លោក ម៉ាក្រុង រងការរិះគន់ចំពោះការអំពាវនាវឱ្យកាត់ផ្ដាច់បណ្ដាញសង្គមក្នុងអំឡុងកុបកម្មនៅបារាំង
ប៉ារីស៖ ប្រធានាធិបតីបារាំងលោក អេម៉ានូអែល ម៉ាក្រុង និងរដ្ឋាភិបាលរបស់លោក បានប្រឈមមុខនឹងការរិះគន់កាលពីថ្ងៃពុធ បន្ទាប់ពីលោកបានអំពាវនាវឱ្យកាច់ផ្ដាច់បណ្ដាញសង្គមក្នុងករណីបើមានអំពើហិង្សារីករាលដាលដូចជាកុបកម្មកាលពីសប្តាហ៍មុន។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
ឆ្លើយតបនឹងការអំពាវនាវនេះ មេដឹកនាំគណបក្ស Greens លោកស្រី Marine Tondelier បានប្រាប់ទូរទស្សន៍ France Inter កាលពីថ្ងៃពុធថា៖ «នេះគឺជាការព្រួយបារម្ភ។ នៅពេលយើងឈានដល់ចំណុចដែលនិយាយថា ការកាច់ផ្តាច់បណ្តាញសង្គមគឺជាដំណោះស្រាយតែមួយ យើងត្រូវសួរខ្លួនឯងថាតើប្រទេសបារាំងឈានដល់ចំណុចណាហើយ»។
អ្នកនយោបាយប្រឆាំងផ្សេងទៀតពីក្រុមឆ្វេង និងស្តាំនិយម បានវាយប្រហារលើសំណើរបស់លោក ម៉ាក្រុង ដូចគ្នា ។ ប្រធានគណបក្សឆ្វេងនិយម France Unbowed លោកស្រី Mathilde Panot បានឆ្លើយតបទៅកាន់លោក ម៉ាក្រុង នៅក្នុងសារធ្វីតធឺរថា «អូខេ លោក គីម ជុងអ៊ុន» ដែលមានន័យប្រៀបធៀបថា លោក ម៉ាក្រុង ស្មើនឹងមេដឹកនាំផ្ដាច់ការកូរ៉េខាងជើង លោក គីម។
ប្រធានសភាអភិរក្សនិយម លោក Olivier Marleix ក៏បានសរសេរនៅលើបណ្ដាញសង្គមធ្វីតធឺរផងដែរថា៖ «កាត់ផ្ដាច់បណ្ដាញសង្គម? ដូចនៅចិន អ៊ីរ៉ង់ ឬកូរ៉េខាងជើង? ទោះបីជាវាការបង្វែរការចាប់អារម្មណ៍ក៏ដោយ ក៏សំណើបែបនេះមិនអាចទទួលយកបានដែរ»។
គួរបញ្ជាក់ថា លោក ម៉ាក្រុង បានប្រាប់កិច្ចប្រជុំរបស់ក្រុមអភិបាលក្រុងថា៖ «យើងត្រូវគិតអំពីបណ្តាញសង្គម អំពីបម្រាមដែលយើងត្រូវដាក់។ នៅពេលដែលអ្វីៗគ្រប់គ្រងលែងបាន យើងប្រហែលជាត្រូវគ្រប់គ្រង ឬផ្ដាច់វាចោល។ នេះបើតាមការចុះផ្សាយរបស់ប្រព័ន្ធផ្សព្វផ្សាយផ្សេងកាលពីថ្ងៃអង្គារ។
លោក ម៉ាក្រុង និងក្រុមរដ្ឋមន្រ្តីរបស់លោក បានលើកឡើងពីវេទិកាបណ្ដាញសង្គមផ្សេងៗដូចជា Snapchat, TikTok និងកម្មវិធីផ្ញើសារតេឡេក្រាម ដែលមានតួនាទីក្នុងការផ្សព្វផ្សាយរូបភាពនៃអំពើហិង្សានៅពេលយប់ ដែលផ្ទុះឡើងក្រោយការបាញ់សម្លាប់លើក្មេងជំទង់អាយុ ១៧ ឆ្នាំរបស់ប៉ូលិសបារាំង។ លោកថ្លែងយ៉ាងដូច្នេះថា៖ «នៅពេលដែលបណ្ដាញសង្គមក្លាយជាឧបករណ៍សម្រាប់ការរៀបចំ ឬការប៉ុនប៉ងបំផ្លិចបំផ្លាញ វាគឺជាបញ្ហាពិតប្រាកដ»។
ចំណែក ការិយាល័យរបស់រដ្ឋមន្ត្រីបម្លាស់ប្ដូរឌីជីថល លោក Jean-Noel Barrot កាលពីថ្ងៃពុធបានប្រាប់ France Inter ថា ការកាត់ផ្តាច់បណ្តាញសង្គម មិនមានក្នុងកិច្ចពិភាក្សានៅពេលនេះទេ។ លោកគូសបញ្ជាក់ថា ជំនួសមកវិញ រដ្ឋាភិបាលចង់ប្រមូលផ្តុំសមាជិកសភា ដើម្បីពិភាក្សាអំពីវិធីល្អបំផុតដើម្បី កែសម្រួលច្បាប់គ្រប់គ្រងបណ្ដាញសង្គមដែលមានស្រាប់៕
ប្រែសម្រួលដោយ៖ ហួន ឌីណា ប្រភព៖ Macron’s call to ‘cut off’ social media during riots sparks backlash in France
