ស្ថាប័នពាក់ព័ន្ធ ផ្សព្វផ្សាយច្បាប់ស្តីពីចរាចរណ៍ផ្លូវគោក ដល់អ្នកបើកបរយានយន្តដឹកកម្មកររោងចក្រ
កណ្តាល៖នាថ្ងៃទី១៩ ខែមិថុនា រដ្ឋបាលខេត្តកណ្តាល និងបណ្តាអ្នកពាក់ព័ន្ធសំខាន់ៗមួយចំនួនទៀត បានបង្កើតកម្មវិធីអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក ដល់អ្នកបើកបរយានយន្តដឹកកម្មកររោងចក្រ ដើម្បីធានាសុវត្ថិភាពលើមធ្យោបាយធ្វើដំណើរ។
យោងតាមរដ្ឋបាលខេត្តកណ្តាលបានឱ្យដឹងថា ខេត្ត និងស្ថាប័នពាក់ព័ន្ធ បានបង្កើតកម្មវិធីអប់រំផ្សព្វផ្សាយនេះឡើង ដោយសារមើលឃើញពីកំណើនមធ្យោបាយយានយន្ត ការនិយមប្រើប្រាស់យានជំនិះផ្ទាល់ខ្លួនច្រើនជាងការប្រើប្រាស់ មធ្យោបាយដឹកជញ្ជូនសាធារណៈ ការប្រើប្រាស់ទ្រូងផ្លូវ ចិញ្ចើមផ្លូវមិនទាន់បានត្រឹមត្រូវ លក្ខខណ្ឌបច្ចេកទេសយានយន្ត ការរំលោភដីចំណីផ្លូវ និងកត្តាផ្សេងៗទៀតជាដើម។
ក្នុងឱកាសនោះ លោក ណុប ដារ៉ា អភិបាលរងខេត្តកណ្តាល បានលើកថា ការអប់រំផ្សព្វផ្សាយពីចរាចរណ៍នេះ ពិតជាមានសារៈសំខាន់ណាស់ចំពោះអ្នកបើកបរយានយន្តដឹកកម្មករ និងកម្មករនិយោជិត ដែលទទួលបានការអប់រំច្បាប់ស្តីពីចរាចរណ៍ផ្លូវគោក សុវត្ថិភាពលើមធ្យោបាយដឹកជញ្ជូន។
លោកបានថ្លែងថា ៖« សិក្ខាកាមទាំងអស់ត្រូវយកចិត្តទុកដាក់គោរពច្បាប់ស្តីពី ចរាចរណ៍ឱ្យបានខ្ជាប់ខ្ជួនសំដៅរួមគ្នា កាត់បន្ថយគ្រោះថ្នាក់ចរាចរណ៍ឱ្យមកនៅកម្រិតទាប ដែលនេះជាផ្នែកមួយដ៏សំខាន់ ដើម្បីឈានទៅចូលរួមលុបបំបាត់សកម្មភាពអនាធិបតេយ្យ នៃការធ្វើចរាចរណ៍តាមដងផ្លូវសាធារណៈ និងជំរុញការអនុវត្តច្បាប់ឱ្យទទួលបានលទ្ធផលជាវិជ្ជមាន»។
ថ្លែងក្នុងឱកាសនោះដែរ លោក ហេង សុផាណារិទ្ធ អគ្គនាយករងបេឡាជាតិសន្តិសុខសង្គម បានយល់ឃើញដែរថា ជាការពិតណាស់ករណីគ្រោះថ្នាក់ចរាចរណ៍ផ្លូវគោក ជាឃាតករលាក់មុខដែលធ្វើឱ្យមនុស្ស ស្លាប់ របួស និងពិការ ដែលបានបន្សល់ទុកនូវសោកនាដកម្មដ៏ធំធេង ដែលជាផលប៉ះពាល់ដល់សេដ្ឋកិច្ចគ្រួសារ និងសង្គមជាតិទាំងមូល។
