មូស្គូ៖ ទាហានស៊ីឈ្នួល វ៉ែកណឺ (Wagner) បានធ្វើដំណើរត្រឡប់ទៅមូលដ្ឋានរបស់ពួកគេវិញ បន្ទាប់ពីប្រធានាធិបតីរុស្ស៊ី លោ​ក វ្ល៉ាឌីមៀ ពូទីន (Vladimir Putin) បានយល់ព្រមអនុញ្ញាតឱ្យមេដឹកនាំរបស់ពួកគេ រួចផុតពីការចោទប្រកាន់ពីប​ទក្បត់ជាតិ និងនិរទេសខ្លួនទៅកាន់ប្រទេសបេឡារុសដែលនៅក្បែរនោះ។​

កិច្ចព្រមព្រៀងរវាងលោក ពូទីន និងមេដឹកនាំ វ៉ែកណឺ នេះ បានជួយបញ្ឈប់វិបត្តិដ៏ធំមួយរបស់រុស្ស៊ី ដោយកងកម្លាំងដែ​លដឹកនាំដោយអតីតសម្ព័ន្ធមិត្តជិតស្និទ្ធរបស់លោក ពូទីន លោក យ៉េវហ្គេនី ព្រីហ្គោស៊ីន (Yevgeny Prigozhin) បា​នព្យាយាមវាយលុកទៅកាន់ទីក្រុងមូស្គូ។ យ៉ាងណាក៏ដោយ ក្រុមអ្នកវិភាគបានលើកឡើងថា ការបះបោររបស់ទាហានស៊ី​ឈ្នួល វ៉ែកណឺ បានបញ្ជាក់ឱ្យឃើញថា ការដឹកនាំរបស់លោក ពូទីន មានភាពផុយស្រួយជាងការគិតទៅទៀត។​

កាលពីថ្ងៃអាទិត្យ វិធានការសន្តិសុខផ្សេងៗនៅតែបន្តអនុវត្តនៅក្នុងទីក្រុងមូស្គូ ប៉ុន្តែមានចំនួនប៉ូលិសដាក់ពង្រាយតិចជាងមុន។ ដោយឡែក អ្នកមួយចំនួនដែលរស់នៅក្នុងទីក្រុងបាននិយាយថា ពួកគេមិនមានការព្រួយបារម្ភអ្វីទេ បើទោះ​បីជាពួកគេមិនបានដឹងពីទីតាំងរបស់លោក ព្រីហ្គោស៊ីន (Prigozhin) ពិតប្រាកដក៏ដោយ។​

ពលរដ្ឋរុស្ស៊ីម្នាក់ អាយុ ៧០ ឆ្នាំបានប្រាប់សារព័ត៌មាន AFP ខណៈដែលកំពុងដើរនៅទីលានក្រហមនៅទីក្រុងម៉ូស្គូថា ៖ «​ជាការពិតណាស់ ខ្ញុំមានការភ័យញាប់ញ័រនៅពេលបានឮពីដំណឹងនេះដំបូង ដោយសារតែខ្ញុំមិនបានគិតជាមុនថារឿ​ងនេះនឹងអាចកើតមានឡើងនោះទេ»។

លោកស្រីបានបន្ថែមថា ៖ «យើងកំពុងតែប្រយុទ្ធ ហើយក៏មានសត្រូវខាងក្នុងដែលកំពុងចាំខាំយើងពីក្រោយ ដូចទៅនឹងអ្វីដែលប្រធានាធិបតី ពូទីន បាននិយាយដែរ។ យ៉ាងណាក៏ដោយយើង​កំពុង​ដើរ​លេង​លំហែ​កាយ ហើយយើង​មិន​មាន​អារម្មណ៍​ថា​មាន​គ្រោះថ្នាក់​អ្វី​ទេ»។​

លោក ព្រីហ្គោស៊ីន ត្រូវបានគេឃើញរូបលោកចុងក្រោយបង្អស់កាលពីល្ងាចថ្ងៃសៅរ៍ នៅក្នុងរថយន្តម៉ាក SUV ធ្វើដំ​ណើ​រចេញពីទីក្រុង រ៉ូស្តូវ​ អនដុន (Rostov-on-Don) ជាទីក្រុងដែលក្រុមសកម្មប្រយុទ្ធរបស់លោកបានដណ្តើមយកទីបញ្ជាការយោធា ហើយក៏ទទួលបានការអបអរសាទរពីសំណាក់ប្រជាជនមួយចំនួននៅក្នុងតំបន់នោះផងដែរ ដោយអ្នកខ្លះបានចាប់ដៃរបស់លោកតាមបង្អួចឡានទៀតផង។​

