អាថែន៖ គណបក្សខាងក្រុមអភិរក្សនិយមនៅប្រទេសក្រិកបានឈ្នះការបោះឆ្នោត ហើយសន្យាកែទម្រង់បន្ថែមទៀត។

អតីតនាយករដ្ឋមន្ត្រីក្រិក លោក Kyriakos Mitsotakis បានសន្យាថា នឹងធ្វើកំណែទម្រង់បន្ថែមទៀតក្នុងល្បឿនកាន់តែលឿន បន្ទាប់ពីគណបក្សអភិរក្សរបស់លោកបានឈ្នះការបោះឆ្នោតសកលលើកទីពីរ ក្នុងរយៈពេលប្រាំសប្តាហ៍ គិតមកដល់ថ្ងៃអាទិត្យ និងទទួលបានសំឡេងភាគច្រើនទាំងស្រុងនៅក្នុងសភា។

ជាមួយនឹងការរាប់សន្លឹកឆ្នោត ៩៥ ភាគរយ បក្សលទ្ធិប្រជាធិបតេយ្យថ្មី (ND) របស់លោក Mitsotakis ទទួលបាន ៤០.៥៥ ភាគរយនៃសន្លឹកឆ្នោត ដោយទទួលបាន ១៥៨ អាសនៈនៅក្នុងសភាដែលមានសមាជិក ៣០០ បន្ទាប់ ដើម្បីបង្កើតរដ្ឋាភិបាលបក្សតែមួយ នេះបើយោងតាមលទ្ធផលផ្លូវការដែលចេញផ្សាយដោយក្រសួងមហាផ្ទៃ។

លោក Mitsotakis បានប្រាប់ប្រព័ន្ធផ្សព្វផ្សាយនៅទីស្នាក់ការកណ្តាលរបស់គណបក្សថា “យើងបានទទួលអាណត្តិដ៏រឹងមាំមួយ ដើម្បីដំណើរការកាន់តែលឿននៅលើផ្លូវនៃកំណែទម្រង់ដែលប្រទេសរបស់យើងត្រូវការ” ។

លោកបាននិយាយថា ក្នុងអំឡុងពេលអាណត្តិទីពីររបស់លោកនៅក្នុងតំណែងនេះ ប្រទេសក្រិកនឹងផ្លាស់ប្តូរបន្ថែមទៀត ដោយលោកបានសន្យាថានឹងមានការរីកចម្រើនបន្ថែមទៀតសម្រាប់ទាំងអស់គ្នា។

បក្សឆ្វេងនិយមទទួលបាន ជិត១៨ភាគរយ នៃសន្លឹកឆ្នោត ហើយអ្នកសង្គមនិយម ទទួលបាន ជិត១២ ភាគរយ។ គណបក្សសរុបចំនួនប្រាំបីត្រូវបានគេរំពឹងថា នឹងចូលសភាបន្ទាប់ ក្រោយពីឆ្លងកាត់កម្រិតបីភាគរយនៃសម្លេង ដែលត្រូវការនៅក្រោមច្បាប់បោះឆ្នោត។

តាមគម្រោង នៅថ្ងៃចន្ទនេះ ប្រធានាធិបតីក្រិក លោកស្រី Katerina Sakellaropoulou នឹងផ្តល់អាណត្តិដល់ លោក Mitsotakis ដើម្បីបង្កើតរដ្ឋាភិបាលថ្មី៕ ប្រភពពី Xinhua ប្រែសម្រួល៖ សារ៉ាត