ភ្នំពេញ៖ អ្នកជំនាញនិងអ្នកវិនិយោគនៅក្នុងវិស័យអចលនទ្រព្យ បានលើកឡើងថា ការជាប់គាំងនៃវិស័យអចលនទ្រព្យកម្ពុជា ជាពិ​សេសការលក់លំនៅឋាន និងដីធ្លី អាចអូសបន្លាយដល់ចុងឆ្នាំ២០២៤ ដែលបញ្ហាភាគច្រើនកើតឡើងដោយសារតែការសា​ងសង់ ច្រើនជាងតម្រូវការជាក់ស្តែង។

លោក លាង ម៉េង ប្រធានអគ្គនាយកក្រុមហ៊ុន Chip Mong Group នៅក្នុងវេទិការធុរកិច្ចកម្ពុជា ឆ្នាំ២០២៣ ដែលរៀបចំឡើងដោយសមាគមឧកញ៉ាកម្ពុជា កាលពីចុងសប្តាហ៍កន្លងទៅ បានពន្យល់ថា បើក្រឡេកទៅមើលអ្នកវិនយោគនៅក្នុងវិស័យអចនទ្រព្យនេះមានច្រើនពេក មានន័យអ្នកផ្គត់ផ្គង់ ច្រើនជាងអ្នកមានតម្រូវការ​។

លោកបានពន្យល់ថា អ្នកវិនិយោគភាគច្រើនយល់ថា ការវិនិយោគលើអចលទ្រព្យល្អ ឃើញចំណេញ។ ដូច្នេះនាំគ្នាវិ​និយោគតាមគ្នា។ ដូចនេះនៅពេលធ្វើតាមគ្នា នាំឱ្យការផ្គត់ផ្គង់លើសតម្រូវការ ហើយចំពេលដែលមានវិបត្តិសេដ្ឋកិច្ចសក​ល​ទៀត ដែលមិនប្រាកដប្រជាផងនោះ វានាំឱ្យប៉ះមកដល់យើងដែរ។

លោកបានបន្ថែមថា កន្លងមក មានប្រជាពលរដ្ឋតវ៉ាច្រើនទាក់ទងនឹងបញ្ហាទិញដីធ្លី និងលំនៅឋាន ពីក្រុមហ៊ុននិងបុរីមួយចំ​នួនមានបញ្ហា ដោយសារតែអ្នកវិនិយោគនោះមិនមានការរៀបចំរំហូរសាច់ប្រាក់ក្នុងក្រុមហ៊ុនខ្លួន ឱ្យបានត្រឹមត្រូវ ជាពិ​សេ​សការខ្ចីលុយពីធនាគារវិនិយោគ ដែលមិនបានគិតពីទុនវិនិយោគឱ្យបានត្រឹមត្រូវ។

លោក លាង ម៉េង មានប្រសាសន៍​ថា ៖ «សម្រាប់ខ្ញុំអ្នកវិនិយោគធំនៅក្នុងវិស័យអចលទ្រព្យមួយដែរ ដែលគម្រោងដែលខ្ញុំកំ​ពុងធ្វើទាំងអស់មានប្រាំមួយដោយការលក់មានការថយចុះជាងមុន ដែលអ្នកទិញភាគច្រើនជាងអ្នកចង់រស់នៅពិតប្រាកដ មិនមែនជាអ្នកដើម្បីប្រាក់ចំណេញ។ ចំពោះការវិនិយោគលើអចលនទ្រព្យនាថ្ងៃខាងមុខ ខ្ញុំមើលឃើញថា សម្រាប់ឆ្នាំក្រោ​យនៅតែមានការលំបាកបន្តិច»។

ទោះជាយ៉ាងណាក៏ដោយ លោក លាង ម៉េង នៅតែមានសុទិដ្ឋិនិយមថា រាជរដ្ឋាភិបាលអាណត្តិថ្មី ក្រោមការដឹកនាំដោយ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នឹងធ្វើឱ្យវិស័យនេះមានស្ថិរភាពឡើងវិញ ដោយសារនាយករដ្ឋមន្រ្តីថ្មី មានចក្ខុវិស័យវែងឆ្ងាយ និងមានការយល់ដឹងច្រើនលើវិស័យនេះ។

