ប្តីប្រពន្ធមួយគូ នៅខេត្តបាត់ដំបង កែច្នៃពោតអប់អនាម័យ អាចដាក់លក់ក្នុងផ្សារទំនើបធំៗទូទាំងប្រទេស
បាត់ដំបង៖ ពោតជាដំណាំមួយប្រភេទដែលទើបផ្តើមមានសារៈសំខាន់ខ្លាំងឡើងៗរហូតដល់កម្រិតថ្នាក់ជាតិនៅដើមឆ្នាំ១៩១០ គឺនៅពេលដែលបារាំងដើរប្រមូលទិញពោតពីប្រទេសក្រោមចំណុះរបស់ខ្លួន។
បច្ចុប្បន្នពោតគឺជាអាហារដ៏ពេញនិយមបំផុតមួយនៅទូទាំងពិភពលោក ដោយសារតែវាមានរសជាតិឆ្ងាញ់ ព្រមទាំងមានសារជាតិចិញ្ចឹមជាច្រើនដូចជា ជាតិសរសៃ វីតាមីន និងជាតិរ៉ែ។
ដំណាំប្រភេទនេះ គេអាចកែច្នៃវាចេញទៅជាអាហារច្រើនមុខ និងជាចំណីចំណុក ឬអាហារសម្រន់កែច្នៃច្រើនសន្ធឹកសន្ធាប់។ នៅកម្ពុជាពលរដ្ឋក៏និយមបរិភោគពោត និងកែច្នៃបន្តិចបន្តួចដោយខ្លួនឯងនៅផ្ទះផងដែរ។ លើសពីនេះទៅទៀត ប្តីប្រពន្ធមួយគូនៅខេត្តបាត់ដំបង មានជំនាញកែច្នៃពោតទៅជាផលិតផលកែច្នៃដាក់លក់ក្នុងផ្សារទំនើបធំៗនៅភ្នំពេញ និងខេត្តចំនួនប្រាំមួយផងដែរ។
អ្នកស្រី នុត សុភ័ស្ត ជាម្ចាស់ និងតំណាងឱ្យសិប្បកម្ម «ស្រីមុំកែច្នៃគ្រាប់ធញ្ញជាតិ» បានឱ្យដឹងថា អ្នកស្រី និងស្វាមី បានដំណើរការសិប្បកម្មខ្នាតតូចមួយនេះអស់រយៈពេល ៨ឆ្នាំមកហើយ ពោលគឺចាប់ផ្តើមជាមួយទុនតិចតួច លក់ច្រកថង់ប្លាស្ទិក និងចងកៅស៊ូធម្មតា រហូតមានការវេចខ្ចប់ស្តង់ដារ និងអនាម័យហើយអាចដាក់លក់ក្នុងផ្សារទំនើបធំៗ។
បើក្រឡេកទៅក្រោយបន្តិចមុនបើកសិប្បកម្មផ្ទាល់ខ្លួន អ្នកស្រីបានឱ្យដឹងថាខ្លួន និងស្វាមី គឺគ្រាន់ជាអ្នកធ្វើការធម្មតាដូចគេ ដូចឯង ហើយថែមទាំងគ្មានបទពិសោធន៍ដំណើរការអាជីវកម្ម ឬសិប្បកម្មនោះទេ។ ប៉ុន្តែនៅពេលមានកូន ការចំណាយមានការកើនឡើង ជាមូលហេតុចម្បងមួយដែលជំរុញឱ្យអ្នកស្រីគិតឡើងវិញពីការងារចំណូលតិចតូចស្ដួចស្ដើងរបស់ខ្លួន ហើយផ្តើមទៅចាប់បន្ថែមជារបរលក់ដូរ ច្នៃពោតលក់តាមអនឡាញនៅគ្រាដំបូង។
អ្នកស្រី នុត សុភ័ស្ត បានបន្តថា ៖ «យើងបន្តមករហូតដល់ពេលកូវីដ១៩ យើងបាត់បង់ទាំងការងារថែមទៀត ទើបខ្ញុំ និងស្វាមីងាកមកផ្ដោតលើរបរនេះ ហើយក៏ទទួលបានផលគាប់ប្រសើរក្នុងឆ្នាំ ២០២២ និង២០២៣នេះ»។
បច្ចុប្បន្នសិប្បកម្មស្រីមុំ បានពង្រីកការកែច្នៃផលិតផលចំនួនបួនផលិតផល រួមមាន គីមឈី, អំបិលបង្គាលីង, បាញ់ត្រាង និងពោតអប់ដែលជាផលិតសំខាន់ជាងគេមាន២រសជាតិ គឺរសជាតិស្លឹកខ្ទឹម និងរសជាតិហិរ។
