(ខេត្តកំពង់ធំ )៖ ក្នុងឱកាសចុះសាកសួសុខទុក្ខប្រជាជនខ្វះខាត និងចាស់ជរារស់នៅឃុំបឹងល្វា ស្រុកសន្ទុក ខេត្តកំពង់ធំ នាថ្ងៃទី២៩មិថុនា លោកជំទាវ បណ្ឌិត ជា សិរី មន្ត្រីជាន់ខ្ពស់ធនាគារ ជាតិ នៃកម្ពុជា បានសំណូមពរដល់មាតា បិតា និង អាណាព្យាបាលក្នុងឃុំបឹងល្វា ធ្វើយ៉ាងណាជម្រុញកូនចៅឲ្យបានចូលរៀន គ្រប់គ្នាៗយ៉ាងហោចណាស់បានរៀនចប់ ត្រឹមកម្រិត អនុវិទ្យាល័យ។

លោកជំទាវបណ្ឌិត ជា សិរី បានបញ្ជាក់ថា÷ រាជរដ្ឋាភិបាលកម្ពុជា ក្រោមការដឹកនាំ របស់ សម្ដេចតេជោ ហ៊ុន សែន បាននាំមកនូវសន្តិភាពជូនជាតិមាតុភូមិ វិស័យអប់រំ ក៏បានលើកកម្ពស់ និងយកចិត្តទុកដាក់ជាបន្តបន្ទាប់ ក្នុងនោះសាលារៀន បានកសាងនៅគ្រប់តំបន់ទូទាំងប្រទេស។ ជាក់ស្ដែងដូចនៅតំបន់នេះ ក៏មានសាលារហូតដល់កម្រិតអនុវិទ្យាល័យ ដែលអាចឲ្យពួកគេបាន ចូលសិក្សាចប់កម្រិតអនុវិទ្យាល័យបាន។

លោកជំទាវ បានបន្តថា បើប្រជាជនយើងម្នាក់ៗមានចំណេះវិជ្ជា និងចំណេះដឹងទូទៅបានច្រើន នោះនឹងរួមចំណែកមួយផ្នែកធំក្នុងការលើកកម្ពស់ជីវភាពគ្រួសារ និងអាចចូលរួមដល់ការអភិវឌ្ឍ សង្គមជាតិផងដែរ។

លោកជំទាវបណ្ឌិត ជា សិរី បានក្រើនរំលឹកដល់ប្រជាពលរដ្ឋ អញ្ជើញទៅបោះឆ្នោត ជ្រើសតាំង តំណាងរាស្រ្ត នីតិកាលទី៧ នៅថ្ងៃទី២៣ ខែកក្ដាដា ឆ្នាំ២០២៣ ឲ្យបានគ្រប់ៗគ្នា ។

នៅរសៀលថ្ងៃដដែល លោកជំទាវ បណ្ឌិត ជា សិរី ក៏បានអញ្ជើញទៅប្រគល់ផ្ទះថ្មីមួយខ្នងរួមនឹង អំណោយមួយចំនួនទៀតជូនដល់គ្រួសារខ្វះខាតរស់នៅភូមិស្រែតាកោ ឃុំប្រាសាទដែលជា អំណោយមនុស្សធ៌មរបស់ឯកឧត្តម បណ្ឌិត ជា ចាន់តូ និងលោកជំទាវ ខៀវ ស៊ីណា ផងដែរ ៕ អត្ថបទ ៖ វណ្ណលុក, រូបភាព៖ វ៉េង លីមហួត