ឡុងដ៍៖ នៅថ្ងៃទី១៩ ខែមិថុនា ឆ្នាំ២០២៣ រដ្ឋាភិបាលអង់គ្លេសបានប្រកាសថា ខ្លួនបានដាក់ចេញផែនការរឹតបន្តឹងគោលន​យោ​បាយដាក់ទណ្ឌកម្មប្រឆាំងនឹងរុស្ស៊ីកាលពីថ្ងៃចន្ទ រួមទាំងការដាក់ចេញច្បាប់ដើម្បីរក្សាទុកទ្រព្យសម្បត្តិរុស្ស៊ីដែលត្រូ​វបានបង្កក រហូតដល់ថ្ងៃដែលទីក្រុងមូស្គូយល់ព្រមបង់ប្រាក់សំណង់ទៅលើការខូចខាតនៅអ៊ុយក្រែន។​

វិធានការថ្មីនេះនឹងតម្រូវឱ្យបុគ្គលដែលត្រូវស្ថិតនៅក្រោមការដាក់ទណ្ឌកម្ម ប្រកាសទ្រព្យសម្បត្តិរបស់ខ្លួនទាំងអស់ដែ​លកំពុងកាន់កាប់នៅក្នុងប្រទេសអង់គ្លេស។ រដ្ឋាភិបាល​ក៏​បាន​បញ្ជាក់ដែរថា អ្នក​ដែលត្រូវបានបង្កកទ្រព្យទាំងអស់ មា​ន​ផ្លូវ​ថ្មី​មួយទៀតនោះគឺការ​បរិច្ចាគ​ដល់​ការ​កសាង​ប្រទេស​អ៊ុយក្រែន​ឡើង​វិញ។ យ៉ាងណាក៏ដោយ នេះ​មិនមែនមានន័យថា ​ទណ្ឌកម្ម​ទៅលើបុគ្គលនោះ​ត្រូវ​បាន​ដក​ចេញនោះ​ទេ។​

គួរដឹងដែរថា ផែនការ​នេះ​ត្រូវ​បាន​ប្រកាស​នៅ​ពេល​ដែល​អង់គ្លេស​ត្រៀម​ធ្វើ​ជា​ម្ចាស់​ផ្ទះ​សន្និសីទ​ស្ដីពីការ​ស្ដារប្រទេស​អ៊ុយក្រែនឡើងវិញ​ក្នុង​សប្តាហ៍​នេះ។ អង់គ្លេសនឹងផ្តោតលើការកៀងគោសំឡេងគាំទ្រពីអន្តរជាតិ ដើម្បីជួយកសាងប្រ​ទេសអ៊ុយក្រែងពីសង្គ្រាមឡើងវិញ ជាពិសេសការចូលរួមពីវិស័យឯកជន ក្នុងដំណើរការស្ដារឡើងវិញនេះ។​

ចាប់តាំងពីការឈ្លានពានអ៊ុយក្រែនកាលពីឆ្នាំមុន អង់គ្លេសបានបង្កកទ្រព្យសម្បត្តិរហូតដល់ទៅជាង ២៣​ ប៊ីលានដុល្លារអាមេរិក និងដាក់ទណ្ឌកម្មលើបុគ្គលរុស្ស៊ីចំនួនជាង ១ ៥៥០ នាក់ ក្នុងនោះរួមទាំងលោក រ៉ូម៉ាន អាប្រាម៉ូវិច (Roman Abramovich) ដែលជាអតីតម្ចាស់ក្លឹបបាល់ទាត់ឆែលស៊ី (Chelsea) ផងដែរ។​

រដ្ឋមន្ត្រីការបរទេសអង់គ្លេស លោក ចេម ខ្លេវឺលី (James Cleverly) បានលើកឡើងថា ៖ «តម្រូវការចាំបាច់ក្នុងការកសាងប្រទេសអ៊ុយក្រែនឡើងវិញគឺពិតជាធំធេងខ្លាំងណាស់ ហើយវិធានការថ្មីៗនឹងត្រូវបានដាក់ចេញ ដើម្បីធានាឱ្យរុស្ស៊ីចំណាយលើការជួសជុលប្រទេសដែលខ្លួនបានវាយកម្ទេចដោយឥតក្រែងចិត្តនរណា»។​

ក្រោមច្បាប់​ថ្មី​នេះ​ផងដែរ នឹង​អនុញ្ញាត​ឱ្យ​រដ្ឋាភិបាល​អង់គ្លេសអាច​បន្តរយៈពេលនៃការដាក់ទណ្ឌកម្ម​បាន​យូរ​ជាង​មុន និងអាច​កែប្រែ​គោលបំណង​នៃការដាក់ទណ្ឌកម្មរបស់​ខ្លួនទៀតផង។ ជារួម ច្បាប់​នេះ​អនុញ្ញាត​ឱ្យ​មាន​ការ​ដាក់​ទណ្ឌ​កម្ម ​ដើម្បី​ទាមទារ​ឱ្យ​រុ​ស្ស៊ី​ផ្តល់​សំណងដែលខូចខាតទាំងប៉ុន្មានទៅកាន់អ៊ុយក្រែន។​

តាមរយៈការប៉ាន់ស្មាន ការចំណាយទៅលើការកសាងឡើងវិញនៅក្នុងប្រទេសអ៊ុយក្រែន អាចនឹងត្រូវចំណាយ ៤០០ ប៊ីលានដុល្លារអាមេរិក នេះបើយោងតាមការគណនាដោយធនាគារពិភពលោក អង្គការសហប្រជាជាតិ គណៈកម្មការអឺរ៉ុប និងអ៊ុយក្រែនផ្ទាល់។​

រដ្ឋាភិបាលអង់គ្លេសបានបន្ថែមថា ខ្លួននឹងប្រកាសពីព័ត៌មានលម្អិតអំពីរបៀបនៃការចែកចាយមូលនិធិដែលបានបរិច្ចាគពីបុគ្គលដែលត្រូវបានដាក់ទណ្ឌកម្ម ដើម្បីគាំទ្រដល់ការកសាងប្រទេសអ៊ុយក្រែនឡើងវិញនៅពេលអនាគត។ រដ្ឋាភិបាលបានបញ្ជាក់ថា «នឹងមិនមានការបង្ខិតបង្ខំបុគ្គលដែលត្រូវបានដាក់ទណ្ឌកម្មណាមួយ ដើម្បីឱ្យពួកគេផ្ទេរមូលនិធិ ឬផ្តល់ការបន្ធូរបន្ថយទណ្ឌកម្មណាមួយជាថ្នូរនឹងការបរិច្ចាគឡើយ»៕

ប្រែសម្រួល៖ធា សុណា

ប្រភពព័ត៌មាន៖ Reuters Britain to keep Russian assets frozen until Ukraine is compensated