អង់គ្លេស៖ គណបក្សពលករកំពុងពិចារណាផ្ដល់សិទ្ធិបោះឆ្នោតដល់ពលរដ្ឋសហភាពអឺរ៉ុប

ឡុងដ៍៖គណបក្សពលករអង់គ្លេសកំពុងពិចារណាផ្ដល់សិទ្ធិបោះឆ្នោតដល់ពលរដ្ឋសហភាពអឺរ៉ុបមួយចំនួនដែ​លកំពុងរស់នៅក្នុងប្រទេសអង់គ្លេស ប្រសិនបើគណបក្សនេះឈ្នះការបោះឆ្នោតសកលនាពេលខាងមុខនេះ។

មួយរយៈចុងក្រោយនេះ គណបក្សនេះកំពុងធ្វើការយ៉ាងយកចិត្តទុកដាក់ទៅលើសំណើមួយចំនួន ក្នុងនោះរួមមានការទទួលបានសិទ្ធិបោះឆ្នោតរបស់ពលរដ្ឋសហភាពអឺរ៉ុប និងសិទ្ធិបោះឆ្នោតរបស់ក្មេងអា​យុ ១៦ និង១៧ ឆ្នាំនៅក្នុងការបោះឆ្នោតសកល។​

សូម​រំឭកថា កាលពីឆ្នាំ២០២០ មេដឹកនាំគណបក្សពលករ លោក សៀគៀ ស្ថាម័រ (Sir Keir Starmer) ធ្លាប់បានអំពាវនាវរួចមកហើយ ក្នុងការអនុញ្ញាតឱ្យពលរដ្ឋសហភាពអឺរ៉ុបទាំងអស់ទទួលបានសិទ្ធិបោះឆ្នោតពេញលេញនៅក្នុងប្រទេសអង់គ្លេស។ យ៉ាងណាក៏ដោយ គណបក្សនេះបានលើកឡើងថា​ ​មិនទាន់មានការ​សម្រេច​ចេញជា​គោល​នយោបាយណាមួយនៅឡើយ​នោះទេ។​​

លោក ចូណាថាន់ រេណុលស៍ (Jonathan Reynolds) លេខាធិការផ្នែកអាជីវកម្មរបស់គណបក្សពលករ​បានប្រាប់សារព័ត៌មាន BBC News កាលពីថ្ងៃអាទិត្យថា ៖ «យើងចង់ពង្រឹងលទ្ធិប្រជាធិបតេយ្យ​របស់យើង។ យើងជឿថាប្រសិនបើប្រជាជននៃសហភាពអឺរ៉ុបបានរួមចំណែកដល់ប្រទេសនេះ និងប្រ​សិនបើពួកគេកំពុងរស់នៅទីនេះ វាគឺជាការល្អដែលអាចអនុញ្ញាឱ្យពួកគេចូលរួមក្នុងដំណើរការប្រជាធិបតេយ្យរបស់យើង»។​

ដោយឡែក គណបក្សអភិរក្សនិយមរបស់អង់គ្លេសបានលើកឡើងថា «ផែនការរបស់គណបក្សពលករគឺជាមូលដ្ឋានគ្រឹះក្នុងការទាញ​ប្រទេសអង់គ្លេសឱ្យត្រលប់ទៅរកសហភាពអឺរ៉ុបវិញ»។ ប្រធានគណបក្សអភិរក្សនិយម លោក ហ្គេគ ហែនដ៍ (Greg Hands) បានថ្លែងថា ៖ «សិទ្ធិបោះឆ្នោតនៅក្នុងការបោះឆ្នោតសភា និងការជ្រើសរើសរដ្ឋាភិបាលអង់គ្លេសនៅពេលខាងមុខ ត្រូវតែផ្ដល់សិទ្ធិជូនចំពោះពលរដ្ឋអង់គ្លេសតែប៉ុណ្ណោះ និងអ្នកដែលមានទំនាក់ទំនងប្រវត្តិសាស្ត្រជិតស្និទ្ធបំផុតជាមួយប្រទេសរបស់យើង»។​

