ព្យុងយ៉ាង៖ កាលពីថ្ងៃអង្គារ​ ម្សិលមិញ មេដឹកនាំកូរ៉េខាងជើង លោក គីម ជុងអ៊ុន (Kim Jong Un) និងប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានផ្ញើលិខិត​ឱ្យគ្នាទៅវិញទៅមក ដោយសន្យា​ថា​ ពួកគេនឹ​ងអភិវឌ្ឍទំនាក់ទំនងរបស់ពួកគេ ឱ្យ​ទៅជាទំនាក់ទំនងយុទ្ធសាស្ត្រយូរអង្វែង​។ នេះបើយោងតាមប្រព័ន្ធផ្ស​ព្វផ្សាយរដ្ឋរបស់ទីក្រុងព្យុងយ៉ាង ឈ្មោះថា KCNA ។

គួរដឹងដែរថា​ លិខិតរបស់ភាគីទាំងពីនេះជាលិខិតអបអរសារទរដល់ការប្រារព្ធ​ខួប​លើក​ទី៧៨ នៃ​ការ​រំដោះ​កូរ៉េ​ពី​អាណានិគម​របស់ជប៉ុនចាប់ពីឆ្នាំ១៩១​០ ដល់​ឆ្នាំ​១៩៤៥។ ថ្ងៃនេះផងដែរ​ គឺជាថ្ងៃដែល​ត្រូវ​បាន​គេ​ចា​ត់ទុកថាជាថ្ងៃ​បុណ្យ​ជាតិ​នៅក្នុង​ប្រទេស​កូរ៉េ​ខាង​ត្បូងទៀតផង។

យោងតាមសារព័ត៌មាន​ KCNA បានឲ្យដឹងថា នៅក្នុងសារលិខិតទៅកាន់លោក ពូទីន លោក គីម បានសរសេ​រថា មិត្តភាពរបស់ប្រទេសទាំងពីរត្រូវបានបង្កើតឡើងនៅក្នុងសង្គ្រាមលោកលើកទី២ ដោយពួកគេបាន​យកជ័យជម្នះលើប្រទេសជប៉ុន ហើយឥឡូវនេះ ប្រទេសទាំងពីរកំពុងបង្ហាញពីសក្ដានុពលរៀងៗខ្លួននៅក្នុងតំបន់ និងតស៊ូកម្ទេចអនុត្តរភាពរបស់ចក្រពត្តិនិយម។

លោក គីម បានបញ្ជាក់នៅក្នុងលិខិតនោះថា ៖ «ខ្ញុំជឿជាក់យ៉ាងមុតមាំថា មិត្តភាព និងសាមគ្គីភាព​រវាងប្រទេសទាំងពីរ នឹងនៅតែបន្តអភិវឌ្ឍបន្ថែមទៀ​ត​ ដើម្បីឈានឆ្ពោះទៅរកទំនាក់ទំនងជាយុទ្ធសាស្រ្តយូរអ​ង្វែ​ង ស្របតាមតម្រូវការនៃយុគសម័យថ្មី»។

លោកបាន​​បន្តថា ៖ «ប្រទេសទាំងពីរនឹងទទួលបានជ័យជម្នះ និងសហការគ្នាយ៉ាងមុតមាំក្នុងដំណើរស​ម្រេចបាននូវគោលដៅ និងបុព្វហេតុរួមរបស់ពួកគេ»។

កន្លងមក សហរដ្ឋអាមេរិកបានចោទប្រកាន់កូរ៉េខាងជើងថាបានផ្តល់គ្រឿងសព្វាវុធដល់រុស្ស៊ី ដើម្បីធ្វើស  ង្គ្រាមជាមួយប្រទេសអ៊ុយក្រែន ក្នុងនោះរួមមាន កាំភ្លើងធំ គ្រាប់រ៉ុក្កែត និងគ្រាប់មីស៊ីលជាដើម។ យ៉ាងណាក៏ដោយ ក្រុង​ព្យុងយ៉ាង និង​ក្រុង​ម៉ូស្គូ តែងតែ​បាន​បដិសេធ​រាល់ការចោទប្រកាន់ទាំងនោះ។

