(ភ្នំពេញ)៖ ក្រុមកីឡាហុកគីនារីកម្ពុជា កំពុងសម្រុកហ្វឹកហាត់ នៅទីលានសាលដំរី នៃពហុកីឡដ្ឋានជាតិមរតកតេជោ យ៉ាងសកម្ម ក្នុងការពង្រឹងសត្ថភាពត្រៀមខ្លួនឲ្យកាន់តែប្រសើរ ដើម្បីចូលរួមប្រកួតក្នុងព្រឹត្តិការណ៍ កីឡាអាស៊ី (ASIAN Games) លើកទី១៩ ដែលគ្រោងនឹង ធ្វើឡើងនៅទីក្រុង Hangshou សាធារណរដ្ឋប្រជាមានិតចិន ពីថ្ងៃទី២៣ ខែកញ្ញា ដល់ថ្ងៃទី០៨ ខែតុលា ឆ្នាំ២០២៣ ក្រោយពីបានពន្យារពេលក្នុងឆ្នាំ២០២២ ដោយសារវិបត្តិ ជំងឺ កូវីដ-១៩ ។

លោក កាំង សុធា អគ្គលេខាធិការសហព័ន្ធកីឡាហុកគីកម្ពុជា បញ្ជាក់ថា ក្រុមជម្រើសជាតិ ហុកគីនារីកម្ពុជា បានក្លាយជាបេក្ខភាពមួយក្នុងចំណោមបេក្ខភាពជាច្រើនទៀត ក្នុងអាស៊ីទាំង មូល សម្រាប់ការប្រកួតកីឡាអាស៊ី ឆ្នាំ២០២៣ ។ លោកថា មូលហេតុក្រុមហុកគីនារីកម្ពុជា ទទួលបានកៅអីចូលរួម(ASIAN Games) លើកទី១៩ នៅចិននេះ ដោយសារតែក្រុមហុគីនារីកម្ពុជា បានឆ្លងកាត់ ការប្រកួតអន្តរជាតិនានា កន្លងមក បូករួម ទាំង ការទទួលធ្វើម្ចាស់ផ្ទះ កីឡាស៊ីហ្គេម លើកទី៣២ ពីថ្ងៃទី ០៥ ដល់ថ្ងៃទី១៧ ខែឧសភា ឆ្នាំ២០២៣ ។

លោក កាំង សុធា បានពន្យល់ថា ការខិតខំប្រឹងប្រែងក្នុងការអភិវឌ្ឍប្រភេទកីឡាអូឡាំពិក មួយនេះ កាន់តែមានល្អប្រសើរបន្តិចម្តងៗ បើទោះបីជាការអភិវឌ្ឍនេះមានដំណើរយឺតក្តី ។ លោកចាត់ទុកថា នេះជាមោទកភាពមួយដែលយើងដើរឆ្ពោះទៅមុខជានិច្ចមិនថយក្រោយ ពោលគឺពីការប្រកួតអន្តរជាតិដែលចាញ់គ្រប់គ្រាន់ច្រើនៗ មកជាការចាញ់គ្រាប់តិច និងពេលខ្លះទទួលបានលទ្ធផលស្មើ ហើយក៏ឈានដល់លទ្ធផលឈ្នះក៏មាន។

លោក កាង សុធា បន្ថែមថា ទោះបីការប្រកួត Asian Gamesនៅចិននាពេលខាងមុខនេះ ជាការប្រកួតដ៏ធំមានប្រទេសចូលរួមប្រកួតច្រើនសុទ្ធជាប្រទេសខ្លាំងៗយ៉ាងណាក្តី ក៏ក្រុមនារីហុកគីកម្ពុជានៅតែដាក់ក្តីសង្ឈឹមជានិច្ច។

គួរបញ្ជាក់ថា កីឡាអាស៊ី គឺជាព្រឹត្តិការណ៍ពហុកីឡាដ៏ធំជាងគេប្រចាំទ្វីបអាស៊ី ដែលធ្វើឡើង រៀងរាល់ ៤ឆ្នាំម្តង ប្រារព្ធបាន ១៨លើក ស្មើនឹង ៧២ឆ្នាំមកហើយ ខណៈព្រឹត្តិការណ៍បន្ទាប់ លើកទី១៩ នឹងធ្វើឡើងនៅទីក្រុមទីក្រុង Hangshou សាធារណរដ្ឋប្រជាមានិតចិន ដោយម្ចាស់ផ្ទះមួយនេះបានប្រកាសពីចំនួន ៤០ប្រភេទកីឡា ស្មើនឹង ៤៨២វិញ្ញាសា ៕

អត្ថបទ៖ ជាវ ចន្ធូ