មូស្គូ៖ រដ្ឋមន្ត្រីការពារជាតិនៃប្រទេសរុស្ស៊ីបានបង្ហាញខ្លួន ជាលើកដំបូង ចាប់តាំងពីមានការប៉ុនប៉ងបះបោររបស់ ក្រុមទាហានស៊ីឈ្នួល វ៉ាហ្គឺណឺ (Wagner)។

ក្រសួងការពារជាតិរុស្ស៊ីបាននិយាយ កាលពីថ្ងៃចន្ទ សប្តាហ៍នេះថា រដ្ឋមន្ត្រីការពារជាតិរុស្ស៊ី លោក Sergei Shoigu បានទៅទស្សនាប៉ុស្តិ៍បញ្ជាមួយ នៅក្នុងតំបន់ប្រតិបត្តិការពិសេស ក្នុងទីក្រុង VLADIVOSTOK។

នេះគឺជាការបង្ហាញខ្លួនជាសាធារណៈ លើកដំបូងរបស់លោក ចាប់តាំងពីការបះបោរបរាជ័យ ដោយកងកម្លាំងទាហានស៊ីឈ្នួល វ៉ាហ្គឺណឺ (Wagner) ។

ក្រសួងបានចេញផ្សាយវីដេអូដែលបង្ហាញពីលោក Shoigu ជិះក្នុងយន្តហោះ ហើយបន្ទាប់មក ចូលរួមកិច្ចប្រជុំជាមួយមន្ត្រីយោធានៅទីបញ្ជាការយោធា ក្នុងតំបន់ប្រតិបត្តិការពិសេស។

រដ្ឋមន្រ្តីបានរាយការណ៍ថា បានស្តាប់របាយការណ៍ពីវរសេនីយ៍ឯក Yevgeny Nikiforov មេបញ្ជាការកងទ័ពអំពីស្ថានភាពបច្ចុប្បន្ននៅជួរមុខ។

វិមានក្រឹមឡាំងបានឈានដល់ការសម្របសម្រួលជាមួយលោក Yevgeny Prigozhin ប្រធានក្រុម ទាហានស៊ីឈ្នួល វ៉ាហ្គឺណឺ (Wagner) តាមរយៈការសម្របសម្រួលរបស់ប្រធានាធិបតីបេឡារុស្ស លោក Alexander Lukashenko កាលពីល្ងាចថ្ងៃសៅរ៍៕

ប្រភពពី Xinhua ប្រែសម្រួល៖ សារ៉ាត