​ភ្នំពេញ៖ សហព័ន្ធស្រូវអង្ករកម្ពុជាបានឱ្យដឹងថា នៅក្នុងរយៈពេលប្រាំពីរខែ ពោលពីចាប់ពីខែមករា ដល់កក្កដា ឆ្នាំ២០២៣ នេះ កម្ពុជា បាននាំចេញអង្ករទៅក្រៅប្រទេស ក្នុងបរិមាណ ៣​៦២ ៧៩៨ តោន​ ទៅកាន់ប្រទេសគោលដៅចំនួន៥២ នៅលើពិភពលោ​ក ។បរិមាណនេះ ស្មើនឹង៥២ភាគរយ នៃផែនការ៧០ម៉ឺនតោន។

របាយការណ៍របស់​សហព័ន្ធស្រូវអង្ករកម្ពុជាបានបញ្ជាក់ទៀតថា  ក្នុងបរិមាណអង្ករចំនួន ៣៦២ ៧៩៨តោននេះ គិតជាតម្លៃទឹកប្រាក់សរុប ២៥៣,៨៦ លានដុល្លារ។ នៅក្នុងនោះការនាំចេញទៅប្រទេសចិន និងតំបន់រដ្ឋបាលស្វយ័ត មានប​រិមាណ ១៤១ ៩៥០ តោន គិតជាទឹកប្រាក់ ៩០,២៧ លានដុល្លារ។ ២៥​ ប្រទេសនៅក្នុងទ្វីបអឺរ៉ុប មានចំនួន១៤១ ៣៩៤តោន គិតជាទឹកប្រាក់ ១០០,៣១ លានដុល្លារ។ ៤ប្រទេសក្នុងតំបន់អាស៊ាន ៣០ ១៧១តោន គិតជាទឹកប្រាក់២០,៥៤លានដុល្លារ និងនាំចេញទៅ២២ប្រទេសផ្សេងទៀត ក្នុងតំបន់អាហ្វ្រិក មជ្ឈិមបូព៌ា ចំនួន៤៩១៩៣តោន គិតជាទឹកប្រាក់៤២,៧៤លានដុល្លារ។

ដោយឡែកការនាំចេញស្រូវទៅកាន់ប្រទេសជិតខាងវិញសម្រេចបាន ២ ៤៩៨ ៥៨៦តោន ស្មើនឹងទឹកប្រាក់ ៦៦៣,៥១លា​នដុល្លារ ដោយក្នុងនោះការនាំចេញប្រមាណ ៦០ ភាគរយ បានឆ្លងកាត់ការស្នើសុំការបញ្ជាក់ឯកសារ នាំចញពីអាជ្ញាធ​រមានសមត្ថកិច្ច។

ចំពោះស្ថានភាពនៃការនាំចេញអង្ករក្នុងរយៈពេលប្រាំពីរខែនេះដែរឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រ​មាញ់ និងនេសាទ បានប្រាប់ឱ្យដឹងនៅថ្ងៃទី​៦ ខែសីហា​ថា កម្ពុជាជាប្រទេសមានអំណោយផលល្អដល់សន្តិសុខស្បៀង។ កម្ពុជាមានសន្តិសុខស្បៀ​ងល្អ ទោះបីជាប្រទេសមួយចំនួនមានបញ្ហាសន្តិសុខស្បៀងក្រោយពីឥណ្ឌាផ្អាកនាំអង្ករសចេញ។

ឯកឧត្តមបានបន្ថែមថា ក្រសួងកសិកម្ម និងសហព័ន្ធស្រូវអង្ករ បាននិងកំពុងខិតខំសហការគ្នាក្នុងការធ្វើការងារច្រើន ជាមួយកសិករ និងរោងម៉ាស៊ីនកិនស្រូវ ដើម្បីជំរុញការនាំចេញអង្កររបស់កម្ពុជាទៅកាន់ទីផ្សារពិភពលោក តាមផែនការកំណត់ ដែ​ល​នឹងអនុញ្ញាឱ្យអង្ករកម្ពុជា​រួមចំណែកបានកាន់តែច្រើនក្នុងវិស័យសន្តិសុខស្បៀងពិភពលោក។

