អាមស្ទឺដាម៖ សកម្មជនអាកាសធាតុជាង ១៥០០ នាក់ត្រូវបានចាប់ខ្លួននៅក្នុងការតវ៉ាប្រឆាំងនឹងឥន្ធនៈហ្វូស៊ីល នៅទីក្រុងឡាអេ ប្រទេសហូឡង់។

ប៉ូលីសហូឡង់បាននិយាយថា មនុស្សជាង ១៥០០ នាក់ត្រូវបានចាប់ខ្លួន ក្នុងអំឡុងពេលតវ៉ាដោយ ក្រុមដែលគេស្គាល់ថា «ការបះបោរ ផុតពូជ» ឬ Extinction Rebellion នៅទីក្រុងឡាអេ នាពេលថ្មីៗនេះ។

ក្រុមសកម្មជនបានបិទផ្លូវមួយនៅកណ្តាលទីក្រុង នៅពេលរសៀល ដើម្បីតវ៉ាប្រឆាំងនឹងការឧបត្ថម្ភធនឥន្ធនៈហ្វូស៊ីល របស់ប្រទេសហូឡង់។ ប៉ូលីសបាននិយាយថា ពួកគេបានប្រើកាណុងបាញ់ទឹកដើម្បីបំបែកក្រុមសកម្មជនដែលបិទផ្លូវធំក្នុងទីក្រុង ហើយបានចាប់ខ្លួន មនុស្សសរុបចំនួន ១៥៧៩។ ប៉ូលីសបាននិយាយថា សកម្មជនម្នាក់បានខាំប៉ូលីសម្នាក់ អំឡុងពេលចាប់ខ្លួនគាត់។

តារាល្បីហូឡង់ជាច្រើននាក់ស្ថិតក្នុងចំណោមបាតុករ រួមទាំងតារាសម្តែងក្នុងរឿងភាគទូរទស្សន៍ដ៏ល្បី ក្រោមចំណងជើងថា ហ្គេម អហ្វ ស្រូន (Game of Thrones) ផងដែរ។

ទីភ្នាក់ងារសារព័ត៌មានហូឡង់ ANP បានរាយការណ៍ថា តារាស្រីរូបនេះត្រូវបានចាប់ខ្លួន ប៉ុន្តែក្រោយមកត្រូវបានអនុញ្ញាតឱ្យត្រឡប់ទៅផ្ទះវិញ៕ ប្រភពពី AFP ប្រែសម្រួល៖ សារ៉ាត