​កង់បេរ៉ា៖ ប្រទេស​​​អូស្ត្រាលី​​បាន​និយាយ​នៅ​ថ្ងៃ​ព្រហស្បតិ៍​​ទី​ ០៨​ ខែ​មិថុនា​ថា​ ខ្លួន​នឹង​ដាក់​​ច្បាប់​​ទៅ​សភា​នៅសប្តាហ៍​ក្រោយ​ ដែល​នឹង​ហាម​ឃាត់​ការ​បង្ហាញឬ​ការ​ប្រើ​ប្រាស់​​ជា​សាធារណៈ​ និង​ការ​លក់​និមិត្ត​សញ្ញា​​​របស់​ណាហ្ស៊ី​ ដោយ​លើក​ឡើង​ពី​ការ​កើន​ឡើង​នៃ​​ក្រុម​ស្តាំ​ជ្រុល​​និយម​នៅ​​ក្នុង​ស្រុក​។ នេះ​បើ​តាម​ការ​ចុះ​ផ្សាយ​របស់ទីភ្នាក់ងារ​សារព័ត៌មាន​រ៉យទ័រ​។

និមិត្ត​សញ្ញាស្វាស្ទីកា​ (Swastika)  ​និង​​និមិត្ត​សញ្ញា​ Schutzstaffel (SS) ​​របស់​អង្គភាព​​​​​យោធា​ប៉ារ៉ា​ នៃ​​គណបក្ស​ណាស៊ី ​នឹង​ត្រូវ​បាន​ហាម​ឃាត់​មិន​ឱ្យ​ប្រើ​ប្រាស់​ មិន​ថា​​ក្នុង​ទម្រង់​ជា​​ទង់​ជាតិ​​ ​​ខ្សែ​​ដៃ​​ ឬ​​​ពុម្ព​លើ​សម្លៀក​បំពាក់​។​

​អគ្គមេធាវី​សហព័ន្ធ​​អូស្រ្តាលី​​លោក​ Mark Dreyfus ​បាន​ប្រាប់​ទូរទស្សន៍​ Channel Seven ​ថា​​៖ «​ដូច​ដែល​យើង​បាន​ឃើញ​ហើយ​ និង​គួរ​ឱ្យ​សោក​ស្តាយ​ខ្លាំង​​ថា​ ​មាន​​ការ​កើន​ឡើង​នៃ​ចំនួន​មនុស្ស​បង្ហាញ​និមិត្ត​សញ្ញា​ដ៏​អាក្រក់​ទាំង​នេះដែល​ជា​និមិត្ត​សញ្ញាគួរ​ឱ្យ​ស្អប់​ខ្ពើម​និង​​មិន​ត្រូវ​​មាន​ក្នុង​ប្រទេស​អូស្រ្តាលី​»។

លោក Dreyfus បាន​និយាយ​ទៀត​​ថា​៖ «​គួរ​ឱ្យ​សោក​ស្ដាយ​ យើង​បាន​ឃើញ​​អំពើ​ហិង្សា​​ទាក់​​ទង​នឹង​ព្រឹត្តិការណ៍​សាធារណៈ​មួយ​ចំនួន​ ដែល​មនុស្ស​ទាំង​​នោះ​បាន​ធ្វើ​»​។ លោក​បាន​គូស​បញ្ជាក់​ថា​ ​​ការ​ហាម​ប្រាម​លើ​ការ​ប្រើ​ប្រាស់​និមិត្ត​សញ្ញា​របស់​ណាហ្សី​ នឹង​​មិន​បញ្ចូល​ទៅ​ក្នុង​ច្បាប់​សហព័ន្ធ​នោះ​ទេ​ ព្រោះ​​រដ្ឋាភិបាល​​រ​ដ្ឋ​ និង​​​ប្រទេស​ទាំង​មូល​ ​អាច​​អនុវ​ត្ត​​បម្រាម​​នោះ​​ក្នុង​​វិធី​​ដែល​​មាន​​ប្រសិទ្ធ​ភាព​​ជាង​​នេះ​។​

