ភ្នំពេញ៖ ក្រសួងធនធានទឹក និងឧតុនិយម, ក្រសួងសេដ្ឋកិច្ច និងហិរញ្ញវត្ថុ និងធនាគារវិនិយោគលើវិស័យហេដ្ឋារ​ចនាសម្ព័ន្ធក្នុងតំបន់អាស៊ី AIIB បានរួមគ្នាចុះត្រួតពិនិត្យទីតាំងអនុវត្តផែនការការងារគ្រប់គ្រងទឹក បញ្ជាទឹកដែលស្ថិត​នៅភូមិសាស្រ្តស្ទឹងគ្រៀងទន្លេតូចនៃខេត្តព្រៃវែង ដើម្បីជំរុញការធ្វើទំនើបកម្មវិស្វកម្មលើប្រព័ន្ធធារាសាស្រ្តស្ទឹ​ងគ្រៀងខ្នាតធំ​ បំពាក់នូវស្ថានីយបូមទឹកស្វ័យប្រវត្តិដ៏ទំនើប។

ថ្លែងក្នុងឱកាសចុះពិនិត្យទីតាំងនេះ​កាលថ្ងៃទី​១៨ ខែមិថុនា ឆ្នាំ​​២០២៣ ឯកឧត្តម ចាន់ ស៊ីណាត រដ្ឋលេ​ខាធិការក្រសួងធនធានទឹក និងឧតុនិយម បានឱ្យដឹងថា ក្រសួង និងភាគីពាក់ព័ន្ធ បានចុះធ្វើការត្រួតពិនិត្យទីតាំងអនុវត្តផែនការការងារគ្រប់គ្រងទឹក បញ្ជាទឹក និងប្រើប្រាស់ទឹកប្រកបដោយប្រសិទ្ធភាពខ្ពស់ក្នុងអា​ងទន្លេមេគង្គក្រោម ត្រង់ភូមិសាស្រ្តស្ទឹងគ្រៀងទន្លេតូច។ក្នុងដំណើរបំពេញបេសកកម្មនេះ​ មាន​ការ​ចូលរួមពីសហការីមន្ទីរធនធានទឹក និងឧតុនិយមខេត្តព្រៃវែង មន្ទីរកសិកម្ម រុក្ខាប្រមាញ់ និងនេសាទ អា​ជ្ញាធរថ្នាក់ក្រោមជាតិគ្រប់លំដាប់ថ្នាក់នៃស្រុកពារាំង ស្រុកស៊ីធរកណ្តាល និងក្រុងព្រៃវែង ខេត្តព្រៃវែង ដែ​លជាអ្នកទទួលផលពីប្រព័ន្ធធារាសាស្រ្តខ្នាតធំនេះ​។ ​

​ឯកឧត្តម​បានបញ្ជាក់ថា  ​ប្រព័ន្ធធារាសាស្រ្តស្ទឹងគ្រៀង ដែលកំពុងជំរុញការធ្វើទំនើបកម្មវិស្វកម្មនេះ​ ​មានផ្ទៃដីស្រោចស្រពចំនួន ៣៥ ០០០ ហិកតា​ គិតចាប់ពីទន្លេតូចត្រង់ភូមិសាស្រ្តតំបន់ស៊ីធរកណ្តាល តំបន់ព្នៅពីរ តំបន់ជ្រៃឃ្មុំ តំបន់ពារាំង តំបន់មេសរប្រចាន់ តំបន់ព្រៃស្រឡិត តំបន់កញ្ជំ តំបន់រកា តំបន់ពោធិរៀ​ង តំបន់ព្រៃកន្លោង រហូតដល់តំបន់ចុងប៉មព្រែកតាតាំ ក្នុងខេត្តព្រៃវែង និងបណ្តាតំបន់ជាច្រើនទៀតដែ​លនៅជាប់នឹងផ្លូវជាតិលេខ​ ៨​ របស់ខេត្តកណ្តាលផងដែរ​។​

ពាក់ព័ន្ធការធ្វើទំនើបកម្មវិស្វកម្មលើប្រព័ន្ធធារាសាស្រ្តស្ទឹងគ្រៀងនេះដែរ ឯកឧត្តម លឹម គានហោ រដ្ឋមន្ដ្រីក្រ​សួងធនធានទឹក និងឧតុនិយម ធ្លាប់​បាន​​លើកឡើងដោយ​ជំរុញឱ្យមានការអនុវត្តដោយហ្មត់ចត់​ និងស​ក​ម្មបំផុត ដើម្បី​ធ្វើការអភិវឌ្ឍវិស័យធនធានទឹក និងឧតុនិយម​ ឱ្យសម្រចបានលទ្ធផលល្អប្រសើរ​។ ក្រសួងបាន និងកំពុងខិតខំយកចិត្តទុកដាក់ក្នុងកិច្ចសហប្រតិបត្តិការជាមួយនឹងដៃ​គូអភិវឌ្ឍន៍ទាំងទាំងជាតិ និងអន្តរជាតិ ​សំ​ដៅ​ធ្វើការកសាងនូវផែនការការងារវិនិយោគលើការគ្រប់គ្រងធ​នធានទឹក ប្រើប្រាស់ទឹក បញ្ជាទឹក ពង្រឹង​ និងពង្រីកវិស័យឧតុនិយមរយៈពេលវែង ​ក្នុងនោះផែ​នការកា​រងារក្នុ​ងការធ្វើទំនើបកម្មវិស្វកម្មនៃអាងទន្លេមេគង្គក្រោមត្រង់ភូមិសាស្រ្តស្ទឹងគ្រៀង​ ជាផ្នែកមួយនៃផែន​កា​រ​ការងារដ៏សំខាន់របស់ក្រសួងផងដែរ។​

គួរបញ្ជាក់ដែរថា ​តាមរបាយការណ៍របស់រដ្ឋបាលខេត្តព្រៃវែង បានបង្ហាញថា ​វិស័យទឹក​ បច្ចុប្បន្នខេត្តព្រៃវែងមានប្រព័ន្ធធារាសាស្ត្រសរុបចំនួន ១៧៧ កន្លែង មានខ្នាតធំចំនួនបួនកន្លែង មធ្យម១១១កន្លែង និងខ្នា​ត​តូចចំនួន ៦២ កន្លែង ដែល​អាចផ្គត់ផ្គង់ទឹកស្រោចស្រពលើផ្ទៃដីស្រែសរុបចំនួន១៣៧.៣.៣៤ ហិកតា៕ ដោយ៖បូរ ពេជ្រហ្សាលីន