ហាណូយ៖ ប្រធានាធិបតីកូរ៉េខាងត្បូង លោក Yoon Suk-yeol ត្រូវបានទទួលស្វាគមន៍ ដោយប្រធានាធិបតី Vo Van Thuong នៅទីក្រុងហាណូយ កាលពីព្រឹកថ្ងៃសុក្រ ទី២៣ ខែមិថុនា។

ប្រធានាធិបតីប្រទេសទាំងពីរបានពិនិត្យមើលឆ្មាំកិត្តិយស មុននឹងចូលទៅក្នុងវិមានប្រធានាធិបតី ដើម្បីជួបពិភាក្សានិងថ្លែងទៅកាន់អ្នកសារព័ត៌មាន។ លោក Yoon បានអញ្ជើញទៅដល់ទីក្រុងហាណូយ កាលពីថ្ងៃព្រហស្បតិ៍ ជាមួយភរិយា ដើម្បីបំពេញទស្សនកិច្ចផ្លូវរដ្ឋ តាមការអញ្ជើញរបស់សមភាគីវៀតណាម។

វាគឺជាដំណើរទស្សនកិច្ចលើកដំបូងទៅកាន់ប្រទេសវៀតណាម សម្រាប់លោក Yoon ដែលបានចូលកាន់តំណែង កាលពីខែឧសភា និងជាលើកដំបូងរបស់លោក ទៅកាន់ប្រទេសអាស៊ីអាគ្នេយ៍ ។

ថ្លែងនៅក្នុងកិច្ចប្រជុំជាមួយសហគមន៍កូរ៉េខាងត្បូងដែលរស់នៅក្នុងប្រទេសវៀតណាម កាលពីរសៀលថ្ងៃព្រហស្បតិ៍ លោកបានពណ៌នាថា វៀតណាមជាដៃគូសំខាន់របស់កូរ៉េខាងត្បូង ក្នុងការកសាងតំបន់ឥណ្ឌូប៉ាស៊ីហ្វិកសេរី សន្តិភាព និងវិបុលភាព ហើយដំណើរទស្សនកិច្ចរបស់លោកនឹងក្លាយជាចំណុចចាប់ផ្តើម សម្រាប់៣០ ឆ្នាំខាងមុខ នៃទំនាក់ទំនងទ្វេភាគី៕ ប្រភពពី VNexpress ប្រែសម្រួល៖ សារ៉ាត