ទាក់ទងនឹង​ការ​លើកឡើងរបស់​លោក លាង ម៉េង, លោក ច្រឹក សុខនីម ប្រធានសមាគមវាយតម្លៃ និងភ្នាក់ងារអចលនទ្រ ព្យកម្ពុជា មានការយល់ឃើញស្រដៀងគ្នានេះដែរថា ស្ថានភាពមិនច្បាស់លាស់នៃសេដ្ឋកិច្ច តំបន់ និងសកលលោក នឹងធ្វើប៉ះពាល់ដល់គ្រប់វិស័យ ខណៈដែលវិស័យអចលនទ្រព្យ ក៏ជួបបញ្ហាច្រើននាមួយរយៈពេលចុងក្រោយនេះ។

លោកបានប្រាប់​ឱ្យដឹងនៅថ្ងៃទី១៦ ខែសីហា​ថា ភាពប្រឈមនៃបញ្ហាសេដ្ឋកិច្ចពិភពលោក ជាពិសេសនៅក្នុងតំបន់អាស៊ីនិងអឺរ៉ុប បានជះឥទ្ធិពលខ្លាំងគួរសមដល់ សេដ្ឋកិច្ចកម្ពុជា ដែលស្ថានភាពនឹងមានការអូសបន្លាយបន្តទៀត រហូតដល់ឆ្នាំ២០២៤។

លោកបានបញ្ជាក់​ថា៖ «​ការទិញលក់អចលនទ្រព្យនាពេលបច្ចុប្បន្ននេះ គ្មានទេអតិថិជនថ្មី មានតែអតិថិជនចាស់ ដែលទិ​ញរួចហើយ និងបន្តបង់ប្រាក់ជាមួយធនាគារ ខណៈដែលការបង់របស់អតិថិជនចាស់ ក៏មានបញ្ហាខ្លះ ដោយសារបញ្ហាលំហូរសាច់ប្រាក់របស់គាត់»។

លោក ច្រឹក សុខនីម ក៏​បាន​បង្ហាញពីការរំពឹងទុកថា រាជរដ្ឋាភិបាលកម្ពុជាអាណត្តិថ្មីខាងមុខនេះនឹងរៀបចំនូវយន្តការមួយចំនួនដើម្បីជួយដល់វិស័យនេះឱ្យមានស្ថិរភាពឡើងវិញ ដែលយន្តការទាំងរួមមាន ការបើកឱកាសឱ្យមានចរន្តសាច់ប្រាក់ ជាពិសេសការបន្ធូបន្ថយរបស់ធនាគារ សម្រាប់កម្ចីនានាក្នុងការទិញអចលនទ្រព្យ,ការអនុគ្រោះពន្ធ និងការលើកទឹកចិត្តផ្សេងៗទៀត។

ចំណែក លោក ចេង ខេង អគ្គនាយកក្រុមហ៊ុនអចលនទ្រព្យ CPL ដែលជាក្រុមហ៊ុនភ្នាក់ងារទិញលក់អចលនទ្រព្យនៅក​ម្ពុជា បានយល់ឃើញដែរ​ថា ស្ថានភាពបែបនេះ ជាឱកាសល្អសម្រាប់អ្នកប្រមូលទិញ ដែលអាចទិញបានក្នុងតម្លៃទាប និងមានទីតាំងល្អ ។

លោកបានលើកឡើងថា ៖ «​នៅក្នុងបញ្ហាក៏មានឱកាសផងដែរ សម្រាប់ខ្ញុំយល់ថា ពេលវេលានេះ ជាឱកាសល្អសម្រាប់អ្នកដែលចង់ទិញអចនទ្រព្យក្នុងតម្លៃធូរថ្លៃ និងមានទីតាំងល្អ ដែលនឹងអាចលក់ចំណេញច្រើនៅពេលស្ថានភាពសេដ្ឋកិច្ចសកលវិលមករកសភាពប្រក្រតីវិញ។ ការទាក់ទាញអ្នកវិនិយោគបរទេសមកវិនិយោគកាន់តែច្រើន នឹងជួយជំរុញឱ្យវិស័យនេះ មានភាពប្រសើរឡើងវិញ​»៕ដោយ៖វណ្ណ សុជាតា