ប្រទេសមួយចំនួនប្រាប់ឱ្យពលរដ្ឋខ្លួនបង្កើនការប្រុងប្រយ័ត្ន ឬចាកចេញតែម្តង ក្រោយភាពវឹកវរនៅប្រទេសលីបង់
ភ្នំពេញ៖ ការប៉ះទង្គិចគ្នារវាងគ្នារបស់បក្សពួកប៉ាឡេស្ទីន នៅក្នុងជំរុំជនភៀសខ្លួនដ៏ធំបំផុតក្នុងប្រទេសលីបង់ បានធ្វើឱ្យប្រទេសមួយចំនួនក្រើនរំលឹកពលរដ្ឋខ្លួនដែលរស់នៅទីនោះឱ្យប្រុងប្រយ័ត្ន ឬចាកចេញ។
ស្ថានទូតអារ៉ាប៊ីសាអូឌីតប្រចាំនៅលីបង់បានចេញសេចក្តីថ្លែងការណ៍មួយដែលបានបង្ហោះនៅលើកម្មវិធី X ដែលពីមុនត្រូវបានគេស្គាល់ថាជា ធ្វីតធ័រ(Twitter) អំពាវនាវឱ្យពលរដ្ឋរបស់ខ្លួនចាកចេញពីទឹកដីលីបង់ជាបន្ទាន់ ហើយជៀសវាងការចូលទៅជិតតំបន់ដែលមានការប៉ះទង្គិចគ្នាដោយប្រដាប់អាវុធ។
ស្ថានទូតបានសង្កត់ធ្ងន់បន្ថែម តាមរយៈសេចក្តីថ្លែងការណ៍នោះថា ត្រូវប្រុងប្រយ័ត្ន និងហាមឃាត់ដាច់ខាត ធ្វើដំណើរពីអារ៉ាប៊ីសាអូឌីតទៅកាន់ប្រទេសលីបង់នាពេលនេះ។
ជាមួយគ្នានេះ ប្រទេសកូវ៉ែតក៏បានចេញសេចក្តីណែនាំមួយកាលពីព្រឹកថ្ងៃសៅរ៍ ដោយអំពាវនាវឱ្យជនជាតិកូវ៉ែតនៅក្នុងប្រទេសលីបង់ រក្សាការប្រុងប្រយ័ត្ន និងជៀសវាង តំបន់ដែលមានការប៉ះទង្គិចប្រដាប់អាវុធ។ ទោះយ៉ាងណា កូវ៉ែត មិនជំរុញឱ្យពលរដ្ឋខ្លួនចាកចេញពីប្រទេសលីបង់តែម្តងនោះ នេះបើយោងតាមសេចក្តីថ្លែងការណ៍របស់ក្រសួងការបរទេសកូវ៉ែតដែលបានបង្ហោះនៅលើកម្មវិធី X។
ដោយឡែកកាលពីថ្ងៃទី១ ខែសីហា កន្លងទៅថ្មីៗនេះ ចក្រភពអង់គ្លេសក៏បានធ្វើការណែនាំដល់អ្នកដំណើររបស់ខ្លួនដែលនៅកាន់ប្រទេសលីបង់ ដោយផ្តល់ដំបូន្មានថា មិនគួរធ្វើដំណើរទៅកាន់ផ្នែកខ្លះនៃភាគខាងត្បូងនៃប្រទេសលីបង់ ក្បែរជំរំប៉ាឡេស្ទីន Ain el-Hilweh ទេលើកលែងករណីចាំបាច់។
សូមជម្រាបថា ចាប់តាំងពីថ្ងៃទី ២៩ ខែកក្កដា មនុស្សយ៉ាងហោចណាស់ ១៣ នាក់ត្រូវបានសម្លាប់ និងជាង ៦០ នាក់បានរងរបួស ជុំវិញការប៉ះទង្គិចគ្នារវាងក្រុម Fatah និងក្រុមរឹងរូសនៅក្នុងជំរុំជនភាសខ្លួន។
បើយោងតាមទីភ្នាក់ងាររបស់អង្គការសហប្រជាជាតិបានឱ្យដឹងថាជំរុំ Ain el-Hilweh គឺជាជំរុំដ៏ធំបំផុតក្នុងចំណោមជំរុំជនភាសខ្លួនប៉ាឡេស្ទីនចំនួន ១២ នៅក្នុងប្រទេសលីបង់ ដែលមានជនភៀសខ្លួនប៉ាឡេស្ទីនប្រហែល ៨ ម៉ឺននាក់ ក្នុងចំណោមជនភៀសខ្លួនប៉ាឡេស្ទីនចំនួន ២៥ ម៉ឺន នាក់នៅទូទាំងប្រទេសនេះ ។
មូលហេតុនៃការប៉ះទង្គិចគ្នានេះគឺកើតឡើងពីការចោទប្រកាន់គ្នារវាងក្រុម Fatah ដោយចោទប្រកាន់ក្រុមប្រដាប់អាវុធ Jund al-Sham និង al-Shabab al-Muslim ថាបានបាញ់សម្លាប់ឧត្តមសេនីយ៍យោធា Fatah Abu Ashraf al-Armoushi នៅក្នុងជំរំ។
ទោះបីជាយ៉ាងណា មកទល់ពេលនេះការប៉ះទង្គិចប្រដាប់អាវុធនៅតែបន្តកើតឡើងក្នុងចំណោមបក្សពួកប៉ាឡេស្ទីន បើទោះបីជាមានការគំរាមបញ្ជូនកងទ័ពលីបង់ទៅអន្តគមន៍នៅជំរំជនភៀសខ្លួនយ៉ាងណាក្តី៕
ប្រែសម្រួល៖ស្រ៊ុន សិរីវឌ្ឍនៈ
ប្រភព៖ Saudi Arabia urges its citizens to quickly leave Lebanon
