គិតចាប់ពីខែធ្នូ ឆ្នាំ២០២២ មកដល់បច្ចុប្បន្នអាជ្ញាធរជាតិអប្សរាដាំកូនឈើសរុបចំនួន២២.៩៦៣ ដើម
ភ្នំពេញ៖ គិតចាប់តាំងពីខែធ្នូឆ្នាំ២០២២រហូតមកដល់បច្ចុប្បន្នអាជ្ញាធរជាតិអប្សរាបានដាំកូនឈើសរុបបានចំនួន២២.៩៦៣ដើម និងដាំស្មៅបានចំនួន ២៧.៤៨១ម៉ែត្រការ៉េ ដើម្បីបំពេញបន្ថែមនៅលើដី ដែលប្រជាពលរដ្ឋបានស្ម័គ្រចិត្តចាកចេញពីតំបន់អង្គរទៅរស់នៅតំបន់អភិវឌ្ឍន៍ពាក់ស្នែងនិងតំបន់រុនតាឯក ស្របតាមគោលនយោបាយរបស់រាជរដ្ឋាភិបាលកម្ពុជា។ នេះបើតាមប្រភពអាជ្ញាធរជាតិអប្សរានៅថ្ងៃទី១០ ខែមិថុនាឆ្នាំ២០២៣។
អាជ្ញាធរជាតិអប្សរាបានឱ្យដឹងថា ចំនួនស្មៅ និងដើមឈើដែលបានដាំនេះ ធ្វើឡើងក្រោមកិច្ចសហការ ជាមួយនឹងស្ថាប័នពាក់ព័ន្ធ វិស័យឯកជន និងអង្គការដៃគូនានាផងដែរ។
ពាក់ព័ន្ធនឹងបញ្ហានេះឯកឧត្តម ឡុង កុសល អ្នកនាំពាក្យអាជ្ញាធរជាតិអប្សរានៅថ្ងៃទី១១ ខែមិថុនាបានប្រាប់ឱ្យដឹងថា ការងារដាំដើមឈើ និងស្មៅ នៅក្នុងតំបន់រមណីយដ្ឋានអង្គរ និងទីតាំងដែលពលរដ្ឋបានរើទៅតំបន់អភិវឌ្ឍន៍រុនតាឯក និងពាក់ស្នែង ដើម្បីបង្កើនទេសភាពបៃតង គឺជាកិច្ចការងារដែលអាជ្ញាធរជាតិអប្សរាធ្វើជាប្រចាំថ្ងៃ។
លោកបានបន្តថា អាជ្ញាធរជាតិអប្សរាបានដាំដើមឈើ និងស្មៅទាំងនេះ មិនទាន់ចប់នោះទេ គឺនឹងនៅមានផែនការបន្តពង្រីការដាំបន្ថែមទៀត ពិសេសត្រូវដាំនៅទីតាំងដែលប្រជាពលរដ្ឋរើទៅតំបន់អភិវឌ្ឍន៍រុនតាឯង និងតំបន់ពាក់ស្នែង ព្រោះទីតាំងបរិវេណនេះ មានវិសាលភាពធំ ហើយទោះជាមិនមានរៀបចំពិធីដាំ ក៏ខាងយើងនៅតែមានការដាំជាបន្តបន្ទាប់ដែរ ។
ជាមួយគ្នានេះឯកឧត្តម ឡុង កុសល ក៏បានអំពាវនាវដល់វិស័យឯកជននិងអង្គការដៃគូនានាមកចូលរួមដាំដើមឈើនិងស្មៅនៅក្នុងតំបន់អង្គរនេះបន្ថែមទៀតដើម្បីប្រែក្លាយឱ្យទៅជាតំបន់បៃតងដើម្បីទាក់ទាញភ្ញៀវទេសចរជាតិ និងអន្តរជាតិមកលេងកម្សាន្តកាន់តែច្រើនថែមទៀត។
បើតាមឯកឧត្តម ឡុង កុសល ដើមឈើដែលបានដាំនៅទីតាំងទាំងនេះ ជាការផលិតដោយអាជ្ញាធរជាតិអប្សរា និងជាប្រភេទឈើចម្រុះដែលមាននៅក្នុងប្រទេសកម្ពុជា រីឯស្មៅ ត្រូវបានទិញពីគេយកមកដំា។
សូមរម្លឹកដែរថា អាជ្ញាធរជាតិអប្សរា និងគណៈកម្មាធិការអន្តរជាតិសម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ ហៅកាត់ថា អាយ ស៊ី ស៊ី-អង្គរ (ICC-Angkor)កាលពីថ្ងៃទី១០ ខែមិថុនា ដែលដឹកនាំដោយ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសីល្បៈ បានរួមគ្នាដាំស្មៅចំនួន៤០០ម៉ែត្រការ៉េ និងកូនដើមឈើចម្រុះចំនួនជិត ៥០០ ដើម ស្ថិតនៅបរិវេណខាងត្បូងឆៀងខាងលិចប្រាសាទអង្គរវត្ត ក្នុងភូមិទក្សិណខាងត្បូង សង្កាត់គោកចកក្រុងសៀមរាប។
ប្រធានសមាគមមគ្គុទ្ទេសក៍ទេសចរណ៍អង្គរ លោក ខៀវ ធី បានប្រាប់ឱ្យដឹងនៅថ្ងៃទី១១ ខែមិថុនាដែរថា ទីតាំងដែលអាជ្ញាធរជាតិអប្សរាបានដាំដើមឈើ និងស្មៅ នាពេលបច្ចុប្បន្ននេះ មានទេសភាពស្រស់ស្អាត និងស្រស់បំព្រងគួរជាទីមោទនៈ។លោកបន្តថា ទាំងភ្ញៀវទេសចរជាតិ និងអន្តរជាតិ មានអារម្មណ៍ភ្លឺថ្លា ពេលមកលេងតំបន់រមណីដ្ឋានអង្គរ ជាពិសេស ពួកគេគាំទ្រអាជ្ញាធរជាតិអប្សរាចំពោះការដាំដើមឈើ និងស្មៅ ឱ្យបានច្រើនថែមទៀត នៅក្នុតំបន់នេះ ដើម្បីប្រែក្លាយទៅជាតំបន់បៃតង ព្រោះភាគច្រើននៃភ្ញៀវទេសចរ ស្រឡាញ់ព្រៃឈើ និងស្មៅ៕
ដោយ៖គឹម យុត្ថារ៉ូ