បច្ចុប្បន្ននេះ ពលរដ្ឋសហភាពអឺរ៉ុបដែលមានទីលំនៅស្របច្បាប់ក្នុងប្រទេសអង់គ្លេសអាចបោះឆ្នោតនៅក្នុងការបោះឆ្នោតថ្នាក់ក្រោមជាតិ ប៉ុន្តែមិនមានសិទ្ធិបោះឆ្នោតក្នុងការបោះឆ្នោតសកលនោះទេ។ យោងតាមគណបក្សពលករបានឱ្យដឹងថា គណបក្សមួយនេះកំពុងគិតអំពីការធ្វើយ៉ាងណាឱ្យប្រជាជនដែលរស់នៅអង់គ្លេស អាចរួមចំណែកដល់សង្គមរបស់យើង និងអាចមានសំឡេងទៅលើរបៀបដែលប្រទេសអង់គ្លេសត្រូវបានគ្រប់គ្រង និងដឹកនាំ។​

ប្រភពដដែល​បាន​ឱ្យដឹង​ថា លោក សៀគៀ ជឿ​ជាក់​ថា​វា​គឺរឿងដែលយុត្តិធម៌ និង​ត្រឹម​ត្រូវបំផុតក្នុង​ការដែលអាច​ផ្តល់​សំឡេង​ដល់​ពលរដ្ឋសហគមន៍អឺរ៉ុប​ក្នុង​ការ​បោះ​ឆ្នោតបាន។

យ៉ាងណាមិញ សំណើនេះមិនទាន់ត្រូវបានសម្រេចនៅឡើយទេ។ បច្ចុប្បន្ននេះ មានពលរដ្ឋសហភាពអឺរ៉ុបប្រមាណជា ៣,៤ លាននាក់ដែលបានមកតាំងទីលំនៅក្នុងប្រទេសអង់គ្លេសក្រោយការចាកចេញពីសហភាពអឺរ៉ុប និងប្រមាណជា ២,៧ លាននាក់ទៀតដែលបានតាំងទីលំនៅមុនការចាកចេញពីសមាជិកភាពអឺរ៉ុប។​

ជាថ្មីម្ដងទៀត ក្រុមអភិរក្សនិយមបានធ្វើការបដិសេធទាំងស្រុងទៅលើសំណើសុំឱ្យផ្ដល់សិទ្ធិបោះឆ្នោតដល់ពលរដ្ឋសហភាពអឺរ៉ុប ដោយបានហៅថា វាគឺជាការប៉ុនប៉ងរៀបចំឱ្យអ្នកបោះឆ្នោតចូលរួមជាសមាជិកភាពរបស់សហភាពអឺរ៉ុបឡើងវិញ។

សូម​រំឭកថា នៅឆ្នាំ២០២០ នៅពេលដែលលោក សៀគៀ កំពុងឈរឈ្មោះជាប្រធានគណបក្សពលករ លោកបានតស៊ូមតិ ទាមទារឱ្យមានការផ្ដល់សិទ្ធិបោះឆ្នោតពេញលេញដល់ពលរដ្ឋសហភាពអឺរ៉ុបទាំងអស់ ពោលគឺពលរដ្ឋទាំង ៣ លាននាក់ដែលកំពុងរស់នៅក្នុងប្រទេសអង់គ្លេស។ លោក សៀ​គៀ បានបញ្ជាក់បន្ថែមថា ពលរដ្ឋសហភាពអឺរ៉ុបនៅចក្រភពអង់គ្លេសមិនត្រឹមតែត្រូវបានផ្ដល់សិទ្ធិឱ្យប៉ុណ្ណោះទេ ប៉ុន្តែត្រូវចាត់ទុកថាជាអ្នកជិតខាង ជាមិត្តភក្តិ និងជាក្រុមគ្រួសារទៀតផង៕

ប្រែសម្រសួល៖ធា សុណា