សម្រាប់ទីផ្សារធំៗចម្បងរបស់ពោតអប់របស់អ្នកស្រី នុត សុភ័ស្ត មានដូចជា ផ្សារទំនើបជីបម៉ុងគ្រប់សាខា ក្នុងរាជធានីភ្នំពេញ, ផ្សារ CP Fresh Mart និងមាននៅតាមបណ្ដាម៉ាតក្នុងខេត្តចំនួនប្រាំមួយ ផ្សេងទៀត រួមទាំងការលក់រាយតាមអ៊ីនធឺណិត និងតាមហាងកាហ្វេនានាផងដែរ។
ទាក់ទិននឹងការផលិត និងវត្ថុធាតុដើម គ្រាប់ពោតនេះ អ្នកស្រីបានឱ្យដឹងថា សិប្បកម្មអ្នកស្រីប្រើប្រាស់ វត្ថុធាតុដើមក្នុងស្រុកសុទ្ធសាធដែលមកពីស្រុកសំឡូត និងស្រុកមោងឫស្សី ក្នុងគោលដៅដើម្បីលើកស្ទួយដល់ជីវភាពកសិករ។ចំណែកឯបរិមាណក្នុងការផលិតអ្នកស្រីថា វាអាស្រ័យទៅលើការកុម្ម៉ង់របស់អតិថិជនផ្ទាល់ បើគិតមធ្យមវិញក្នុង ១ថ្ងៃ អាចផលិតបានពី ២០-៣០គីឡូក្រាម។
ជុំវិញការផលិតនេះដែរ អ្នកស្រី នុត សុភ័ស្ត និយាយថា មិនមានផលវិបាកអ្វីខ្លាំងនោះទេ និងមិនត្រូវពេលចំណាយយូរពេកនោះដែរ ពោលគឺត្រឹមមួយថ្ងៃនឹងអាចបញ្ចប់ការផលិត និងវេចខ្ចប់បានរួចរាល់។
អ្នកស្រីបានរៀបរាប់ឱ្យដឹងថា ពោតអប់មានរសជាតិប្លែកខុសពីពោតកែច្នៃដទៃ និងសូម្បីតែរសជាតិរបស់ពោតបំពង ឬហៅថា Popcornក៏ខុសគ្នាដែរ ដោយសារតែវត្ថុធាតុដើមជាពោតក្នុងស្រុក មានគុណភាពខ្ពស់ ស្រស់ល្អ នៅពេលដែលកែច្នៃទៅ មានរសជាតិឆ្ងាញ់ ហើយស្រួយ។
ពោតអប់កែច្នៃរបស់សិប្បកម្មស្រីមុំ មានបីជម្រើស សម្រាប់កញ្ចប់ ១០០ក្រាម មានតម្លៃ បួនពាន់រៀល, ២០០ក្រាម ប្រាំបីពាន់រៀល និងកញ្ចប់៤០០ក្រាម មានតម្លៃ ១៥.០០០រៀល។ សម្រាប់ការលក់ពោតអប់នេះ អ្នកស្រី សុភ័ស្ត និយាយថា ឥវ៉ាន់ដែលផលិតរួចរាល់ កម្រមានសល់ណាស់ពោលគឺលក់ចេញអស់ៗតែម្ដង។
ដោយឡែកទាន់ទិនទៅនឹងគម្រោងទៅថ្ងៃមុខ អ្នកស្រី នុត សុភ័ស្ត បានឱ្យដឹងថា ៖ «ទៅថ្ងៃមុខ ពួកខ្ញុំមានគម្រោងធំ គឺយើងមិនចង់គ្រាន់តែជាសិប្បកម្មខ្នាតគ្រួសារទេ យើងចង់ពង្រីកឱ្យវាក្លាយទៅជាសហគ្រាស១ ដែលអាចផ្គត់ផ្គង់ទីផ្សារកាន់តែធំនៅក្នុងស្រុក និងក្រៅស្រុក។ ឥឡូវនេះដោយសារយើងកង្វះទុក យើងត្រូវតែធ្វើទៅតាមលទ្ធភាពសិន»។
ក្នុងនាមជាម្ចាស់សិប្បកម្មខ្មែរមួយរូប អ្នកស្រីសំណូមពរទៅកាន់ផ្សារទំនើប និងបណ្ដាម៉ាតនានា ឱ្យជួយនាំចូលរាល់ផលិតផលខ្មែរ និងកុំដាក់ភ្ជាប់ជាមួយលក្ខខណ្ឌតឹងតែងខ្លាំងពេកសម្រាប់សិប្បកម្មលក្ខណៈគ្រួសារ ឬសិប្បកម្មតូចៗ ដើម្បីឱ្យផលិតផលខ្មែរអាចជ្រាបចូលទៅកាន់ទីផ្សារងាយជាងមុន។
ជាមួយគ្នានេះ អ្នកស្រីក៏សំណូមពរទៅកាន់ពលរដ្ឋខ្មែរ នាំគ្នាជួយគាំទ្រលើកស្ទួយផលិតផលក្នុងស្រុកទាំងអស់គ្នា ដើម្បីសេដ្ឋកិច្ចជាតិកាន់តែមានភាពប្រសើរឡើង៕
ដោយ៖ស្រ៊ុន សិរីវឌ្ឍនៈ
