អ៊ីស្លាម៉ាបាដ៖ ភ្លៀងបាន​ធ្លាក់យ៉ាង​ខ្លាំងជោកជាំដោយ​បានវាយលុកនៅតំបន់ភាគពាយ័ព្យនៃប្រទេសប៉ាគីស្ថានកាលពីថ្ងៃ​ទី១០ខែមិថុនា​ដែលបណ្ដាលឱ្យផ្ទះសម្បែងបាន​បាក់រលំនិង​ធ្វើឱ្យមនុស្សយ៉ាងហោចណាស់២៥នា​ក់ស្លាប់ និង​១៤៥ នាក់ផ្សេងទៀតរងរបួស។ នេះបើតាមការរាយការណ៍របស់ទីភ្នាក់ងារសារព័ត៌មាន AP។

យោងតាម​មន្ត្រីផ្នែកជួយសង្គ្រោះជាន់ខ្ពស់លោក Khater Ahmed បាន​ឱ្យដឹងថា ភ្លៀងធ្លាក់ខ្លាំងលាយ​ឡំជា​មួយនឹងព្រិល បានវាយប្រហារស្រុកមួយចំនួននៃខេត្ត Khyber Pakhtunkhwa កាលពីថ្ងៃសៅរ៍កន្លងមកនេះ​។ លោ​កបាន​បន្តថា ក្រុមមន្ត្រីកំពុងធ្វើការដើម្បីផ្តល់ជំនួយសង្គ្រោះបន្ទាន់ដល់អ្នករបួសផងដែរ​។​

ចំណែកឯនាយករដ្ឋមន្ត្រីប៉ាគីស្ថានលោក Shahbaz Sharif បានសម្តែងការសោកសៅ​​ពីការស្លាប់របស់ប្រជាពលរដ្ឋ​ក្នុង​គ្រោះ​ធម្មជាតិនេះ​ហើ​យបានបញ្ជាឱ្យអាជ្ញាធរបង្កើនល្បឿននៃប្រតិបត្តិការសង្គ្រោះ។ បន្ថែម​ពីនេះផងដែរ លោក Sharif ក៏​បានបញ្ជាឲ្យមន្ត្រីដាក់វិធានការបន្ទាន់នៅនឹងកន្លែង ខណៈព្យុះស៊ី​  ក្លូន​ Biparjoy បាន​បក់បោកពី​សមុទ្រ អារ៉ាប់ទៅភាគខាងត្បូងនៃប្រទេសនេះ។ ​

សូម​បញ្ជាក់ថា ប៉ាគីស្ថានជាប្រទេសអាស៊ីខាងត្បូងដែលរងគ្រោះខ្លាំងបំផុត ដោយសារគ្រោះមហន្តរាយធ​ម្មជាតិពាក់ព័ន្ធនឹងអាកាសធាតុ ដែលកាន់តែអាក្រក់ទៅៗដោយសារការប្រែប្រួលអាកាសធាតុនេះ​។ ​

កាលពី​ចុងខែមុនមនុស្ស​ជាង ១០ នាក់ រួមទាំងស្ត្រី និងកុមារបាន​ស្លាប់ដោយសារ ការបាក់ផ្ទាំងទឹកកក ក្នុ​ងអំឡុងពេលមានព្រិលធ្លាក់ខុសប្រក្រតីនារដូវក្តៅនេះ​។ ​កាលពីឆ្នាំមុនដែរ​ ប៉ាគីស្ថានបានរងគ្រោះដោយ​ទឹកជំនន់ដ៏អាក្រក់បំផុត​ក្នុង​ប្រវត្តិសាស្ត្រ របស់​ប្រទេសនេះ ដោយសារភ្លៀងធ្លាក់ខ្លាំង និងការបាក់​ផ្ទាំងទឹកក​ក​។

ទឹកទំនន់​ដែលជោរជន់លើផ្ទៃដី ១ភាគ៣ របស់ប្រទេស បានសម្លាប់មនុស្សយ៉ាងហោចណាស់ ១ ៧៣៩ នាក់ រួ​មទាំងកុមារ ៦៤៧ នាក់ និងប៉ះពាល់ដល់មនុស្ស ៣៣ លាននាក់៕​

ប្រែសម្រួល៖ហួន ឌីណា

ប្រភព: Dozens dead as heavy rains hit Pakistan  https://www.aljazeera.com/news/2023/6/10/dozens-dead-as-heavy-rains-hit-pakistan