ភ្នំពេញ៖ ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់តែងតាំងអគ្គទេសាភិបាលធនាគារជាតិនៃកម្ពុជាថ្មី ជំនួសឯកឧត្តម ជា ចាន់តូ ​គឺលោកជំទាវ ជា សិរី​ ​និងបាន​តែ​ង​តាំងអគ្គទេសាភិបាលរងបីរូបថ្មីផងដែរ​។​

តាមរយៈព្រះរាជក្រឹត្យដែល​បាន​ឡាយព្រះហត្ដលេខាថ្ងៃទី២៩ ខែកក្កដា ឆ្នាំ២០២៣​ដោយ​បាន​តែងតាំង លោកជំទាវ ជា សិរី ជាអគ្គទេសាភិបាលធនាគារជាតិនៃកម្ពុជា ជំនួសឯកឧត្តម ជា ចាន់តូ ដែលមានឋានៈស្មើទេសរដ្ឋមន្ត្រី។​

ជាមួយគ្នានេះ ព្រះមហាក្សត្រក៏បានចេញ​រាជក្រឹត្យបត្រាស់បង្គាប់តែងតាំងអគ្គទេសាភិបាលរងធនាគារជា​តិចំនួនបី រូបផងដែរ ដែលមានឋានៈស្មើរដ្ឋមន្ត្រី ក្នុងនោះរួមមាន ​ឯកឧត្តម រ័ត្ន សុវណ្ណនរៈ, លោកជំទាវ  សាយ សំអាត និងឯកឧត្តម យឹម លាត។​

សូម​បញ្ជាក់ដែរ​ថា លោកជំទាវ ជា សិរី ​ធ្លាប់បម្រើការជាអគ្គទេសា​ភិបាលរងរបស់ធនាគារជាតិ ដែលត្រូវបានព្រះរាជក្រឹត្យតែងតាំងនៅថ្ងៃទី១ ខែមីនា ឆ្នាំ២០២៣ កន្លងទៅ ហើយមុនតំណែងនេះលោកជំទាវមាន​នាទីជាអគ្គនាយកបច្ចេកទេស និងជាឧបការីអគ្គទេសាភិបាលធនា​គារ​ជាតិនៃកម្ពុជា។​

ពាក់ព័ន្ធនឹងបញ្ហនេះដែរ សម្រាប់បណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ​​បាន​បង្ហា​ញសុទិដ្ឋិនិយមខ្ពស់លើលោកជំទាវ ជា សិរី ដែលលោកថា ទោះបីលោកជំទាវជាកូនស្រីរបស់អគ្គទេសា​ភិបាលចាស់​ក៏ពិតមែន ប៉ុន្តែ​លោកជំទាវមានសមត្ថភាពច្បាស់លាស់ និងបទពិសោធន៍ជោកជាំលើវិស័យហិរញ្ញវត្ថុ និងធ្លាប់មានស្នាដៃធ្វើឱ្យវិស័យធនាគារនៅកម្ពុជាប្រសើរឡើង។​

លោក អ៊ិន ចាន់នី បាន​ប្រាប់​​នៅ​ថ្ងៃទី​៣០ ខែកក្កដា ដោយ​លោក​លើកឡើងនូវ​បួនចំណុចពិសេសរបស់លោកជំទាវ ជា សិរី ក្នុងនោះ លោកស្រីបាន​​បញ្ចប់ការសិក្សាកម្រិតខ្ពស់ពីក្រៅប្រទេសស្តង់ដារអន្តរជាតិ, ​ជា​មាតានៃឥណទានកម្ពុជា ដោយ​លោកស្រីបានជួយសម្រួលដល់ការផ្តល់កម្ចីហិរញ្ញប្បទានថ្នាក់ជាតិឱ្យសមាមាត្រ។​លោកជំទាវ ជាស្ថាបនិកប្រព័ន្ធបាគង ដែលជាប្រព័ន្ធមធ្យោបាយទូទាត់ហិរញ្ញវត្ថុក្នុងសម័យឌីជីថលបង្កើតភាពងាយស្រួលដល់អាជីវកម្មនិងការទូទាត់ និង​ចុងក្រោយ​ លោកជំទាវជាថ្នាក់ដឹកនាំស្ត្រីគំរូ មានសមត្ថភាពធ្វើទំនាក់ទំនងក្នុងឆាកអន្តរជាតិក្នុងវិស័យធនាគារនិងហិរញ្ញវត្ថុនេះ។​

បណ្ឌិត អ៊ិន ចាន់នី សង្កត់ធ្ងន់ថា ៖ «ខ្ញុំយល់ថា លោកស្រីមានសមត្ថភាពស័ក្ដិសមនឹងតួ​នាទីថ្មី​នេះ​ មិនមែ​នដោយសារគាត់ជាកូនស្រីមន្ត្រីជាន់ខ្ពស់ទេ ប៉ុន្តែគាត់មានចំណេះ ជំនាញខ្លួនឯង ដោយខ្ញុំសង្កេតឃើញថា​ក្នុងចំណោមមន្ត្រីនៅធនាគារជាតិ គាត់ជាមនុស្សលេចធ្លោជាងគេ។ គាត់មានវ័យក្មេងមែន ប៉ុន្តែមានសមត្ថភាពពេញលេញ ដើម្បីជំរុញការរីកចម្រើនវិស័យហិរញ្ញវត្ថុទៅកម្រិតអន្តរជាតិ»​។