អំឡុងពេលនោះ រថយន្ត​ដឹក​ពាសដែក និងកងទាហានសកម្ម​ប្រយុទ្ធជាច្រើន បានធ្វើដំណើរ​តាម​ពីក្រោយរថយន្ត​របស់​លោកផងដែរ។ គួរដឹងដែរថា ទាហានស៊ីឈ្នួល វ៉ែកណឺ ត្រូវបានគេរាយការណ៍ថា បានធ្វើដំណើរទៅជិតកាន់តែកៀករហូ​តដល់ទៅត្រឹមតែ ៤០០ គីឡូម៉ែត្រប៉ុណ្ណោះពីទីក្រុងម៉ូស្គូ ខណៈដែល លោក ព្រីហ្គោស៊ីន បានអះអាងថា ពួកគេស្ថិ​តនៅចម្ងាយត្រឹមតែ ២០០ គីឡូម៉ែត្រ និងធ្វើដំណើររយៈពេលត្រឹមតែ ២៤ ម៉ោងទៀតប៉ុណ្ណោះ។​

គួររំឭកថា ការបះបោរ​នេះកើតឡើងដោយសារតែ​ជម្លោះ​ដ៏​រ៉ាំរ៉ៃ​រវាង​លោក ព្រីហ្គោស៊ីន និង​មេដឹកនាំទាហានជាន់ខ្ពស់​រប​ស់រុស្ស៊ី​ ជុំវិញរឿងប្រតិបត្តិការ​រុស្ស៊ី​នៅ​អ៊ុយក្រែន។ លោក ពូទីន បានថ្កោលទោសការបះបោរនេះថា ជាអំពើក្បត់ជាតិ ដោយសន្យាថានឹងដាក់ទណ្ឌកម្មអ្នកទទួលខុសត្រូវ និងចោទពួកគេថាកំពុងរុញច្រានរុស្ស៊ីឱ្យចូលទៅរកសង្គ្រាមស៊ីវិល។​

នៅក្នុងថ្ងៃដដែលនោះ លោក ព្រីហ្គោស៊ីន ក៏បានយល់ព្រមលើកិច្ចព្រមព្រៀងមួយជាមួយទីក្រុងម៉ូស្គូ ដែលមានប្រទេ​ស​បេឡារុសជាអ្នកជួយសម្របសម្រួល។ ដោយឡែក កាលពីថ្ងៃអាទិត្យមុន មេដឹកនាំអ៊ុយក្រែន លោក ហ្សេលេនស្គី និងប្រធានាធិបតីសហរដ្ឋអាមេរិក ចូ បៃដិន ក៏បានលើកឡើងអំពីការបះបោរនេះផងដែរ ពោលគឺលើកឡើងនៅមុនកិច្ចប្រជុំកំពូលរបស់អង្គការណាតូនៅប្រទេសលីទុយអានីនឹងឈានមកដល់នាពេលខាងមុខ។​

លោក ហ្សេលេនស្គី បានលើកនៅលើបណ្ដាញ ធ្វីតធ័រ(Twitter) ថា ៖ «សហគមន៍អន្តរជាតិត្រូវតែដាក់សម្ពាធលើរុស្ស៊ី ដើម្បីឱ្យមានការស្ដារឡើងនូវសណ្តាប់ធ្នាប់អន្តរជាតិ»។ លើសពីនេះទៀតលោកក៏បានលើកឡើងអំពីសក្តានុពលនៃការប្រើប្រា​ស់អាវុធរយៈចម្ងាយឆ្ងាយដើម្បីប្រឆាំងនឹងការឈ្លានពានរបស់រុស្ស៊ីផងដែរ៕​

ប្រែសម្រួល៖ធា សុណា

ប្រភព​៖ Channel NewsAsia Wagner halts revolt but Putin seen as weakened; Moscow maintains security measures