លោកក៏បានលើកឡើងដែរថា ប.ស.ស បានចុះផ្សព្វផ្សាយច្បាប់ស្ដីពីចរាចរណ៍នេះតាមរោងចក្រ សហគ្រាស មួយចំនួនធំដើម្បីបញ្ជ្រាបការយល់ដឹងបន្ថែមពីសុវត្ថិភាពដល់អ្នកប្រើប្រាស់ផ្លូវឱ្យយល់ដឹងកាន់តែច្បាស់ពីហានិភ័យនៃគ្រោះថ្នាក់ចរាចរណ៍ ដើម្បីឱ្យអ្នកបើកបររថយន្ដដឹកកម្មករ និងកម្មករនិយោជិតបើកបរដោយប្រុងប្រយ័ត្នជានិច្ច និងមានការទទួលខុសត្រូវចំពោះមុខច្បាប់ និងខ្លួនឯង។
លោក ហេង សុផាណារិទ្ធ បានថ្លែងថា ៖ «ខ្ញុំសូមលើកទឹកចិត្ត និងជំរុញដល់គ្រប់ក្រសួង ស្ថាប័ន ឬផ្នែកពាក់ព័ន្ធ ត្រូវសហការលើសកម្មភាពទាំងឡាយពាក់ព័ន្ធនឹងការអប់រំផ្សព្វផ្សាយពីចរាចរណ៍ ដើម្បីរួមចំណែកក្នុងការជួយប្រជាពលរដ្ឋឱ្យរួចផុតពីគ្រោះមហន្តរាយដ៏សាហាវនៃឃាតករលាក់មុខរបស់សង្គមជាតិយើង»។
ជុំវិញរឿងនេះដែរថា លោក គង់ សុវណ្ណ ស្ថាបនិក និងជាទីប្រឹក្សាយុទ្ធសាស្ត្ររបស់អង្គការខេមសេហ្វ នៅថ្ងៃទី២០ ខែមិថុនា បានបង្ហាញការគាំទ្រចំពោះសកម្មភាពអប់រំផ្សព្វផ្សាយដល់អ្នកបើកបរយានយន្តដឹកកម្មកររោងចក្រនេះផងដែរ។
លោកបានឱ្យដឹងថា ៖ «គ្រោះថ្នាក់ចរាចរណ៍មិនត្រឹមតែបង្កឱ្យមានការខាតបង់ទ្រព្យសម្បត្តិ និងអាយុជីវិតមនុស្សប៉ុណ្ណោះទេ ថែមទាំងបន្សល់ទុកនូវវិបត្តិសង្គមជាច្រើនដែរ ហើយយើងនៅតែជំរុញឱ្យគ្រប់គ្នាមានឆន្ទៈរួមគ្នា នៅក្នុងការចូលរួមអនុវត្តច្បាប់ចរាចរណ៍ឱ្យបានខ្ជាប់ខ្ជួនទាំងអស់គ្នា ពិសេសបង្កើនការអប់រំផ្សព្វផ្សាយបន្ថែមពីរបៀបប្រើប្រាស់ផ្លូវថ្នល់ និងយុទ្ធនាការបង្កើនការរឹតបន្តឹងច្បាប់នៅតំបន់ដែលមានហានិភ័យខ្ពស់»។
យោងតាមរបាយការណ៍របស់ក្រុមការងារសុវត្ថិភាពចរាចរណ៍ផ្លូវគោកសម្រាប់គាំពារកម្មករនិយោជិត បានឱ្យដឹងថា ក្នុងត្រីមាសទី១ ឆ្នាំ២០២៣ គ្រោះថ្នាក់ចរាចរណ៍ផ្លូវគោក បានកើតឡើងលើកម្មករនិយោជិតចំនួន ៦៣៦ករណី ដែលមានជនរងគ្រោះចំនួន ៦៩៦នាក់ ក្នុងនោះបណ្តាលឱ្យស្លាប់ចំនួន ១៧នាក់ របួសធ្ងន់ ចំនួន ២០០នាក់ និងរបួសស្រាលចំនួន៤៧៩នាក់។
ប្រភពដដែលបានបន្តថា បើប្រៀបធៀបត្រីមាសទី១ ឆ្នាំ២០២២ គ្រោះថ្នាក់ចរាចរណ៍នេះ បានកើន៧២ភាគរយ ជនរងគ្រោះកើន ៧៣ភាគរយ ស្លាប់កើន ២១ភាគរយ របួសធ្ងន់កើន៦៨ភាគរយ និងចំនួនអ្នករបួសស្រាលកើន៧៨ភាគរយ៕ ដោយ៖បូ ពេជ្រហ្សាលីន
