តូក្យូ៖កាលពីថ្ងៃទី​១១ខែកក្កដា​ តុលាការកំពូលរបស់ប្រទេសជប៉ុនបានសម្រេចថា ការរឹតត្បិតស្ត្រីកែភេទពីការប្រើបន្ទប់ទឹកនៅកន្លែងធ្វើការរបស់ពួកគេ ជារឿងដែលមិនអាចទទួលយកបាន។

ការសម្រេចរបស់តុលាការជប៉ុនបែបនេះ បានក្លាយជាផ្នែកមួយនៃការជួយលើកកម្ពស់សិទ្ធិអ្នកស្រឡាញ់ភេទដូចគ្នា ឬហៅម៉្យាងទៀតថា LGBT។ គួរដឹងដែរថា ក្នុងចំណោមបណ្ដាប្រទេស G7 ទាំងអស់ មានតែជប៉ុនមួយគត់ដែលជាប្រ​ទេ​សគ្មានការការពារផ្លូវច្បាប់សម្រាប់សហជីពអ្នកស្រឡាញ់ភេទដូចគ្នា។​

នេះជាលើកដំបូងហើយដែលតុលាការកំពូលរបស់ប្រទេសជប៉ុនបានដាក់ចេញសេចក្តីសម្រេចស្តីពីបរិយាកាសការងារសម្រាប់បុគ្គល LGBT។ សេចក្តីសម្រេចនេះធ្វើឡើងបន្ទាប់ពីមានសេចក្តីសម្រេចរបស់តុលាការក្នុងតំបន់ បានបង្កលក្ខណៈអំណោយផលភាគច្រើនទៅដល់អាពាហ៍ពិពាហ៍រវាងមនុស្សស្រឡាញ់ភេទដូចគ្នា និងការអនុម័តច្បាប់ដើម្បីជំរុញការយល់ដឹង និងការទទួលយកសហគមន៍អ្នកស្រឡាញ់ភេទដូចគ្នា។​

គួរដឹងដែរថា ថ្មីៗនេះ មន្ត្រី​កែភេទ​ម្នាក់​នៅ​ក្រសួង​សេដ្ឋកិច្ច​បាន​ដាក់​ពាក្យ​បណ្តឹងទៅតុលាការ ​បន្ទាប់​ពីនាង​ត្រូវ​បាន​គេ​ប​ដិសេធមិនឱ្យ​ចូល​បន្ទប់ទឹក​ស្ត្រី​នៅ​ក្បែរ​នោះ ហើយ​ត្រូវ​បាន​គេ​បង្គាប់​ឱ្យ​ទៅប្រើ​បន្ទប់ទឹក​នៅ​ជាន់​ផ្សេងដែលនៅឆ្ងាយ​។ នៅឆ្នាំ២០១៩ តុលាការក្រុងតូក្យូធ្លាប់បានប្រកាសថា ការរឹតបន្តឹងនេះជារឿងខុសច្បាប់ ប៉ុន្តែនៅឆ្នាំ២០២១ តុលា​កា​រជាន់ខ្ពស់ទីក្រុងតូក្យូបានបដិសេធការសម្រេចមួយនេះ។​

នៅប្រទេសជប៉ុន អ្នកកែភេទអាចផ្លាស់ប្តូរភេទរបស់ពួកគេដោយស្របច្បាប់នៅលើបញ្ជីគ្រួសាររបស់ពួកគេ ប្រសិនបើពួកគេបានទទួលការវះកាត់ប្តូរភេទ។ យ៉ាងណាក៏ដោយ ប្រព័ន្ធ​ផ្សព្វផ្សាយ​បាន​ឱ្យដឹង​ថា ស្ត្រី​នៅក្នុង​សំណុំរឿង​របស់​តុលា​ការខាងលើ​មិន​អាច​ធ្វើ​ដូច្នេះ​បាន​ទេ ដោយសារ​ហេតុផល​សុខភាពរបស់នាង។​

ក្រសួងបានលើកឡើងនៅក្នុងសេចក្តីថ្លែងការណ៍មួយថា ៖ «យើងនឹងពិនិត្យសេចក្តីសម្រេចយ៉ាងយកចិត្តទុកដាក់ និងចា​ត់វិធានការសមស្របណាមួយ បន្ទាប់ពីបានពិគ្រោះជាមួយក្រសួង និងស្ថាប័នពាក់ព័ន្ធ»។ ក្រសួងបានបន្ថែមថា ខ្លួននឹ​ងបន្តខិតខំប្រឹងប្រែងដើម្បីគោរពភាពសម្បូរបែប និងភាពចម្រុះនៃបុគ្គលិករបស់ខ្លួន។​

ក្នុង​រយៈពេល​ពីរ​ឆ្នាំ​កន្លង​មក​នេះ មាន​សំណុំរឿង​តុលាការ​ក្នុង​ស្រុក​ចំនួន​ ៥ ដែលមានជាប់​ទាក់ទង​នឹង​ការ​រៀបការ​ភេទ​ដូច​គ្នា។ ក្នុងនោះ ៤ ករណីត្រូវបានតុលាការប្រកាសថា ការហាមឃាត់ការរៀបអាពាហ៍ពិពាហ៍ភេទដូចគ្នាគឺមិនស្របតាមរដ្ឋធម្មនុញ្ញ។ ទោះ​ជា​យ៉ាង​ណា ១ ករណីទៀតត្រូវបានតុលាការ​បាន​តម្កល់​ធម្មនុញ្ញភាព​នៃ​ការ​មិន​អនុញ្ញាត​ឱ្យ​មាន​ការ​រៀបការ​ភេទ​ដូច​គ្នា​។​

កាលពីថ្ងៃទី១៦ ខែមិថុនា ប្រទេសជប៉ុនបានអនុម័តច្បាប់មួយដើម្បីលើកកម្ពស់ការយល់ដឹង និងការទទួលយកសហគមន៍អ្នកស្រឡាញ់ភេទដូចគ្នា។ អ្នក​រិះគន់​បានអះអាង​ថា ច្បាប់​នេះ​ខ្វះ​ការ​ការពារ​សិទ្ធិ​មនុស្ស ខណៈ​សមាជិក​សភា​មួយ​ចំនួន​បាន​សម្ដែង​ការ​ព្រួយ​បារម្ភ​អំពីការអនុញ្ញាតរបស់ច្បាប់នេះ​ជ្រុលហួសហេតុ។

បើទោះបីជាច្បាប់នេះត្រូវបានទទួលសម្ពាធពីសមាជិកសភាអភិរក្សនិយមក៏ដោយ ក៏ច្បាប់នៅតែបង្កឱ្យមានការឆ្លើយតបជាអវិជ្ជមានចំពោះអ្នកប្តូរភេទ។ យ៉ាងណាក៏ដោយ តំណាងរាស្រ្តមួយក្រុមបានចេញមកតស៊ូមតិ ដោយលើកឡើងអំពីសុវត្ថិភាពរបស់ស្ត្រីនៅក្នុងបន្ទប់ទឹក កន្លែងងូតទឹកសាធារណៈ និងកន្លែងងូតទឹកក្តៅជាដើម៕​

ប្រែសម្រួល៖ធា សុណា

ប្រភពព័ត៌មាន៖ Reuters Toilet limits for transgender woman ‘unacceptable,’ Japan’s top court