អគ្គមេធាវី​ដដែល​បន្ត​ថា​៖ «​​រដ្ឋាភិបាល​រដ្ឋ​ មាន​ទំនួល​ខុស​ត្រូវ​បន្ថែម​ទៀត​ចំពោះ​អ្វី​ដែល​អ្នក​អាច​ហៅ​ថា​ បទ​ល្មើស​តាម​ដង​ផ្លូវ​ ហើយ​ច្បាប់​របស់​យើង​ដាក់​បង្ហាញ​ជា​សាធារណៈនិង​រួម​បញ្ចូល​តាម​អ៊ីនធឺណិត​»​។

គួរ​គូស​បញ្ជាក់​ថា​ ការ​ប្រកាស​របស់​អូស្រ្តាលី​នា​ពេល​នេះ​ ធ្វើ​​ឡើង​​បន្ទាប់​ពី​ទីភ្នាក់ងារ​ចារកម្ម​របស់​ប្រទេស​អូស្ត្រាលី​ បាន​ព្រមាន​ក្រុម​ស្តាំ​ជ្រុល​និយម​ ​​កំពុង​កើន​ឡើង​នៅ​ក្នុង​ស្រុកកាន់​តែ​ច្រើន​ តាម​រយៈ​ការ​បង្ហាញ​ និង​សកម្មភាព​ផ្សេង​ៗ​។

​កាល​ពី​ខែ​មីនា​ក្រុម​​​ណាហ្ស៊ី​​និយម​​បាន​ប៉ះ​ទង្គិច​ជាមួយ​ក្រុម​អ្នក​តវ៉ា​សិទ្ធិ​អ្នក​ប្តូរ​ភេទ​នៅ​ទី​ក្រុង​ Melbourne ​ហើយ​ថែម​ទាំង​បាន​លើក​ដៃ​ធ្វើ​ការ​គោរព​តាម​​ពួក​ណាហ្ស៊ី​​ក្បែរ​​អគារ​សភា​រដ្ឋ​។​ ​កាល​​​ពី​​ឆ្នាំ​​មុន​អ្នក​​គាំ​​ទ្រ​​កីឡា​​បាល់​​ទាត់​​ម្នាក់​​ដែល​​លើក​​ដៃ​គោរព​តាម​ពួក​ណាហ្ស៊ី​​​​នៅ​​វគ្គ​​ផ្តាច់​​ព្រ័ត្រ​ Australia Cup ​ត្រូវ​​បាន​​ហាម​​ប្រាម​​អស់​​មួយ​​ជីវិត​​ពី​​ការ​ចូល​រួម​មើល​ការ​​​ប្រកួត​​ពី​សមាគម​បាល់​ទាត់​អូស្រ្តាលី​។ ​

ទាក់​ទង​នឹង​​ទោស​ក្នុង​ច្បាប់​ថ្មី​របស់​អូស្រ្តាលី​ លោក​ ​Dreyfus ​ឱ្យ​ដឹង​ថា​ ​ជន​​ល្មើស​​អាច​​ជាប់​​ពន្ធនាគារ​​រហូត​​ដល់​ ១២ ​ខែ។​ទន្ទឹមនេះការ​ប្រើ​ប្រាស់​និមិត្ត​សញ្ញា​ស្វាស្ទីកា​ផ្សេង​ៗ​ ក៏​នឹង​ត្រូវ​លើក​លែង​ក្នុង​បម្រាម​ផង​ដែរ​ ​ដូច​ជា​ការ​​​​ប្រើ​ប្រាស់​ក្នុង​ន័យ​​សិល្បៈ ​ការ​សិក្សា ​ឬ​​សាសនា​ ដោយ​សារ​តែ​និមិត្ត​សញ្ញា​នេះក៏​មាន​​​ក្នុង​​​​ហិណ្ឌូសាសនា​​ ពុទ្ធ​សាសនា​ និង​​​​​សាសនា​​ជេន ( Jainism)៕

ប្រែសម្រួល៖ ហួន ឌីណា

ប្រភព​៖ Australia to ban swastika, SS sign citing rise of far-right  https://www.channelnewsasia.com/asia/australia-ban-swastika-ss-sign-citing-rise-far-right-3547051  ​