សេតវិមាន៖ លោក បៃដិននឹងមិនបង្រៀនលោក ម៉ូឌីអំពីសិទ្ធិមនុស្សនោះទេ
អាមេរិក៖ នៅថ្ងៃទី២១ ខែមិថុនា ឆ្នាំ២០២៣ ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានទទួលស្វាគមន៍នាយករដ្ឋមន្រ្តីឥណ្ឌា លោក ណារ៉េនដ្រា ម៉ូឌី (Narendra Modi) ក្នុងជំនួបពិភាក្សារយៈពេលពីរថ្ងៃ ដែលសេតវិមានមើលឃើញថា នេះជាការពង្រឹងភាពជាដៃគូក្នុងយុគសម័យមួយដ៏មុះមុត បើទោះបីជាធ្លាប់បានលើកឡើងអំពីការព្រួយបារម្ភជុំវិញការរំលោភសិទ្ធិមនុស្សជាបន្តបន្ទាប់នៅឥណ្ឌាក៏ដោយ។
គួរដឹងដែរថា រដ្ឋាភិបាលក្រុងវ៉ាស៊ីនតោន ចង់ឱ្យប្រទេសឥណ្ឌាធ្វើជាដៃគូយុទ្ធសាស្ត្រដើម្បីទប់ទល់នឹងប្រទេសចិន ខណៈដែលលោក ម៉ូឌី កំពុងស្វែងរកការបង្កើនឥទ្ធិពលប្រទេសរបស់ខ្លួននៅលើឆាកអន្តរជាតិ ហើយគួរបញ្ជាក់ថា បច្ចុប្បន្ននេះ ឥណ្ឌាជាប្រទេសដែលមានប្រជាជនច្រើនជាងគេនៅលើពិភពលោក។
លោក បៃដិន និងលោក ម៉ូឌី ត្រូវបានគេរំពឹងថានឹងប្រកាសពីកិច្ចព្រមព្រៀងជាច្រើន ក្នុងនោះរួមមានកិច្ចសហប្រតិបត្តិការការពារជាតិ និងការលក់ បញ្ញាសិប្បនិមិត្ត កុំព្យូទ័រសមត្ថភាពពិសេស និងការវិនិយោគនៅក្នុងប្រទេសឥណ្ឌា ដោយបច្ចុប្បន្ននេះមានក្រុមហ៊ុន Micron Technology និងក្រុមហ៊ុនអាមេរិកដទៃជាច្រើនទៀត។
លើសពីនេះ លោក បៃដិន ត្រូវបានគេរំពឹងថា នឹងលើកឡើងពីការព្រួយបារម្ភរបស់សហរដ្ឋអាមេរិកអំពីការដើរថយក្រោយនៃលទ្ធិប្រជាធិបតេយ្យនៅក្នុងប្រទេសឥណ្ឌា ប៉ុន្តែលោកនឹងមិនបង្រៀនលោក ម៉ូឌី ជុំវិញប្រធានបទនេះទេ នេះបើយោងតាមទីប្រឹក្សាសន្តិសុខជាតិសេតវិមានលោក ចេក ស៊ូលីវាន (Jake Sullivan) បានប្រាប់អ្នកសារព័ត៌មាន។
លោក ស៊ូលីវាន បាននិយាយថា «នៅពេលដែលសហរដ្ឋអាមេរិកមើលឃើញបញ្ហាប្រឈមរបស់សារព័ត៌មាន សាសនា ឬសេរីភាពផ្សេងទៀត អាមេរិកតែងតែលើកឡើងអំពីបញ្ហាទាំងនោះទៅកាន់ឥណ្ឌាឱ្យបានដឹង»។ លោកបានបន្ថែមថា «យើងព្យាយាមបង្ហាញពីការយល់ឃើញរបស់យើង ដោយមិនព្យាយាមបង្រៀន ឬបដិសេធការប្រឈមផ្ទាល់ខ្លួនរបស់យើងដែលកំពុងមាននោះទេ»។
លោក ស៊ូលីវាន បានរំលេចថា «នៅទីបំផុត អនាគតនៃនយោបាយ និងលទ្ធិប្រជាធិបតេយ្យនៅក្នុងប្រទេសឥណ្ឌានឹងត្រូវសម្រេចដោយជនជាតិឥណ្ឌាខ្លួនឯង មិនមែនដោយសហរដ្ឋអាមេរិកនោះទេ»។
គួររំឭកថា លោក ម៉ូឌី ធ្លាប់បានទៅទស្សនកិច្ចនៅសហរដ្ឋអាមេរិកចំនួន ៥ ដងរួចមកហើយចាប់តាំងពីបានក្លាយជានាយករដ្ឋមន្ត្រីនៅក្នុងឆ្នាំ២០១៤។ យ៉ាងណាក៏ដោយ ដំណើរទស្សនកិច្ចលើកនេះ គឺជាដំណើរទស្សនកិច្ចផ្លូវរដ្ឋលើកដំបូងរបស់លោក ខណៈដែលនៅក្នុងប្រទេសឥណ្ឌា កំពុងមានការព្រួយបារម្ភទាក់ទងនឹងការធ្លាក់ចុះនៃស្ថានភាពសិទ្ធិមនុស្សក្រោមការដឹកនាំដោយគណបក្សរបស់លោក គឺគណបក្សជាតិនិយមហិណ្ឌូ (Bharatiya Janata Party)។
ក្នុងដំណើរទស្សនកិច្ចនេះ លោក បៃដិន ក៏បានទទួលរងសម្ពាធពីក្រុមគណបក្សប្រជាធិបតេយ្យរបស់លោក ឱ្យលើកឡើងអំពីបញ្ហាសិទ្ធិមនុស្សទៅកាន់លោក ម៉ូឌី ផងដែរ។ យ៉ាងណាមិញ លោក ម៉ូឌី បានទទួលបានការស្វាគមន៍យ៉ាងកក់ក្តៅ និងថែមទាំងបានជួបជាមួយលោក អេឡុន ម៉ាសក៍ (Elon Musk) ទៀតផង។ បន្ថែមលើនេះ មេដឹកនាំទាំងពីរបានសម្ដែងការព្រួយបារម្ភដូចគ្នា អំពីសកម្មភាពរបស់ចិន និងបានពិភាក្សាអំពីតួនាទីរបស់ចិនក្នុងវិស័យយោធា បច្ចេកវិទ្យា និងសេដ្ឋកិច្ចផងដែរ។ ក្នុងជំនួបអំឡុងពេលទស្សកិច្ចនេះ គ្មានសន្និសីទសារព័ត៌មានរួមគ្នាណាមួយដែលត្រូវបានគ្រោងថានឹងធ្វើឡើងនោះទេ។
សម្រាប់ឥណ្ឌា ប្រទេសនេះបានពឹងផ្អែកយ៉ាងខ្លាំងទៅលើការនាំចូលប្រេងរបស់រុស្ស៊ី ហើយលោក ម៉ូឌី ក៏មិនបានគាំទ្រការធ្វើសង្រ្គាមនៅអ៊ុយក្រែននោះដែរ។ ដោយឡែក ប្រធានាធិបតី បៃដិន នឹងពិភាក្សាជាមួយរុស្ស៊ី និងអ៊ុយក្រែន មុនពេលកិច្ចប្រជុំកំពូល G20 នៅប្រទេសឥណ្ឌាបានឈានមកដល់នាពេលខាងមុខនេះ៕
ប្រែសម្រួលដោយ៖ ធា សុណា
ប្រភពព័ត៌មាន៖ Channel NewsAsia Biden will not ‘lecture’ Modi on human rights, White House says