ចំណែក​លោក សុខ វឿន នាយកប្រតិបត្តិក្រុមហ៊ុន LOLC Cambodia និងជាអតីតប្រធានក្រុមប្រឹក្សាភិបាល សមាគមមីក្រូហិរញ្ញវត្ថុកម្ពុជា (CMA) អាណត្តិឆ្នាំ២០២២-២០២៣ សម្តែងក្តីអបអរសម្រាប់លោកស្រី​ ជា សិរី  ។លោកអះអាងថា លោកជំទាវជាមនុស្សមានសមត្ថភាព និងទេពកោសល្យក្នុងវិស័យ​ធ​នាគារ និងហិរញ្ញវត្ថុនេះ។ ជាពិសេសក្នុងភាពជាអ្នកដឹកនាំដឹក ដែលស្តែងឡើងតាមរយៈតួនាទីរ​បស់លោកជំទាវជាអគ្គនាយកបច្ចេកទេស និងជាឧបការីអគ្គទេសាភិបាលធនាគារជាតិ កន្លងមក។​

លោក សុខ វឿន បង្ហាញសុទិដ្ឋិនិយមថា ៖ «នៅពេលលោកស្រីត្រូវបានតែងតាំងជាអគ្គទេសា​ភិបាលធនាគារជាតិ ខ្ញុំនៅតែមានជំនឿជឿទុកចិត្តពី​ទេពកោសល្យ ចំណេះជំនាញរបស់គាត់នឹងអាចកាន់តួនា​ទីនេះបានល្អ ហើយគាត់​ត់ក៏ជាមនុស្សជំនាន់ថ្មីដែលអាចជួយជំរុញការអភិវឌ្ឍវិស័យហិរញ្ញវត្ថុនេះកាន់តែល្អប្រសើរ»​។​

លោកបង្ហាញចំណាប់អារម្មណ៍ចំពោះការវាយតម្លៃរបស់រដ្ឋាភិបាលដែលសម្រេចច្បិចយកស្ត្រីជាថ្នាក់ដឹ​កនាំកំពូលៗរបស់ស្ថាប័នរដ្ឋ ដែលជាចំណែកចលករក្នុងសមភាពយេនឌ័រផង ហើយដើម្បីជាការលើកកម្ពស់ស្រ្តីនៅក្នុងវិស័យហិរញ្ញវត្ថុ ។

លោកសន្និដ្ឋានជារួមថា ៖ «មិនថាស្ត្រី ឬបុរសនោះទេ គឺ​សុទ្ធតែមានសម​ត្ថ​ភាព ហើយខ្ញុំ​ក៏សង្ឃឹមដែរថា អគ្គទេសាភិបាលធនាជាតិថ្មីដែលជាស្ត្រី​ នឹងជំរុញតួនាទីស្ត្រីកាន់តែប្រសើរនៅ​ក្នុងវិស័យធនាគារនិងហិរញ្ញវត្ថុ»​។​

សូម​ជម្រាបដែរ​ថា ​លោកជំទាវ ជា សិរី បានបញ្ចប់ការសិក្សាថ្នាក់បរិញ្ញាបត្រផ្នែកគណនេយ្យ និងហិរញ្ញវត្ថុ ពី​សាកលវិទ្យាល័យ Victoria ប្រទេសញូវសេឡិន នៅឆ្នាំ២០០២។ នៅឆ្នាំ២០១០ លោកស្រីបានបញ្ចប់ថ្នាក់អនុបណ្ឌិតផ្នែកធនាគារពីសាកលវិទ្យាល័យ SOAS នៃទីក្រុងឡុងដ៍ ប្រទេសអង់គ្លេស និងឆ្នាំ២០​១​៩ បានបញ្ចប់សញ្ញាបត្រអនុបណ្ឌិតមួយទៀត​នៅសាលាគោល​នយោបាយ លី ក្វាន់យូ សិង្ហ​បុរី។នៅឆ្នាំ២០២១ លោកស្រីបានបញ្ចប់ថ្នាក់បណ្ឌិតផ្នែកសេដ្ឋកិច្ចពីសាកលវិទ្យាល័យAdelaide ប្រទេសអូស្ត្រាលី។​

នៅក្នុងវិស័យការងារ មុនក្លាយជាជាអគ្គទេសាភិបាលនិងអគ្គទេសាភិបាលរងរបស់ធនាគារជាតិនៃកម្ពុជាលោកជំទាវបានចូលបម្រើការងារនៅស្ថាប័ននេះតាំងពីឆ្នាំ១៩៩៩មក ហើយនៅឆ្នាំ២០០២ ក្រោយបញ្ចប់បរិញ្ញាបត្រលោកជំទាវ​បានបម្រើការងារនៅនាយកដ្ឋានត្រួតពិនិត្យធនាគារ ហើយក្រោយមកត្រូវបានតែងតាំងជាអគ្គនាយករងបច្ចេកទេស,បន្ទាប់មកក្លាយជាអគ្គនាយកបច្ចេកទេសនិងជាឧបការី​អគ្គទេសា​ភិបាលធនាគារជាតិនៃកម្ពុជា។រហូតនៅខែមីនាឆ្នាំ២០២៣លោកជំទាវត្រូវបានតែងតាំងជាអគ្គទេសា​ភិបាល​រងធនាគារជាតិកម្ពុជា៕

ដោយ៖សំបាន ច័ន្ទដារ៉ា