ឯកឧត្តម យ៉ង សាំងកុមារ បានបញ្ជាក់ថា ៖ «កត្តាសំខាន់ៗដែលអំណោយផលដល់សន្តិសុខស្បៀងនៅកម្ពុជាមានដូចជា ទី១កម្ពុជាជាប្រទេសផលិតស្រូវដែលមានស្រូវលើសប្រាំមួយលានតោនក្នុងមួយឆ្នាំដែលចូលរួមចំណែកដល់សន្តិសុខស្បៀងពិភ​ពលោកថែមទៀត។ ទី២ការប្រមូលផលស្រូវនៅកម្ពុជាមានបីរដូវក្នុងមួយឆ្នាំ និងទី៣ ប្រជាជនភាគច្រើនជាកសិករផលិតស្រូ​វ ហើយអ្នកផលិតស្រូវភាគច្រើនមានស្តុកស្រូវសម្រាប់បរិភោគ»។

ឯកឧត្តមបានបន្ថែមថា តាមការសិក្សាមួយនៅស្រុកជើងព្រៃ មានកសិករ៦៥ ភាគរយមានស្តុកស្រូវសម្រាប់បរិភោគពេញ១ឆ្នាំ, ២០ ភាគរយស្តុកទុកខ្លះ និង១៥ ភាគរយទិញអង្ករបរិភោគ។ តែស្ថានភាពនេះអាចប្រែប្រួលតាមស្រុក និងខេត្ត។

«យើងកំពុងធ្វើការសិក្សាបន្ថែមឱ្យ​បានច្រើនស្រុក និងខេត្តទៀត ដើម្បីវាយតម្លៃលើស្ថានភាពសន្តិសុខស្បៀងតាមសហគមន៍ដែលជាចំណែកមួយនៃការធានានូវសន្តិសុខស្បៀងជូនសង្គមជាតិទាំងមូល»។ នេះបើតាមឯកឧត្តម យ៉ង សាំងកុមារ បានបញ្ជាក់បន្ថែម។

ចំណែក លោក ចាន់ សុឃាំង ប្រធានសហព័ន្ធស្រូងអង្ករកម្ពុជា បានឱ្យដឹងដែរ​​ថា កិច្ចសម្របសម្រួលយ៉ាងសស្រោកស​ស្រាំ​របស់រាជដ្ឋាភិបាលកម្ពុជា ពិសេសក្រសួងកសិកម្ម និងក្រសួងពាណិជ្ជកម្ម បានផ្តល់កម្លាំងចិត្ត និងការប្តេជ្ញាចិត្តយ៉ាងមុ​តមាំដល់សហព័ន្ធ ក្នុងការរៀបចំយុទ្ធសាស្រ្តនានា ជំរុញការនាំចេញអង្ករឱ្យសម្រេចបានតាមផែនការកំណត់ ជាពិសេសសម្រេចការនាំចេញអង្ករឱ្យបានមួយលានតោន នាអនាគតដ៏ខ្លីខាងមុខ។

លោក ចាន់ សុឃាំង បានបញ្ជាក់ថា ៖ «យើងឃើញថា ជាយុទ្ធសាស្រ្តរបស់រាជរដ្ឋាភិបាលដែរ ដែលលោកបានផ្សព្វផ្សាយអង្កររបស់កម្ពុជាយើង ទៅកាន់បណ្តាប្រទេសជុំវិញពិភពលោកទាំងអស់ នៅពេលដែលមានអង្គប្រជុំធំៗ ព្រឹ​ត្តិការណ៍ធំៗ គឺប្រមុខរាជរដ្ឋាភិបាលតែងតែលើកបញ្ហាស្រូវ និងអង្ករនេះ ឱ្យដៃគូសន្ទនា ដៃគូចចារបានដឹងអំពីសក្តានុពលស្រូវអង្ករកម្ពុជា ហើយពិចារណារកមើលចំណុចដែលអាចជួយគ្នាបាន។ ការណ៍នេះធ្វើឱ្យតម្រូវការស្រូវ ក៏ដូចជាតម្រូវការ​អង្ករនេះ មានការកើនឡើងជាបន្តបន្ទាប់»។

លោកបានបន្ថែមថា តាមរយៈការជួយសម្របសម្រួលរបស់រាជរដ្ឋាភិបាល និងភាពរីកចំរើននៃនៃវិស័យឯកជន ក្នុងការពង្រី​កបន្ថែមនូវសមត្ថភាពសម្ងួតរបស់ក្រុមហ៊ុនក្នុងស្រុក បានធ្វើឱ្យតម្លៃស្រូវមួយចំនួនដូចជា IR និងOM នារយៈពេល៣ឆ្នាំចុង​ក្រោយនេះ មានតម្លៃល្អ នៅពេលដែល តម្រូវការអង្ករសរបស់ទីផ្សារក៏មានកំណើនផងដែរ៕

ដោយ៖វណ្ណ សុជាតា