ភ្នំពេញ៖ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានឱ្យដឹងថា រយៈពេលប្រាំពីរខែឆ្នាំ២០២៣ កម្ពុជាទទួលបានភ្ញៀវទេសចរផ្ទៃក្នុងជាង ១២ លាននាក់ ដោយខ្វះតែ បួនលាននាក់ទៀតប៉ុណ្ណោះ កម្ពុជានឹងសម្រេចផែនការភ្ញៀវទេសចរផ្ទៃក្នុង ១៦លាននាក់សម្រាប់ឆ្នាំ២០២៣នេះ ខណៈភ្ញៀវអន្តរជាតិរំពឹងថា នឹងបានប្រាំលាននាក់។

ឯកឧត្តម ថោង ខុន បានប្រាប់អ្នកសារព័ត៌មានបែបនេះ នៅក្នុងទិវារត់ប្រណាំងម៉ារ៉ាតុងអន្តរជាតិចក្រភពខ្មែរ លើកទី៨ ឆ្នាំ២០២៣ នៅខេត្តសៀមរាប កាលពីថ្ងៃទី៦ ខែសីហាថា ទិវារត់ប្រណាំងម៉ារ៉ាតុងអន្តរជាតិចក្រភពខ្មែរលើកទី៨ឆ្នាំ ២០២៣នេះ មានអ្នកចូលរួមសរុបជាង២.៥០០នាក់។ ក្នុងនោះមានបរទេសជាង៥០០នាក់មកពី៤៥ប្រទេស ហើយចំនួននេះមានការ កើនឡើងច្រើនបើធៀបទៅនឹងការប្រកួតម៉ារ៉ាតុងអន្តរជាតិចក្រភពខ្មែរលើកទី៧ ដែលត្រូវបានរៀបចំជាថ្មី បន្ទាប់ពីវិបត្តិជំងឺកូវីដ១៩ កាលពីឆ្នាំ២០២២។

ឯកឧត្តមមានប្រសាសន៍ថា ៖ «ការកើនឡើង នៃចំនួនអ្នកចូលរួមនៅក្នុងទិវានេះ ដោយសារភ្ញៀវទេសចរបានមើលឃើញថា កម្ពុជាមានសុខសន្តិភាពពេញបូរិបូណ៍ ហើយគណៈកម្មការ និងអ្នកពាក់ព័ន្ធផ្សេងៗ ទៀតបានរៀបចំតំបន់អង្គរបានល្អ។ ខ្ញុំរំពឹងថា នៅឆ្នាំនេះ កម្ពុជា នឹងទទួលបានភ្ញៀវទេសចអន្តរជាតិប្រាំលាននាក់ ក្នុងស្រុកប្រមាណ១៦លាននាក់ និងឆ្នាំ២០២៦ ទទួលបានភ្ញៀវទេសចរអន្តរជាតិកើនឡើងដល់ប្រមាណប្រាំពីរលាននាក់»។នេះជាការបញ្ជាក់បន្ថែមរបស់លោករដ្ឋមន្រ្តី»។

បើតាមរបាយការណ៍ស្ថិតិពីក្រសួងទេសចរណ៍ បានឱ្យដឹងថា ក្នុងរយៈពេលប្រាំពីរខែ ក្នុងឆ្នាំនេះនៅទូទាំងប្រទេសកម្ពុជា ទទួលបានភ្ញៀវទេសចរផ្ទៃក្នុងប្រមាណជាង១២លាននាក់ ។

ចំពោះស្ថិតិទេសចរណ៍ និងការរំពឹងពីក្រសួងទេសចរណ៍ ចំពោះភ្ញៀវទេសចរក្នុងឆ្នាំនេះដែរ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាថា ជាធម្មតា ខែកក្កដា និងខែសីហា ជាខែដែលមានចរន្តភ្ញៀវទេសចរផ្ទៃក្នុងតិច ដោយសារជារដូវភ្លៀង អាចមានជំនន់ទឹកភ្លៀងដោយកន្លែង។ ម្យ៉ាងវិញទៀត ខែទាំង២នេះ មិនមានថ្ងៃឈប់សម្រាកជាតិទេ។

លោកបានបញ្ជាក់ថា ៖ «រដូវនេះជារដូវ Low season។ ជារដូវកាលដែលខ្សត់ភ្ញៀវ វារឿងធម្មតា។ ចរន្តភ្ញៀវ នឹងចាប់ផ្តើមមានសន្ទុះខ្លាំងចាប់ពីខែកញ្ញា ជាមួយការប្រារព្ធពិធីកាន់បិណ្ឌ និងភ្ជុំបិណ្ឌ និងថ្ងៃឈប់សម្រាកនានា ហើយភ្ញៀវនឹងចាប់ផ្តើមមានមកវិញនៅកំលុងចុងឆ្នាំនេះ ដែលអាចនឹងធ្វើឱ្យកំណើនទេសចរសម្រេចទៅតាមផែនការដែលក្រសួងបានរំពឹងទុក»។

ក្រសួងទេសចរណ៍រំពឹងថា នឹងទទួលបានភ្ញៀវទេសចរផ្ទៃក្នុង ប្រមាណ១៦លាននាក់ សម្រាប់ឆ្នាំនេះ ក្រោមទម្រង់អក្សរ “វី”( V )ដូចដែលព្យាករណ៍ក្នុងផែនទីចង្អុលផ្លូវ ស្តីពីការស្តារ និងលើកស្ទួយវិស័យទេសចរណ៍ក្នុង និងក្រោយដំណាក់កាលវិបត្តិជំងឺកូវីដ១៩៕ ដោយ៖ វណ្ណ សុជាតា