ភ្លៀងធ្លាក់ខ្លាំងបង្កជាទឹកជំនន់ សម្លាប់មនុស្ស ៣៧នាក់ នៅកូរ៉េខាងត្បូង
សេអ៊ូល៖មនុស្សយ៉ាងហោចណាស់ ៣៧ នាក់បានស្លាប់ និងប្រាំពីរនាក់ផ្សេងទៀតបានបាត់ខ្លួន ដោយសារភ្លៀងធ្លាក់ខ្លាំងដែលបង្កជាទឹកជំនន់ និងការរអិលបាក់ដី នៅកូរ៉េខាងត្បូងក្នុងរយៈពេលប៉ុន្មានបួនថ្ងៃចុងក្រោយនេះ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រកាលពីថ្ងៃអាទិត្យ។
ក្រសួងមហាផ្ទៃកូរ៉េខាងត្បូងបានឱ្យដឹងថា ចំនួនអ្នកស្លាប់ និងបាត់ខ្លួនទាំង ៤៦ នាក់ ដែលគេរាយការណ៍ទូទាំងប្រទេស ភាគច្រើនកប់ក្នុងដីដែលរអិលបាក់ និងទឹកជំនន់ដោយសារភ្លៀងធ្លាក់ខ្លាំងជោគជាំ ។
នៅខេត្ត North Chungcheong វិញ ក្រសួងបាននិយាយថា ក្រុមអ្នកជួយសង្គ្រោះរាប់រយនាក់ ពិបាកនឹងការយករថយន្តជាង ១០ និងមនុស្សមួយចំនួន ដែលជាប់ក្នុងផ្លូវរូងក្រោមដីប្រវែង ៤៣០ ម៉ែត្រ ដែលទឹកជន់លិច ក្នុងក្រុង Cheongju ។ គិតត្រឹមថ្ងៃអាទិត្យ ក្រុមអ្នកជួយសង្រ្គោះបានទាញយកសាកសពចំនួន ៩ ពីក្នុងនោះ។
បើតាមសេចក្ដីរាយការណ៍របស់ប្រព័ន្ធផ្សព្វផ្សាយក្នុងស្រុក ផ្លូវរូងក្រោមដីត្រូវបានជន់លិចកាលពីព្រឹកថ្ងៃសៅរ៍ភ្លាមៗ ដែលធ្វើឱ្យរថយន្តជាប់នៅខាងក្នុងបើកគេចមិនទាន់។
ចំណែកឯអ្នកស្លាប់ និងរបួសទាំងអស់ មានចំនួន ២៧ នាក់ នៅខេត្ត North Gyeongsang វិញ ភាគច្រើនដោយសារតែការរអិលបាក់ដីដ៏ធំនៅតំបន់ភ្នំ ដែលលេបត្របាក់ផ្ទះប្រជាជន។ ក្រសួងមហាផ្ទៃបាននិយាយទៀតថា មនុស្សមួយចំនួន បានបាត់ខ្លួននៅពេលទឹកហូរទន្លេក្នុងខេត្ត អូសយកទៅ។
កាលពីថ្ងៃអាទិត្យផងដែរ ប្រធានាធិបតីកូរ៉េខាងត្បូងលោក យូន ស៊កយល ដែលកំពុងធ្វើដំណើរទស្សនកិច្ចក្រៅប្រទេស បានបើកកិច្ចប្រជុំបន្ទាន់មួយជាមួយជំនួយការរបស់លោក ស្តីពីការឆ្លើយតបគ្រោះមហន្តរាយរបស់រដ្ឋាភិបាល។ លោកបានបញ្ជាឱ្យនាយករដ្ឋមន្ត្រីកូរ៉េខាងត្បូង លោក Han Duck-soo ប្រមូលធនធានដែលមានទាំងអស់ ចេញប្រតិបត្តិការ ដើម្បីកាត់បន្ថយចំនួនអ្នកស្លាប់ និងរបួស។
ទន្ទឹមនឹងនេះផងដែររដ្ឋបាលឧតុនិយមកូរ៉េបានព្យាករណ៍ថានឹងមានភ្លៀងធ្លាក់ខ្លាំងបន្ថែមទៀតទូទាំងប្រទេស រហូតដល់ថ្ងៃពុធ ហើយបានជំរុញសាធារណជនឱ្យជៀសវាងការចេញក្រៅ។
គួរបញ្ជាក់ថា កូរ៉េខាងត្បូងតែងតែរងគ្រោះដោយសារទឹកជំនន់ក្នុងអំឡុងមូសុងរដូវក្តៅ ប៉ុន្តែជាធម្មតាប្រទេសនេះត្រៀមខ្លួនបានយ៉ាងល្អ ហើយចំនួនអ្នកស្លាប់ក៏មានកម្រិតទាប។ ប្រទេសនេះប្រឈមមុខនឹងជំនន់ទឹកភ្លៀង និងទឹកជំនន់ដែលបំបែកកំណត់ត្រាកាលពីឆ្នាំមុន ដែលបានបណ្តាលឲ្យមនុស្ស ១១ នាក់ស្លាប់។ រដ្ឋាភិបាលបាននិយាយនៅពេលនោះថា ទឹកជំនន់ឆ្នាំ ២០២២ កើតឡើងពីភ្លៀងធ្លាក់ខ្លាំងបំផុតមិនធ្លាប់មានចាប់តាំងពីកំណត់ត្រាអាកាសធាតុនៅទីក្រុងសេអ៊ូល បានចាប់ផ្តើមដំណើរការកាលពី ១១៥ ឆ្នាំមុន។
អ្នកវិទ្យាសាស្ត្រនិយាយថា ការប្រែប្រួលអាកាសធាតុ បានធ្វើឱ្យព្រឹត្តិការណ៍ធាតុអាកាសផ្សេងៗកាន់តែធ្ងន់ធ្ងរ និងញឹកញាប់ទៅៗ នៅជុំវិញពិភពលោក រួមទាំងនៅកូរ៉េខាងត្បូងផងដែរ៕
ដោយ៖ហួន ឌីណា ប្រភព៖ Heavy rains, flooding leave 37 dead in South Korea
