសគ្នា។ ម្សៅចេក៣០០ក្រាមមានតម្លៃ ៨ដុល្លារអាមេរិក។ ឯចំនួន ៥០០ក្រាមមានតម្លៃ ១៥ដុល្លារ ហើយបើគិតជាខែគឺខ្ញុំអាចលក់បាន៤៥០កំប៉ុងក្នុងមួយខែ»។
ទោះបីបច្ចុប្បន្នទទួលបានភាពជោគជ័យគួរសម តែម្ចាស់អាជីកម្មរូបនេះនៅតែមានបំណងពង្រីកអាជីវកម្មតទៅមុខទៀត។លោកស្រីក៏បាននាំយកអាជីវកម្មរបស់ខ្លួនចូលរួម ពិធីតាំងលក់នៅឯកីឡដ្ឋានមរតតេជោក្នុងព្រឹត្តិការណ៍ស៊ីហ្គេមផងដែរ និងព្រមទាំងមានក្តីសង្ឃឹមថា មានទទួលស្គាល់បន្ថែមពីសំណាក់មហាជន ឬអតិថិជនថ្មី។
គួរជម្រាបដែរថា តាមរយៈ គណៈកម្មាធិការជាតិជំរុញចលនា ភូមិមួយផលិតផលមួយ ក្នុងនោះផលិតផលខ្មែរចំនួន ៤៥ មុខ ត្រូវបានដាក់តាំងបង្ហាញក្នុងព្រឹត្តិការណ៍ស៊ីហ្គេមលើកទី៣២ នៅ ពហុកីឡដ្ឋានមរតកតេជោ ចាប់ពីថ្ងៃទី ៤ ដល់ថ្ងៃទី ១៦ ខែឧសភា ឆ្នាំ ២០២៣។
លោក សួង ណយ អគ្គលេខាធិការរងគណៈកម្មាធិការជាតិជំរុញចលនា ភូមិមួយផលិតផលមួយ បានឱ្យដឹងថា សហគ្រាសនីមួយៗនឹងតាំងបង្ហាញផលិតផលរបស់ខ្លួនយ៉ាងតិចបីផលិតផលក្នុងព្រឹត្តិការណ៍ស៊ីហ្គេមខាងមុខ។
លោកបន្ថែមថា គណៈកម្មការកំពុងតែខិតខំធ្វើយ៉ាងណា លើកមុខមាត់កម្ពុជាតាមរយៈ ផលិតផលក្នុងស្រុក ដែលសុទ្ធសឹងតែកើតចេញពីវត្ថុធាតុដើមក្នុងស្រុក និងដែលមានស្តង់ដារគ្រប់គ្រាន់ ស័ក្ដិសមនឹងមានការទទួលស្គាល់ពីសំណាក់ភ្ញៀវជាតិ និងអន្តរជាតិ៕
ដោយ៖ស្រ៊ុន សិរី វឌ្ឍនៈ
