ប៉ារីស៖ ប្រធានាធិបតីបារាំងលោក អេម៉ានូអែល ម៉ាក្រុន (Emmanuel Macron)នៅថ្ងៃទី១៥ ខែឧសភា ឆ្នាំ២០២៣ បានជួបជាមួយមហាសេដ្ឋីលោក អេឡុន ម៉ាសក៍ (Elon Musk) ដើម្បីពិភាក្សាអំពីគម្រោងវិនិយោគនាពេលអនាគត។​ កិច្ចពិភក្សារវាងភាគីទាំងពីរនេះ ធ្វើឡើងនៅក្នុងសន្និសីទមួយនៅប្រទេសបារាំង ក្នុងគោលបំណងបញ្ចុះបញ្ចូលអ្នកវិនិយោគទៅលើគម្រោងអាជីវកម្មធំៗ ឱ្យដាក់ទុនរកស៊ីនៅទេសបារាំង។​

ការិយាល័យរបស់លោក ម៉ាក្រុន បានលើកឡើងថា លោក ម៉ាក្រុន បានធ្វើជាម្ចាស់ផ្ទះទទួលស្វាគមន៍បុរសអ្នកមានដែលជាប់ចំណាត់ថ្នាក់ទីពីររបស់ពិភពលោក ពោលគឺលោក អេឡុន ម៉ាសក៍ ដែលលោកគឺជានាយកប្រតិបត្តិនៃក្រុមហ៊ុនរថយន្តអគ្គិសនី Tesla ក្រុមហ៊ុនប្រព័ន្ធផ្សព្វផ្សាយសង្គម Twitter និងក្រុមហ៊ុនរុករកអវកាស SpaceX។

នេះគឺជាការជួបគ្នាម្ដងទៀត បន្ទាប់ពីលោក ម៉ាក្រុន និងលោក ម៉ាសក៍ ធ្លាប់បានជួយគ្នាម្ដងរួចមកហើយកាលពី ៦ ខែមុននៅសហរដ្ឋអាមេរិក។​

គួរដឹងដែរថា មេដឹកនាំប្រទេស និងមេដឹកនាំក្រុមហ៊ុនឯកជនទាំងពីរបានជួបប្រជុំគ្នានៅវិមាន អេលីស៊ី (Elysee) មុនពេ​លអ្នកទាំងពីរធ្វើដំណើរបន្តទៅកាន់ទីក្រុង វឺសាយេស (Versailles) ដើម្បីធ្វើសន្និសីទមួយដែលត្រូវបានជ្រើសរើសទីតាំងដោយភាគីបារាំងនិងដែលលោក ម៉ាក្រុន បានបង្ហាញពីឆន្ទៈប្រមូលផ្តុំការវិនិយោគនៅក្នុងប្រទេសបារាំងនៅតំបន់នោះ។​

យោងតាមការិយាល័យរបស់លោក ម៉ាក្រុន បានប្រាប់ឱ្យដឹងថា បុរសទាំងពីរនឹងជជែកពិភាក្សាពីភាពទាក់ទាញរបស់ប្រទេសបារាំង ​ពិសេសនៅក្នុងវិស័យឧស្សាហកម្ម។ លោក ម៉ាសក៍ បានញញឹម និងគ្រវីក្បាលទៅកាន់អ្នកសារព័ត៌មាន ខ​ណៈដែលកិច្ចប្រជុំកំពុងប្រព្រឹត្តទៅ ប៉ុន្តែលោកមិនបានផ្ដល់ការអត្ថាធិប្បាយអ្វីបន្ថែមនោះទេ។​

រដ្ឋមន្ត្រីក្រសួងហិរញ្ញវត្ថុបារាំង លោក ព្រូណូ ឡឺមៀ (Bruno Le Maire) បានប្រាប់ទូរទស្សន៍មួយឈ្មោះថា BFMTV ថា «ការចរចាកំពុងបន្តប្រព្រឹត្តទៅជាមួយមហាសេដ្ឋី លោក អេឡុន ម៉ាសក៍»។ ស្រដៀងគ្នានេះដែរ លោកមិនបានផ្តល់ព័ត៌មានលម្អិតអំពីកិច្ចពិភាក្សាកាលពីថ្ងៃច័ន្ទជាមួយលោក ម៉ាសក៍ នោះទេ ដោយលោកបាននិយាយយ៉ាងសាមញ្ញថា «រាល់ការវិនិយោគដែលអាចកើតមានឡើងនៅថ្ងៃនេះ គឺជាលទ្ធផលដែលទទួលបានបន្ទាប់ពីមានការចរចាអស់រយៈពេលជាច្រើនខែ ឬឆ្នាំឯណោះ»។​

គួររំឭកថា ក្នុងអំឡុងពេលធ្វើដំណើរទៅកាន់សហរដ្ឋអាមេរិកកាលពីខែធ្នូ លោក ម៉ាក្រុន បានជួបពិភាក្សាជាមួយលោក ម៉ាសក៍ ដោយមិនបានប្រកាសឱ្យសាធារណៈជនបានដឹងជាមុននោះទេ។ ក្រោយមក លោក​​ ម៉ាក្រុន បានពណ៌នាអំពីការជជែកពិភាក្សារយៈពេលមួយម៉ោងពេញជាមួយលោក ម៉ាសក៍ ថាជាការពិភាក្សាមួយដែលមានភាពច្បាស់លាស់ និងស្មោះត្រង់ ដោយបានលើកឡើងអំពីប្រធានបទមួយចំនួនដូចជារថយន្តអគ្គិសនី និងអាគុយជាដើម។

បន្ថែមលើនេះ លោក ម៉ាក្រុន ក៏បាននិយាយទៅកាន់ លោក ម៉ាសក៍ ថា នៅអឺរ៉ុបកំពុងមានការព្រួយបារម្ភជាខ្លាំង អំពីបញ្ហាមាតិកានៅលើបណ្ដាញសង្គម Twitter ចាប់តាំងពី លោក ម៉ាសក៍ បានទិញ និងគ្រប់គ្រងវេទិកាដ៏មានឥទ្ធិពលមួយនេះ។​

ជាក់ស្ដែង លោក ម៉ាក្រុន បានសរសេរនៅលើបណ្ដាញសង្គម Twitter បន្ទាប់ពីកិច្ចប្រជុំនោះថា «គោលនយោបាយស្ដីអំពីអ្នកប្រើប្រាស់ប្រកបដោយតម្លាភាព ការរឹតបន្តឹងប្រភេទមាតិកា និងការការពារសេរីភាពនៃការបញ្ចេញមតិ គឺសុទ្ធតែជារឿងដែលត្រូវធ្វើឡើងដោយក្រុមហ៊ុន Twitter ដើម្បីអនុលោមតាមបទប្បញ្ញត្តិរបស់អឺរ៉ុប»៕​

ប្រែសម្រួល៖ធា សុណា ប្រភព​៖ ​https://www.channelnewsasia.com/world/macron-musk-investment-projects-paris-3489676