រ៉ូម៖ កញ្ចប់ជំនួយសង្គ្រោះបន្ទាន់ចំនួន ២.២ពាន់លានដុល្លារ សម្រាប់តំបន់រងគ្រោះដោយទឹកជំនន់នៅប្រទេសអ៊ីតាលី ត្រូវបានអនុម័ត។

នាយករដ្ឋមន្ត្រីអ៊ីតាលី លោកស្រី ចរ ជៀស មេឡូនី ( Giorgia Meloni) បាននិយាយ នៅថ្ងៃអង្គារ សប្តាហ៍នេះ ថា ប្រទេសអ៊ីតាលីបានអនុម័តកញ្ចប់ជំនួយសង្គ្រោះបន្ទាន់ ដែលមានតម្លៃជាង ២ពាន់លានអឺរ៉ូ (២.២ពាន់លានដុល្លារ) ដើម្បីជួយតំបន់ដែលរងផលប៉ះពាល់ដោយទឹកជំនន់នៅភាគខាងជើងនៃតំបន់ អេមីលា រ៉ូម៉ាញ៉ា (Emilia-Romagna)។

ជិតមួយសប្តាហ៍បន្ទាប់ពីគ្រោះមហន្តរាយធម្មជាតិ មនុស្សប្រហែល ២៣,០០០នាក់នៅតែគ្មានផ្ទះសម្បែង ហើយទីក្រុងមួយចំនួននៅតែជន់លិច ខណៈដែលដីស្រែមានជីជាតិពិសេសរាប់ពាន់ហិចតាត្រូវបានបំផ្លាញ។

លោកស្រី មេឡូនី ដែលបានទៅទស្សនាតំបន់រងគ្រោះកាលពីថ្ងៃអាទិត្យ បានកោះប្រជុំគណៈរដ្ឋមន្ត្រី កាលពីថ្ងៃអង្គារ ដើម្បីអនុម័តវិធានការនេះ។

លោកស្រី មេឡូនី បាននិយាយបន្ទាប់ពីកិច្ចប្រជុំគណៈរដ្ឋមន្ត្រីថា កញ្ចប់ជំនួយសង្គ្រោះបន្ទាន់នេះ រួមបញ្ចូលការចំណាយទាក់ទងនឹងគ្រាអាសន្ន ក៏ដូចជាការផ្អាកពន្ធ និងវិភាគទានសង្គមសម្រាប់គ្រួសារ និងក្រុមហ៊ុនដែលរងផលប៉ះពាល់៕ ប្រភពពី AFP ប្រែសម្រួល៖ សារ៉ាត