កាលពីខែមុន រដ្ឋមន្ត្រីការពារជាតិរុស្ស៊ីបានឈរប្រកៀកស្មាជាមួយលោក គីម ក្នុងអំឡុងពេលដែលពួកគេបានជួបប្រជុំគ្នាដើម្បីពិនិត្យមើលគ្រាប់មីស៊ីលដែលមានសមត្ថភាពបំពាក់នុយក្លេអ៊ែរថ្មីបំផុតរបស់កូរ៉េខាងជើង និងយន្តហោះគ្មានមនុស្សបើកនៅក្នុងព្យុហយាត្រាយោធាមួយក្នុងទីក្រុងព្យុងយ៉ាងផងដែរ។

ដោយឡែក​ កាលពីថ្ងៃអង្គារ អ្នកនាំពាក្យរងក្រសួងការបរទេសអាមេរិក លោក វ៉េដាន់​ ផាថេល (Vedant Patel) បាននិយាយថា ទីក្រុងវ៉ាស៊ីនតោន នៅតែមានការព្រួយបារម្ភអំពីប្រទេសកូរ៉េខាងជើងយ៉ាងខ្លាំង ជុំវិញការផ្តល់ជំនួយដល់កិច្ចខិតខំប្រឹងប្រែងធ្វើសង្រ្គាមរបស់រុស្ស៊ីនៅអ៊ុយក្រែន ហើយជឿជាក់ថា ទីក្រុងម៉ូស្គូកំ​ពុងស្វែងរកការបង្កើនកិច្ចសហប្រតិបត្តិការរបស់ខ្លួនជាមួយទីក្រុងព្យុងយ៉ាងបន្ថែមទៀត។

លោក​ ផាថេល បានលើកឡើងនៅក្នុងសន្និសីទសារព័ត៌មានមួយថា ៖ «ប្រភេទនៃកិច្ចសហប្រតិបត្តិការស​ន្តិសុខ ឬកិច្ចព្រមព្រៀងសព្វាវុធណាមួយរវាងកូរ៉េខាងជើង និងរុស្ស៊ី គឺជាការបំពានលើដំណោះស្រាយជាបន្តបន្ទាប់ដែលក្រុមប្រឹក្សាសន្តិសុខអង្គការសហប្រជាជាតិធ្លាប់បានដាក់ចេញកន្លងមក»។

យោងតាម KCNA លោក ពូទីន បានលើកឡើងនៅក្នុងសារលិខិតនោះថា ៖ «ខ្ញុំប្រាកដថា យើងនឹងពង្រឹ​ងកិច្ចសហប្រតិបត្តិការទ្វេភាគីលើគ្រប់វិស័យ ដើម្បីសុខុមាលភាពរបស់ប្រជាជនរបស់ប្រទេសទាំងពីរ ស្ថិរភា​ព និងសន្តិសុខដ៏រឹងមាំនៅឧបទ្វីបកូរ៉េ និងអាស៊ីឦសានទាំងមូល»។

រីឯមេដឹកនាំប្រទេសកូរ៉េខាងត្បូង សហរដ្ឋអាមេរិក និងជប៉ុនវិញ​ ពួកគេគ្រោងនឹងជួបពិភាក្សាគ្នាអំពីកិច្ចសហប្រតិបត្តិការសន្តិសុខនៅកូរ៉េខាងជើង អ៊ុយក្រែន និងបញ្ហាផ្សេងទៀតនៅក្នុងតំបន់​ ដែលនឹងប្រព្រឹត្តទៅនៅថ្ងៃទី១៨ ខែសីហាខាងមុខនេះ។

បន្ថែមលើនេះ​ សហរដ្ឋអាមេរិកបានដាក់សំណើទៅកាន់ប្រទេសអាល់បានី និងជប៉ុន​ ឲ្យមានកិច្ចប្រជុំមួយនៅថ្ងៃព្រហស្បតិ៍ ហើយកិច្ចប្រជុំនេះនឹងក្លាយជាជំនួបផ្លូវការលើកដំបូងរបស់ក្រុមប្រឹក្សាដែលមានសមា​ជិក ១៥ រូប​ នេះបើរាប់ចាប់តាំងពីឆ្នាំ២០១៧ ប៉ុន្តែប្រទេសចិនបានជំទាស់ ដោយអះអាងថា ជំនួបនេះនឹងបង្កើនការប្រឈមមុខដាក់គ្នា និងភាពតានតឹងកាន់តែខ្លាំង៕

ប្រែសម្រួល៖ធា សុណា

ប្រភពព័ត៌មាន៖​ Reuters​ North Korea’s Kim, Russia’s Putin exchange letters vowing stronger ties