ភ្នំពេញ៖ឯកឧត្តមឧត្តមសេនីយ៍ឯក ឆាយ គឹម​ខឿន អគ្គស្នងការរងនិងជាអ្នកនាំពាក្យនៃអគ្គស្នងនៃ​ការដ្ឋាននគរបាលជាតិ បាន​​ថ្លែង​ឱ្យដឹងថា កម្លាំងការពារសន្តិសុខ សណ្តាប់ធ្នាប់ និងរបៀបរៀបរយសាធារណៈសម្រាប់យុទ្ធនាការឃោសនាបោះឆ្នោត របស់គណបក្សន​យោបាយ និងកំលុងពេល​នៃ​ការបោះឆ្នោតខាងមុខមានចំនួនប្រមាណជិត ១០ ម៉ឺននាក់ ដែលនឹងត្រូវពង្រាយទៅតាមគោលដៅសំខាន់។ឯកឧត្តម​អះអាងបែបនេះ ស្រប​ពេលដែលយុទ្ធនាការឃោសនាបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧​ ដែលនឹង​ប្រព្រឹត្តិ​ឡើង​ចាប់ពីថ្ងៃទី១ ខែក​ក្កដា ​រហូតដល់ថ្ងៃទី ២១ ខែក្កដា​ និងការបោះឆ្នោត និងរាប់សន្លឹកឆ្នោត នៅថ្ងៃទី​២៣ ខែកក្កដា ឆ្នាំ២០២៣ខាងមុខនេះ​។

ឯកឧត្តម ឆាយ គឹមខឿន ប្រាប់ឱ្យដឹងកាលពី​​ថ្ងៃទី២៧ ខែមិថុនាថា កម្លាំងការសន្តិសុខជិត១០ ម៉ឺននាក់នេះមកពីកម្លាំងនគរបាលជាតិ កងរាជអាវុធហត្ថលើផ្ទៃប្រទេស និងកងកម្លាំងប្រតិបត្តិការសឹក ដែលនឹងត្រូវបែងចែកជាដំណាក់កាលនី​មួយៗ រួមមានដំណាក់កាលឃោសនាបោះឆ្នោត ដំណាក់កាលពេលបោះឆ្នោត និងរាប់សន្លឹកឆ្នោត ព្រមទាំងនៅក្រោយពេ​លការបោះឆ្នោត​។ឯកឧត្តមបាន​ថ្លែងថា៖​ «កម្លាំងទាំងនេះ យើងបានបែកចែកភារកិច្ចយ៉ាងច្បាស់លាស់ សម្រាប់ការពារនៅតាមគោលដៅដូចជា​ទីស្នាក់ការរបស់គណៈកម្មការរាជធានីខេត្តរៀបចំការបោះឆ្នោត​ទាំង១ ៩៥២,ការពារការិយា​ល័យ​បោះឆ្នោត ទាំង​២៣ ៧៨៩ ការិយាល័យ ព្រមទាំងកម្លាំងត្រៀមអន្តរាគមន៍ខាងក្រៅ ហើយក្រៅពីនោះកម្លាំងការពារហិបឆ្នោត ឯកសារបោះឆ្នោត និងឧបករណ៍សម្ភារៈ របស់គ.ជ.ប ដែលរៀបចំនៅតាមការិយាល័យបោះឆ្នោត»។

ឯកឧត្តមសង្កត់ធ្ងន់ថា ជាមួយគ្នានេះ ក៏មានកម្លាំងអន្តរាគមន៍ពិសេសនៅនឹងកន្លែង ដើម្បីត្រៀមដោះស្រាយ ហេតុការណ៍ដែ​លអាចនឹងកើតឡើងជាយថាហេតុណាមួយ។ បន្ថែមពីនេះ​ក៏មានកម្លាំងប្រើប្រាស់សម្រាប់ក្រុមការីវិទ្យុទាក់ទង ប្រមាណជា​ជិត ១​ ០០​០នាក់ផងដែរ ក្នុងពេលនោះ។

ចំណែកឯកឧត្តម ហង្ស ពុទ្ធា អ្នកនាំពាក្យនៃគណៈកម្មាធិការជាតិរៀបចំការបោះឆ្នោត(គ.ជ.ប)ប្រាប់​ឱ្យដឹងដែរថា​ ជារៀងរាល់ការបោះឆ្នោត គ.ជ.ប តែងតែមានកិច្ចសហប្រតិបត្តិការជាមួយក្រសួងការពារជាតិ និងក្រសួងមហាផ្ទៃ រៀបចំនិងពង្រឹ​ងសណ្តាប់ធ្នាប់ សន្តិសុខសង្គម សុវត្ថិភាព និងដំណើការប្រព្រឹត្តិទៅនៃការរស់នៅរបស់ប្រជាពលរដ្ឋ ឱ្យមានភាព​ប្រ​ក្រតីភា​ពសម្រាប់ដំណើការបោះបោះឆ្នោតឱ្យ​ប្រព្រឹត្តិទៅដោយរលូន។

ឯកឧត្តមបន្តថា ដោយឡែកចំពោះ ចំនួនកម្លាំងការពារសន្តិសុខ សុវត្ថិភាព និងសណ្តាប់ធ្នាប់សាធារណៈ ដែលត្រៀមចូលរួមការពារសម្រាប់យុត្ធនាការឃោសនាបោះឆ្នោតនិងការបោះឆ្នោតនៅពេលខាងមុខ ដែលរៀបចំដោយអាជ្ញាធរមានសមត្ថកិច្ច នៅពេលនេះ ​ពិតជាមានសារៈសំខាន់ក្នុងការផ្តល់នូវទំនុកចិត្តដល់ប្រជាពលរដ្ឋចេញទៅបោះឆ្នោតនិងឃោសនាកាន់តែ​ច្រើន។ ឯកឧត្តម ហង្ស ពុទ្ធា បានថ្លែងថា៖​ «ការការពារសុវត្ថិភាពជូនបងប្អូនប្រជាពលរដ្ឋ គឺជាកត្តាចាំបាច់»។

សូមរម្លឹកថា ការ​ឃោសនាបោះឆ្នោតជ្រើសតាំងតំណាងរាស្ត្រ​ នីតិកាលទី៧ ​​នឹង​ចាប់ដំណើរការ​ពីថ្ងៃទី១​ដល់ថ្ងៃទី២១ ខែកក្កដា ដោយក្នុងនោះ​ គ.ជ.ប​​ បានអំពាវនាវដល់គណបក្សនយោបាយ បេក្ខជន អ្នកគាំទ្រគណបក្សនយោបាយ​​​ទាំងអស់ ត្រូវតែ​គោរពតាមវិធាន បទប្បញ្ញត្តិ, គោលការណ៍​, ក្រមសីលធម៌ និងគោលការណ៍នានា​ដែលបាន​កំណត់​ដោយ គ.ជ.ប ដើម្បីឱ្យការឃោសនាបោះឆ្នោត​របស់​គណបក្សនយោបាយប្រព្រឹត្តទៅ​ដោយ​សន្តិវិធី អហិង្សា សន្តិសុខ និងសុវត្ថិភាព៕

ដោយ៖គឹម យុត្ថារ៉ូ